Read Quechua Cuzco Bible 1988 APOCALIPSIS 21 Bible Online

APOCALIPSIS 21 - Quechua Cuzco Bible 1988 bible

APOCALIPSIS 21

¹Chaymantataq mosoq hanaq pachata mosoq hallp'a pachatawan rikurqani, ñawpaqkaq hanaq pachawan ñawpaqkaq hallp'a pachawanqa manan kapusqañachu, mama qochapas manan kapusqañachu.

²Ñoqan rikurqani Diospa mosoq ch'uya Jerusalén llaqtanta Diospa qayllan hanaq pachamanta uraykamushaqta, casarakuq-masin waynapaq sumaq k'acha p'achasqa sipasta hina.

³Hinan kamachikuy tiyanamanta kunkayoq rimaqta uyarirqani: Kunanqa runakuna ukhupin Diosqa tiyan, paykunawantaqmi tiyanqapas. Paykunan llaqtan kanqaku, kikin Diostaqmi paykunawan kashanqa, Diosninkutaq kanqapas.

⁴Diosmi paykunaq ñawinmanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku, nispa nishaqta.

⁵Kamachikuy tiyanapi tiyashaqtaq nirqan: Qhawariy, ñoqan lliw imaymanata mosoqta ruwani, nispa. Hinaspan niwarqan: Chay simikunata qelqay, chay simikunaqa cheqaqmi, hap'ipakunapaq hinataqmi kanpas, nispa.

⁶Chaymanta nillawarqantaq: Chaykunaqa tukusqañan. Ñoqan kani ñawpaq kaqpas qhepa kaqpas[2], qallariypas tukukuypas. Pipas ch'akichikuqmanqa kawsachiq unu pukyumantan yanqalla ukyachisaq.

⁷Atipaqkunamanqa tukuy chaykunatan herenciata hina qosaq. Ñoqan Diosninku kasaq, paykunataq wawaykuna kanqaku.

⁸Ichaqa manchapakuqkuna, mana iñiqkuna, mana p'enqakuqkuna, runa wañuchiqkuna, qhellipi puriqkuna, layqakuna, idolokunata yupaychaqkuna, llapa llullakunapiwan ninawan azufrewan rawrashaq qochaman wikch'uykusqa kanqaku. Chaymi iskaykaq wañuyqa, nispa.

⁹Chaymantataq qanchis angelkunamanta huknin hamuwarqan. Chay angelkunan qhepakaq qanchis manchay ñak'arichiywan hunt'a hatun p'ukuyoqkama kasqaku. Paymi niwarqan: Hamuy kayman, ñoqan rikuchisqayki casarakuq-masin sipasta, Corderoq esposanta, nispa.

¹⁰Hinaspan Santo Espirituq kallpachasqan kashaqtiy angelqa hatun alto orqoman pusawarqan, chaymantan ch'uya Jerusalén llaqtata rikuchiwarqan Diospa qayllan hanaq pachamanta uraykamushaqta.

¹¹Chay llaqtan Diospa lliphlli-kayninwan k'anchashasqa, lliphipipiyninpas ancha chaniyoq umiñaq hina kasqa, tunti-q'omer umiña qespi hina sut'i illaqtaq kasqa.

¹²Llaqtataq hatun alto perqawan muyuykusqa kasqa, chay perqan chunka iskayniyoq punkuyoq kasqa, sapanka punkupitaq huk ángel kasqa. Hinallataq chay punkukunapi chunka iskayniyoq Israel ayllukunaq sutin qelqasqa kasqa.

¹³Inti lloqsimuy ladopin kinsa punku kasqa, wichay ladopin kinsa punku kasqa, inti chinkaykuy ladopin kinsa punku kasqa, uray ladopitaq kinsa punku kasqa.

¹⁴Llaqta muyuriq perqataq chunka iskayniyoq rumimanta teqsiyoq kasqa, chaykunapitaq Corderoq apostolninkunaq*f** sutin qelqasqa kasqa.

¹⁵Ñoqawan rimaq angeltaq qori soqos tupunayoq kasqa, llaqtata, punkunkunata, perqantawan tupunanpaq.

¹⁶Chay llaqtaqa tawa esquinayoqmi kasqa, wask'anwanpas anchonwanpas sayaypuran kasqa. Angelmi llaqtata tupurqan qori soqoswan, chaymi iskay waranqa iskay pachakniyoq kilómetro karqan, llaqtaq sayayninpas, wask'anpas, anchonpas sayaypurakaman karqan.

¹⁷Hinallataq llaqta perqata tupurqan soqta chunka phisqayoq metrota. Angelqa runakunaq tupunanwanmi tupusharqan.

¹⁸Llaqta muyuriq perqaqa tunti-q'omer umiñamanta ruwasqan kasqa, llaqtataq ichaqa ch'uya qorimanta kasqa llusk'achasqa qespiman rikch'akuq.

¹⁹Llaqta muyuriq perqa teqsikunaqa tukuy imaymana sumaq umiña rumikunawan sumaqchasqan kasqa. Ñawpaqkaq teqsin kasqa tunti-q'omer umiñamanta, iskaykaqtaq yana azul umiñamanta, kinsakaqtaq wachu-wachu colorniyoq umiñamanta, tawakaqtaq q'omer qespi umiñamanta,

²⁰phisqakaqtaq pukayoq-yuraq umiñamanta, soqtakaqtaq nina-q'ellu umiñamanta, qanchiskaqtaq qori-q'ellu umiñamanta, pusaqkaqtaq anqas-q'omer umiñamanta, isqonkaqtaq q'ellu-q'omer umiñamanta, chunkakaqtaq q'omerman-samaq umiñamanta, chunka hukniyoqkaqtaq pukaman-samaq q'ellu umiñamanta, chunka iskayniyoqkaqtaq sani-puka umiñamanta.

²¹Chunka iskayniyoq punkukunaqa chunka iskayniyoq perlakunan kasqa, sut'i illaq qespi hina.

²²Chay llaqtapiqa manan Dios yupaychana wasita rikurqanichu, Tukuy-atiyniyoq Señor Diosmi Corderopiwan yupaychana wasiqa.

²³Chay llaqtaqa manan necesitanchu intitapas killatapas k'anchananpaq, Diospa lliphipiyninmi chay llaqtataqa k'anchan, Corderotaqmi k'anchaqninpas.

²⁴Chaymi suyukunaqa chay k'anchaypi purinqaku, kay pacha reykunataq ancha qhapaq-kayninkuta llaqtaman apanqaku.

²⁵Punkunkunaqa manan hayk'aqpas p'unchaypi wisq'akunqachu, manan chaypiqa tutapas kanqañachu.

²⁶Chaymanmi suyukunaqa apanqaku qhapaq-kayninkuta yupaychayninkutawan.

²⁷Chay llaqtamanqa manan haykunqachu ima qhellipas, millay mana chanin ruwaqpas, llullakuqpas, aswanpas haykunqa Corderoq kawsay libronpi sutin qelqasqa kaqkunallan.