Read Quechua Cuzco Bible 1988 APOCALIPSIS 3 Bible Online

APOCALIPSIS 3 - Quechua Cuzco Bible 1988 bible

APOCALIPSIS 3

¹Sardis llaqtapi iñiq t'aqaq angelninman qelqay: Ñoqa qanchis espiritukunata, qanchis qoyllurkunatawan hap'iqmi kay hinata niyki: Yachanin ruwasqaykikunata, hinallataq kawsashaq hina rikusqa kashaspapas wañusqa kashasqaykita.

²Rikch'ariy, hinaspa wañupushanña chay qhepaqkunata kallpachay. Diospa ñawpaqenpi ruwasqaykikunataqa manan allin hunt'asqatachu tarini.

³Chay hinaqa, yuyariy chaskisqaykita uyarisqaykitawan, hinaspa chayman hina kawsay, huchaykikunata saqepuspataq Diosman kutirikuy. Manachus rikch'anki chayqa, suwa hinan hamusqayki, manataq yachankichu ima horatachus qanman hamunayta.

⁴Chaywanpas Sardis llaqtapin pisilla kashankichis p'achaykichista mana qhellichaqkuna, qankunan yuraq p'achayoq ñoqawan purinkichis, chaypaq hina kasqaykichisrayku.

⁵Atipaqqa yuraq p'achawan p'achasqan kanqa, sutintapas manan kawsay qelqamanta horqosaqchu, aswanpas Yayaypa ñawpaqenpin angelninkunaq qayllanpiwan “payqa ñoqaqmi” nisaq.

⁶Ninriyoqqa iñiq t'aqakunaman Espirituq nisqanta uyarichun, nispa.

⁷Filadelfia llaqtapi iñiq t'aqaq angelninman qelqay: Ñoqa ch'uyakaqmi, cheqaqkaqmi, Davidpa ayllunpi atiyniyoqmi, llave hap'iq hina kay hinata niyki: Punkuta kichaqtiyqa manan pipas wisq'anmanchu, punkuta wisq'aqtiypas manan pipas kichanmanchu. Yachanin ruwasqaykikunata.

⁸Qhawariy, ñawpaqeykipin punkuta kicharipuyki, chaytaqa manan pipas wisq'ayta atinmanchu. Pisi kallpaña kashaspaykipas simiytaqa kasuwarqankin, manataqmi ñoqatapas negawarqankichu.

⁹Satanaspa huñukuy t'aqanmanta kaqkunatan kachamusqayki. Paykunan llullakuspanku mana Judío runa kashaspa “Judío runan kayku” ninku. Paykunatan ñawpaqeykipi qonqorichisaq qanta munakushasqayta yachanankupaq.

¹⁰Pacienciakunaykipaq kamachisqaytan kasuwarqanki, chaymi ñoqapas kay pachantinman hamuq ñak'ariypi waqaychasqayki, chay ñak'ariymi hamunqa kay pachapi llapa runakunata probananpaq.

¹¹Ñoqaqa yaqañan hamusaq, imatachus yachasqaykipi qaqata sayay, ama pipas premioykita qechunasuykipaq.

¹²Pipas atipaqtaqa Diosniypa wasinpin tusata hina churasaq, manataq hayk'apas chaymanta lloqsinqañachu. Diosniypa sutintan paypi qelqasaq, Diosniypa llaqtanpa sutintawan, chay llaqtan hanaq pachamanta Diosniymanta uraykamuq mosoq Jerusalén, hinallataq mosoq sutiytapas paypi qelqasaq, nispa.

¹³Ninriyoqqa iñiq t'aqakunaman Santo Espirituq nisqanta uyarichun, nispa.

¹⁴Laodicea llaqtapi iñiq t'aqaq angelninman qelqay: Ñoqa cheqaqkaqmi, cheqaq rimaq hunt'aq testigon, Diospa kamasqanpi Qollanan kay hinata niyki:

¹⁵Yachanin ruwasqaykikunata, manataq chiri manataq rupha kasqaykitapas. ¡Allinmi kanman, ruphapas mana chayqa chiripas kawaq chayqa!

¹⁶Manataq chiri manataq rupha kaspayki, as q'oñilla kasqaykiraykun simiymanta aqturparisqayki.

¹⁷Qanqa ninkin: Ñoqaqa qhapaqmi kani, tukuy imapas allinkaman kawan, manan imapas pisiwanchu, nispa. Ichaqa manan reparakunkichu, huk khuyapayana, mana imayoq, wakcha, ñawsa, q'alalla kashasqaykita.

¹⁸Chaymi ñoqa yuyaychayki, ninapi ch'uyanchasqa qorita rantikuwanaykipaq, cheqaqtapuni qhapaq kanaykipaq, hinallataq yuraq p'achata rantikuwaspayki p'achakunaykipaq, q'ala-kayniykita pakaykunaykipaq, rikunaykipaqtaq ñawi sut'uchina hampiwan ñawiykita sut'uchikunaykipaq.

¹⁹Ñoqaqa llapa munakusqaykunatan anyaykunipas wanachinipas. Chay hinaqa, tukuy sonqo kallpachakuy, huchaykikunata saqepuspataq Diosman kutirikuy.

²⁰Qhawarimuway, ñoqaqa punkuta takaspan waqyamushayki. Pipas kunkayta uyarispa punkuta kicharimunqa chayqa, wasinmanmi haykusaq, hinaspan paywan kuska mikhusaqku.

²¹Atipaqtaqa ñoqawan kuskatan kamachikunay tiyanaypi tiyachisaq, imaynan ñoqapas atiparqani hinaspa Yayaywan kamachikunan tiyananpi tiyaykurqani hinata, nispa.

²²Ninriyoqqa iñiq t'aqakunaman Santo Espirituq nisqanta uyarichun, nispa.