Read Quechua Cuzco Bible 1988 APOCALIPSIS 20 Bible Online

APOCALIPSIS 20 - Quechua Cuzco Bible 1988 bible

APOCALIPSIS 20

¹Chaymantataq huk angelta hanaq pachamanta uraykamushaqta rikurqani, chinkay-chinkay ukhu llaveyoqta hatun cadena apayoqta ima.

²Hinan chay angelqa dragonta*f** hap'ispa waranqa watapaq watarqorqan. Chay dragonmi*f** ñawpa mach'aqwaypas, saqrapas, Satanaspas.

³Chinkay-chinkay ukhumantaq payta wikch'uykuspa wisq'aykurqan, hinaspa wisq'ana patapi ama kichanapaq marcaykurqan, amaña astawan suyukunata q'otunanpaq waranqa wata hunt'akunankama. Chay tiempo hunt'akuqtinñan pisi tiempolla kacharisqa kanqa.

⁴Hinallataq rikurqani tiyanakunata, chaykunapitaq juzgananpaq kaqkuna tiyashaqta. Rikullarqanitaqmi Jesusmanta willakusqanku hawa, Diospa siminta willasqanku hawa uman qhorusqakunaq almankunatapas. Paykunan manchay wak'a animaltapas rikch'aynintapas mana yupaychasqakuchu, hinallataq mat'inkupipas, makinkupipas mana marcachikusqakuchu. Paykunan kawsarimpurqanku, hinaspan waranqa watata Cristowan kamachikurqanku.

⁵Chaymi ñawpaqkaq kawsarimpuyqa. Wakin wañusqakunataq ichaqa mana kawsarimpurqankuchu waranqa wata hunt'akunankama.

⁶Ñawpaqkaq kawsarimpuypi kawsarimpuqqa kusisamiyoqmi ch'uyataqmi. Iskaykaq wañuyqa manan paykunataqa imananqapaschu, aswanpas Diospa sacerdotenkunan Cristoq sacerdotenkunan kanqaku, Cristowantaqmi waranqa watata kamachikunqaku.

⁷Chay waranqa wata hunt'akuqtintaqmi saqraqa preso kasqanmanta kacharisqa kanqa.

⁸Hinan payqa lloqsinqa kay pachantinpi kaq llapan suyukunata q'otunanpaq. Chay suyukunaqa Gogwan Magogwanmi. Saqran paykunata, q'otuspa huñuykunqa hatun awqa-tinkuyman, mama qocha patapi aqo hina sinchi askhata.

⁹Kay pachaq anchonmanmi wicharimurqanku, hinaspan Diosllapaqña kawsaqkunaq tiyasqanta, Diospa munasqan llaqtatawan muyuykurqanku. Ichaqa Diosmi hanaq pachamanta ninata parachimurqan, chaymi awqakunata rupharparirqan.

¹⁰Paykunata q'otorqan chay saqrataq azufreyoq nina qochaman wikch'uykusqa karqan, maymanchus, manchay wak'a animalpas, llulla profetapas*f** wikch'uykusqa karqan chayllamantaq. Chaypin tuta-p'unchay wiñay-wiñaypaq ñak'arichisqa kanqaku.

¹¹Yuraq hatun tiyanatan chaypi tiyashaqtawan rikurqani, paypa qayllanmantan kay pachapas hanaq pachapas ayqerqan, chaymi manaña yupillankupas karqanñachu.

¹²Chaymantataq wañusqankumanta kawsarimpuqkunata rikurqani hatunkunatapas huch'uykunatapas Diospa ñawpaqenpi sayashaqta. Hinamantataq qelqakuna kicharisqa karqan, wak qelqapas kicharisqallataq karqan, chaymi kawsay qelqa. Wañusqankumanta kawsarimpuqkunaqa maychus ruwasqankuman hinan juzgasqa karqanku, qelqakunapi qelqasqa kasqanman hina.

¹³Mama qochapas chaypi wañusqa kaqkunata entregarqan, hinallataq Wañuypas Ukhu-pachapas paykunapi wañusqa kaqkunata entregarqan, hinaspan maychus ruwasqankuman hina sapanka juzgasqa karqanku.

¹⁴Chaymantataq Wañuypas Ukhu-pachapas nina qochaman wikch'uykusqa karqanku. Chay nina qochan iskaykaq wañuyqa.

¹⁵Pipas kawsay qelqapi sutin qelqasqa mana tarisqataq, nina qochaman wikch'uykusqa karqan.