Read Quechua Cuzco Bible 1988 APOCALIPSIS 19 Bible Online

APOCALIPSIS 19 - Quechua Cuzco Bible 1988 bible

APOCALIPSIS 19

¹Chaykuna qhepatataq hanaq pachapi sinchi askha runaq kunkayoqta rimasqanta hina uyarirqani: ¡Yupaychasqa Señor Diosqa kachun! Qespichiypas, yupaychaypas, atiypas Diosninchispan,

²juzgasqankunapas cheqaqmi, chanintaqmi. Qhellipi puriyninwan kay pachata waqllichiq chay sinchi rabona warmitan payqa huchacharqan. Diosqa kamachinkunata wañuchisqanmantan aynita kutichirqan, nispa nishaqta.

³Huktawanmi kunkayoqta nirqanku: ¡Yupaychasqa Señor Diosqa kachun! Babilonia llaqtaqa wiñay-wiñaypaqmi q'osñishallanqapuni, nispa.

⁴Hinaqtinmi iskay chunka tawayoq kurak runakunaqa tawa kawsashaqkunapiwan pampakama k'umuykukuspa kamachikuy tiyanapi tiyashaq Diosta hatuncharqanku: ¡Ahinapuni kachun! ¡Yupaychasqa Señor Diosqa kachun! nispa.

⁵Hinan huk kunka kamachikuy tiyanamanta nimurqan: Diosninchista yupaychaychis, llapan kamachinkuna Diosta manchakuqkuna, yupaychaychis, huch'uykunapas hatunkunapas, nispa.

⁶Hinallataq uyarirqani sinchi askha runaq qaparisqanta hina, askha unuq phaqchasqanta hina, sinchi t'oqyaypa kunununusqanta hina. Nimurqankutaqmi: ¡Yupaychasqa Señor Diosqa kachun! ¡Tukuy-atiyniyoq Señor Diosninchismi kamachikushanña!

⁷Kusikusunchis, q'ochukusunchis, payta hatunchasunchis, Corderoq casarakuyninmi chayamunña, novianpas wakichikamunñan,

⁸noviamanqa ch'uya k'ancharishaq sumaq lino p'achan qosqa karqan p'achakunanpaq, nispa. Chay sumaq linoqa Diosllapaqña kawsaqkunaq chanin ruwasqankunan.

⁹Hinaqtinmi angelqa niwarqan: Kayta qelqay: Kusisamiyoqmi Corderoq casarakuynin mikhuyman waqyasqakunaqa, nispa. Nillawarqantaqmi: Chaykunaqa Diospa cheqaq siminkunan, nispa.

¹⁰Hinan ñoqaqa angelpa ñawpaqenman qonqoriykukurqani payta yupaychanaypaq, chaymi angelqa niwarqan: Ama qonqorikuwaychu, ñoqaqa kamachi-masiykin kani, Jesuspa willasqanpi sayaq iñiq-masiykikuna hinallan kani, Diostan yupaychanaykiqa. Jesuspa willasqanta hinapunin profetakunapas*f** willakullantaq, nispa.

¹¹Chaymantataq hanaq pachata kicharisqata rikurqani, hinan yuraq caballo rikhurimurqan, chaypi sillakuqpa sutinqa Hunt'aqkaq cheqaqkaq nisqan kasqa. Paymi chanin-kayman hina juzganpas maqanakunpas.

¹²Ñawinqa rawrashaq nina hinan kasqa, umanpitaq askha coronakuna kasqa. Paypin huk suti qelqasqa kasqa, chaytan mana pipas reqsinchu, aswanpas pay kikillanmi reqsin.

¹³Yawarkama p'achawan p'achasqan kasqa, sutinpas Diospa Simin nisqan kasqa.

¹⁴Hinaqtinmi hanaq pacha ejercitokunaqa yuraq caballokunapi sillaykusqa paypa qhepanta rishasqaku yuraq sumaq ch'uya linomanta p'achayoqkama.

¹⁵Siminmantan iskay ladon filoyoq espada lloqsimushasqa, suyukunata chaywan atipananpaq. Paymi fierro varawan suyukunata kamachinqa. Paymi uvas sarunata saruq hina Tukuy-atiyniyoq Diospa k'arak phiñakuyninwan muchuchinqa.

¹⁶P'achanpipas phakanpipas kay sutin qelqasqa kasqa: Reykunaq Reynin, señorkunaqpas Señornin nisqa.

¹⁷Chaymantataq huk angelta intipi sayashaqta rikurqani, paymi phalashaq llapan animalkunata kunkayoqta waqyarqan: Hamuychis, huñukuychis Diospa hatun mikhuy wakichisqanman, hinaspan mikhunkichis,

¹⁸reykunaq aychanta, soldado umallikunaq aychanta, allin qhari runakunaq aychanta, caballokunaq aychanta, caballopi sillakuqkunaq aychanta, llapallan runakunaq aychanta, kamachikunaqpas mana kamachikunaqpas kachun, huch'uykunaqpas, hatunkunaqpas kachun, nispa.

¹⁹Chay qhepatataq manchay wak'a animalta kay pacha reykunata, ejercitontintakama rikurqani. Paykunan huñukurqanku caballopi sillaykusqa kashaqwan llapa soldadonkunawan ima maqanakunankupaq.

²⁰Hinan chay manchay wak'a animalqa preso hap'isqa karqan, paywan kuskataq chay llulla profetapas*f** hap'isqa karqan, paymi wak'a animalpa ñawpaqenpi señalkunata ruwasqa. Chay señalkunawanmi wak'a animalpa marcanwan marcasqakunatapas, rikch'ayninta yupaychaqkunatapas q'otusqa. Chaymi wak'a animalpas llulla profetapas*f** kawsashaqlla azufrewan rawrashaq nina qochaman wikch'uykusqa karqanku.

²¹Wakintaq caballopi sillakuqpa siminmanta lloqsimuq espadawan wañuchisqa karqanku, chaymi llapa phalaq animalkuna paykunaq aychankuwan saksaykurqanku.