Read Quechua Cuzco Bible 1988 APOCALIPSIS 2 Bible Online

APOCALIPSIS 2 - Quechua Cuzco Bible 1988 bible

APOCALIPSIS 2

¹Efeso llaqtapi iñiq t'aqaq angelninman qelqay: Ñoqa paña makiypi qanchis qoyllurkunata hap'iqmi, qanchis qori candelero chawpipi puriqmi kay hinata niyki:

²Yachanin lliw ruwasqaykikunata, sinchi llank'asqaykikunata, pacienciasqaykitapas. Yachallanitaqmi mana allinkaqtaqa mana hinallatachu qhawaq kasqaykita, mana apóstol*f** kashaspa “apostolmi*f** kayku” niqkunata probaspa llulla kasqankuta hap'isqaykitapas.

³Qanqa muchurqankin, pacienciarqankin, mana sayk'uspan ñoqarayku sinchita llank'arqanki.

⁴Chaywanpas kashanmi contraykipi: Manañan ñawpaq hinachu munakuwanki.

⁵Chay hinaqa, yuyariy manaraq urmashaspayki imaynachus kasqaykita, hinaspa huchaykikunata saqepuspa Diosman kutirikuspayki ñawpaqkaq ruwasqaykikunata ruway. Manapuni Diosman kutirikuqtiykiqa usqhayllan qanman hamusaq, hinaspa candeleroykita maypichus kashasqanmanta wikch'usaq.

⁶Chaywanpas, kashanmi qanpa allinniykipaq: Nicolaita*f** nisqa runakunaq ruwasqankuta cheqnikusqayki, chaykunatan ñoqapas cheqnikullanitaq, nispa.

⁷Ninriyoqqa iñiq t'aqakunaman Santo Espirituq nisqanta uyarichun. Atipaqmanmi kawsachiq sach'amanta mikhuchisaq, chay sach'an Diospa paraisonpi kashan, nispa.

⁸Esmirna llaqtapi iñiq t'aqaq angelninman qelqay: Ñoqa ñawpaq kaqmi, qhepa kaqmi, wañusqaymanta kawsarimpuqmi kay hinata niyki:

⁹Yachanin sasachakuykunapi ñak'arisqaykita, wakcha kasqaykitapas, ichaqa qhapaqmi kashanki. Yachallanitaqmi mana Judío runa kashaspa “Judío runan kayku” nispa ñakasqasuykitapas, chaykunaqa Satanaspa huñukuy t'aqanmi kanku.

¹⁰Ñak'arinaykimantaqa ama manchakuychu. Saqran wakinniykichista carcelman churachisunkichis, probasqa kanaykichispaq, hinaspan chunka p'unchayta ñak'arinkichis. Qanqa ñoqapaq hunt'aqllapuni kay wañunaykiña kaqtinpas, ñoqataq wiñay kawsayta coronata hina qosqayki, nispa.

¹¹Ninriyoqqa iñiq t'aqakunaman Santo Espirituq nisqanta uyarichun. Atipaqtaqa manan imananqapaschu iskaykaq wañuyqa, nispa.

¹²Pérgamo llaqtapi iñiq t'aqaq angelninman qelqay: Ñoqa iskay ladon filo espadayoqmi kay hinata niyki:

¹³Yachanin maypichus tiyasqaykita. Qanqa tiyanki Satanaspa kamachikusqan cheqaspin, chaywanpas hunt'aqllapunin sutiypi hap'ipakushanki. Ñoqapi iñiyniykitaqa manapunin saqerqankichu, qankuna ukhupi kaq hunt'aq testigoy Antipastaña Satanaspa tiyasqanpi wañuchishaqtinkupas.

¹⁴Chaywanpas kanpunin contraykipiqa: Wakinniykichismi Balaampa yachachikuyninta ruwashankichis. Chay Balaanmi Balakta yachachirqan Israel runakunata huchaman urmachiyta, idolokunaman sacrificio haywasqata mikhunankupaq, wasanchay huchata ruwanankupaqwan.

¹⁵Hinallataq wakinniykichispas Nicolaita*f** nisqa runakunaq yachachikuyninta ruwashankichis.

¹⁶Chay hinaqa, huchaykita saqepuspa Diosman kutirikuy, mana chayqa usqhayllan hamusqayki, hinaspan simiymanta lloqsimuq espadawan chay runakuna contra maqanakusaq, nispa.

¹⁷Ninriyoqqa iñiq t'aqakunaman Santo Espirituq nisqanta uyarichun. Atipaqmanqa pakasqa manna nisqa t'antatan mikhuchisaq, hinallataq huch'uy rumichata qosaq, chay rumichapin mosoq suti qelqasqa kanqa, chaytan mana pipas reqsinchu, aswanpas chayta chaskiqllan, nispa.

¹⁸Tiatira llaqtapi iñiq t'aqaq angelninman qelqay: Ñoqa rawrashaq nina ñawiyoq, chakinpas k'anchashaq bronceman rikch'akuq Diospa Churinmi kay hinata niyki:

¹⁹Yachanin ruwasqaykikunatapas, munakuyniykitapas, iñiyniykitapas, llank'asqaykitapas, pacienciasqaykitapas. Yachallanitaqmi ñawpaqkaq ruwasqaykimantaqa kunan astawan ruwashasqaykitapas.

²⁰Chaywanpas kashanmi contraykipi: Qanqa “profetisan kani” niq chay Jezabel warmitan hinallata qhawashanki, payqa kamachiykunatan yachachikuyninwa q'otun, chaymi paykunaqa wasanchay huchapi purinku, idolokunaman sacrificio haywasqakunatapas mikhunku.

²¹Ñoqaqa chay warmiq Diosman kutirikunanpaq tiempota qorqanin, ichaqa manan chay wasanchay huchapi puriyninta saqeyta munarqanchu.

²²Kunanmi Jezabelta sinchitapuni onqochisaq, hinallataq paywan wasanchaqkunatapas sinchita ñak'arichisaq, manachus chay millay ruwasqankumanta Diosman kutirikunqaku chayqa.

²³Wawankunatapas wañurqarichisaqmi, hinan llapa iñiq t'aqakuna yachanqaku sonqokunatapas, yuyaytapas t'aqwiq kasqayta. Sapankaykichistataq ruwasqaykichisman hina muchuchisqaykichis.

²⁴Tiatira llaqtapi wakinniykichismantaqmi nimuykichis: Qankunaqa manan chay Jezabelpa yachachikuyninta chaskirqankichischu, “Satanaspa pakasqa yachayninkuna” nisqankutapas manan reqsirqankichischu. Chay hinaqa, imatachus yachasqaykichispi qaqata sayaychis kutimunaykama, qankunamanqa manan wak sasa ruwaytachu kamachirqaykichis.

²⁶Pipas atipanman, hinaspa ñoqaq munasqay ruwaykunata tukukuykama hunt'anman chayqa, ñoqan payman atiyta qosaq suyukunata kamachinanpaq,

²⁷imaynan ñoqamanpas Yayay atiyta qowarqan hinata, hinaspan fierro varawan paykunata kamachinqa, t'uru manka hinataq ñut'u p'akisqa kanqaku.

²⁸Paymanqa qollasaqtaqmi pacha paqariy ch'askatapas, nispa.

²⁹Ninriyoqqa iñiq t'aqakunaman Santo Espirituq nisqanta uyarichun, nispa.