Read Quechua Cuzco Bible 1988 APOCALIPSIS 22 Bible Online

APOCALIPSIS 22 - Quechua Cuzco Bible 1988 bible

APOCALIPSIS 22

¹Chaymantataq angelqa kawsachiq unuyoq mayuta rikuchiwarqan. Chaymi kasqa qespi hina sut'i illashaq, lloqsimushasqataq Diospa kamachikuy tiyananmanta Corderoq kamachikuy tiyananmantawan,

²llaqta hatun calle chawpinta. Mayuq ladopuranpitaq kawsachiq sach'a kashasqa, chay sach'an sapa killa ruruspa, chunka iskayniyoq kutita watapi rurusqa. Raphinkunataq suyukunaq qhaliyananpaq kasqa.

³Chay llaqtapiqa manañan ima ñakaypas kanqañachu, chaypin Diospapas Corderoqpas kamachikuy tiyanan kashanqa, kamachinkunan payta yupaychanqaku.

⁴Uyantan rikunqaku, mat'inkupitaq sutinpas kashanqa.

⁵Chaypiqa manan tutapas kanqañachu, manan lámpara k'anchaytapas inti k'anchaytapas necesitanqakuñachu. Señor Diosmi paykunataqa k'anchanqa, wiñay-wiñaypaqtaqmi kamachikunqaku.

⁶Chaymantataq angelqa niwarqan: Chay simikunaqa cheqaqmi, hap'ipakunapaq hinataqmi kanpas. Profetakunata*f** yuyaychaq Señor Diosmi angelninta kachamurqan yaqaña sucedenan kashaqkunata kamachinkunaman rikuchinanpaq, nispa.

⁷Jesucriston nin: ¡Yaqañan hamusaq! ¡Kusisamiyoqmi kay qelqapi profetizasqa simikunata kasukuqqa! nispa.

⁸Ñoqa Juanmi chaykunataqa rikurqanipas uyarirqanipas. Chaymi uyarispayña rikuspayña chaykunata rikuchiwaqniy angelpa ñawpaqenpi qonqoriykukurqani payta yupaychanaypaq.

⁹Angeltaq ichaqa niwarqan: ¡Ama qonqorikuwaychu! Ñoqaqa kamachi-masiykin kani, wawqeyki profetakuna*f** hina, kay qelqapi qelqasqa simikunata kasukuq llapa runakuna hinallan kani. Diosta yupaychay, nispa.

¹⁰Nillawarqantaqmi: Kay qelqapi profetizasqa simikunataqa ama pakallapi hap'iychu, hunt'akunan tiempo qayllaykamushasqan hawa.

¹¹Mana chanin ruwaqqa hinalla mana chaninta ruwashachun, millay kawsaqpas hinalla millayta kawsashachun, chanin runa ichaqa chanillantapuni kawsashachun, Diosllapaqña kawsaq runapas Diosllapaqpuni kawsashachun, nispa.

¹²Jesucriston nin: ¡Yaqañan hamusaq! Pagapunaykunatan apamusaq maychus ruwasqankuman hina sapankaman qonaypaq.

¹³Ñoqan kani Alfapas Omegapas*f**, ñawpaq kaqpas qhepa kaqpas, qallariypas tukukuypas.

¹⁴Kusisamiyoqmi t'aqsasqa p'achayoqkunaqa. Paykunaqa atinkun punkunkunata llaqtaman haykuyta hinaspa kawsachiq sach'amanta mikhuyta.

¹⁵Ichaqa alqo hina kawsaqkunan, layqakunan, qhellipi puriqkunan, runa wañuchiqkunan, idolokunata yupaychaqkunan, llullakuyta munaspa llullakuqkunapiwanmi hawapi qhepanqaku.

¹⁶Ñoqa Jesusmi angelniyta kachamurqani chaykunata iñiq t'aqakunaman willanasuykichispaq. Ñoqan kani Davidmanta paqarimuq miraypas pacha paqariy lliphipipiq ch'askapas, nispa.

¹⁷Santo Espirituwan Corderoq esposanwanmi ninku: ¡Hamuy! nispa. Pipas uyariqqa nichun: ¡Hamuy! nispa. Pipas ch'akichikuqqa hamuchun, kawsachiq unuta ukyay munaqqa yanqalla ukyachun.

¹⁸Kay qelqapi llapallan profetizasqa simikunata uyariqkunatan ñoqa anyani: Pipas kay qelqaman yapaykunman chayqa, Diosmi payman yapanqa kaypi qelqasqa kaq manchay ñak'arichiykunata.

¹⁹Pipas kay qelqapi profetizasqa simikunamanta horqonman chayqa, Diosmi kawsachiq sach'amanta ch'uya llaqtamantawan tupaqninta qechunqa, nispa. Kay qelqapin sach'amantapas llaqtamantapas qelqasqa kashan.

²⁰Chaykunata willakuqmi nin: Cheqaqtapunin yaqaña hamusaq, nispa. Arí, ahinapuni kachun. ¡Hamuy, Señor Jesús!

²¹Señor Jesusmi llapaykichista sumaqta qhawarisunkichis.