Read Quechua Cuzco Bible 1988 APOCALIPSIS 18 Bible Online

APOCALIPSIS 18 - Quechua Cuzco Bible 1988 bible

APOCALIPSIS 18

¹Chaykuna qhepatataq wak angelta rikurqani hatun atiywan hanaq pachamanta uraykamushaqta, lliphllikiyninwantaq kay pachata k'anchaykushaqta.

²Hinaspanmi kallpawan waqyakuspa nirqan: ¡Hatun Babilonia llaqtaqa urmaykunñan, thunikunñan! Supaykunaq tiyananmi kapun, tukuy millay espiritukunaq tiyananmi kapun, tukuy qhellikaq cheqnisqa phalaq animalkunaq tiyananmi kapun.

³Llapa suyukunan Babiloniaq wasanchay huchanwan heq'eparqanku, allin poqosqa vinowan machaq hina, paywanmi kay pacha llapa reykunaqa qhellipi purirqanku, kay pachapi qhatuqkunapas paypa kusikuyllapi sinchi gastasqanwanmi qhapaqyaykurqanku, nispa.

⁴Hinaqtinmi hanaq pachamanta huk kunkata uyarirqani: Llaqtalláy, chay llaqtamanta lloqsipuychis, ama huchallikuq-masin kanaykichispaq, amataq manchay ñak'arichisqa-masin kanaykichispaqwan.

⁵Huchankunaqa hanaq pachakaman chayamun, Diosqa mana chanin ruwasqankutan yuyarin.

⁶Paymanqa qosqasuykichisman hina kutichipuychis, ruwasqankunaman hina iskay kutita pagapuychis. Hukkunapaq paypa chhaqrusqan vinomantaqa aswan fuertetaraq ukyananpaqqa chhaqrupuychis.

⁷Paytaqa hatunchakusqanman hina sinchi gastasqanman hina ñak'arichiychispas muchuchiychispas. Payqa sonqonpin nin: Ñoqaqa reinañan kaypi tiyashani, manan viudachu kani, manataqmi hayk'aqpas wañuqniyoq hina waqasaqchu, nispa.

⁸Chayraykun huk p'unchayllapi manchay ñak'arichiy paypaq chayamunqa: waqay, yarqay, wañuy ima. Payta juzgaq Señor Diosqa atiyniyoqmi, chaymi ninawan ruphaykachinqa.

⁹Hinan chay warmiwan qhellipi purispa kusikuyllapi kawsaspa sinchi gastaq kay pacha reykunaqa paymanta waqanqaku, mayta llakikunqaku, ruphaykusqan q'osñita rikuspa.

¹⁰Ñak'arisqanmanta manchasqa karullapi sayaykuspankutaq ninqaku: ¡Imaraqmi, hatun Babilonia llaqta! ¡Ikiraqmi, hatun atiyniyoq llaqta! Ñawi ch'ipiq-niyllapin thunikunaykiqa chayarqamun, nispa.

¹¹Kay pachapi qhatuqkunapas paymantaqa waqanqakun, khuyaytan llakikunqaku, qhatunankuta manaña pipas rantiq kasqanrayku.

¹²Chay qhatunankun kaykuna: Qori, qolqe, umiña rumikuna, perlakuna, sumaq lino, sani-puka tela, seda tela, sansaq-puka tela, sumaq q'apaq imaymana rikch'aq kurkukuna, marfilmanta, ancha chaniyoq kurkumanta, broncemanta, fierromanta, pachas rumimanta imaymana rikch'aq ruwasqakuna,

¹³canela, sumaq q'apaqkuna, incienso, mirra, sumaq q'apaq incienso, vino, aceite, ñut'u hak'u, trigo, cargana uywakuna ovejakuna, caballokuna, carretakuna, kamachi runakuna ima.

¹⁴Qhatuqkunan chay llaqtata ninqaku: Ancha munasqayki sumaq frutakunaqa manan kapunñachu, tukuy sumaq kaqkunapas k'ancharishaq kaqkunapas tukukapunñan, manataqmi hayk'aqpas chaykunata tarinkiñachu, nispa.

¹⁵Chaykunata qhatuqkunaqa, chay llaqtaq qhapaqyachisqankunaqa, karullapin sayaykunqaku ñak'arisqanmanta manchakuspa. Paykunaqa waqaspan mayta llakikuspan

¹⁶ninqaku: ¡Imaraqmi! ¡Ikiraqmi, haqay hatun llaqtaqa! ¡Warmi hinan sumaq linowan, sani-puka telawan, sansaq-puka telawan p'achasqa karqan, qoriwan, umiñakunawan, perlakunawan k'achanchasqa karqan!

¹⁷¡Ñawi ch'ipiq-niyllapin chay sinchi askha qhapaq-kaykunaqa ch'usaqyarqapun! nispa. Hinaqtinmi barcota llapa purichiqkunaqa, barcokunapi llapa puriqkunapas, barcopi llank'aqkunapas, mama qochapi llapa llank'apakuqkunapas karullapi sayaykurqanku.

¹⁸Hatun llaqtata ruphashasqan q'osñita rikuspataq kunkayoqta nirqanku: ¿Mayqen llaqtataq kay hatun llaqta hinaqa karqan? nispa.

¹⁹Chaymi hallp'ata umankuman hach'ikurqanku, mayta waqaspa llakikuspankutaq kunkayoqta nirqanku: ¡Imaraqmi! ¡Ikiraqmi, chay hatun llaqtaqa! Mama qochapi llapa barcoyoqkunaqa kay llaqtaq qhapaq-kayninwanmi qhapaqyaykurqanku, kunantaq ñawi ch'ipiq-niyllapi purunyarqapun, nispa.

²⁰Qan ichaqa, hanaq pacha, kusikuy, Diosllapaqña kawsaqkuna, apostolkuna*f**, profetakuna*f** kusikuychis, chay hinata muchuchispa Diosqa chanintapuni ruwapusqasuykichisrayku.

²¹Hinaqtinmi huk kallpasapa angelqa huk rumita molino hatun rumita hina hoqarispa mama qochaman wikch'uykuspa nirqan: Yaw hatun Babilonia llaqta, chay hina hatun sinchi kallpawanmi thunisqa kanki, manataqmi hayk'aqpas rikhurinkiñachu.

²²Manañan hayk'aqpas calleykikunapi arpa tocaypas, qena tocaypas, trompeta tocaypas uyarikunqañachu, manataq ima artesanokunapas qanpi kanqañachu, manallataqmi molinoq kutasqan kunrururuypas qanpi uyarikunqañachu.

²³Lámpara k'anchaypas manan astawan qanpi k'anchanqañachu, casarakuy fiestakunapi kusikuykunapas manañan kanqañachu. Qhatuqniykikunaqa kay pachapi qhapaqkunan karqanku, layqakusqaykikunawanmi llapa runakunata q'oturqanki.

²⁴Qanpin profetakunaq*f**, Diosllapaqña kawsaqkunaq yawarninpas, kay pachapi llapa wañuchisqakunaq yawarninpas tarisqa karqan, nispa.