Read Quechua Cuzco Bible 1988 APOCALIPSIS 4 Bible Online

APOCALIPSIS 4 - Quechua Cuzco Bible 1988 bible

APOCALIPSIS 4

¹Chaykuna qhepata qhawarispataq hanaq pachapi punku kicharayashaqta rikurqani, hinaspa cornetaq waqayninman rikch'akuq kunkata ñawpaq uyarirqani chay kunka nimuwarqan: Kayman wicharimuy, kaykuna qhepata imakunachus kanqa chaykunatan ñoqa rikuchisqayki, nispa.

²Chay ratopachan Santo Espirituq kallpachasqan kapushasqani, hinaspan hanaq pachapi kamachikuy tiyana churasqata rikurqani, chay tiyanapitaq huk tiyashaqta.

³Chay tiyashaqtaq tunti-q'omer umiñaman nina-q'ellu umiñaman rikch'akuq k'anchashaq kasqa. Tiyanaq muyuriqnintaq huk k'uychi hina kasqa, q'omer qespi umiñaman rikch'akuq k'anchashaq.

⁴Chay tiyanaq muyuriqninpitaq iskay chunka tawayoq tiyanakunata rikurqani, chaykunapitaq iskay chunka tawayoq kurak runakuna tiyashasqa, yuraq p'achayoq qori coronayoq.

⁵Tiyanamantan lloqsimushasqa illapakuna, chikchi t'oqyaykuna, kunununuykuna ima, tiyanaq ñawpaqenpitaq qanchis nina k'anchaykuna rawrashasqa, chaykunan karqan Diospa qanchis espiritunkuna.

⁶Tiyanaq ñawpaqenpin kasqa illashaq qespi mama qochaman rikch'akuq. Tiyanaq ñawpaqenpi muyuriqninpiwantaq tawa kawsashaqkuna kashasqa, ñawpaqenkupipas qhepankupipas ñawikunawan hunt'aykusqa.

⁷Ñawpaqkaq kawsashaqmi rikch'akusqa leonman, iskaykaqmi toroman, kinsakaqmi runa uyayoq hina kasqa, tawakaqtaq phalashaq ankaman rikch'akusqa.

⁸Chay tawantin kawsashaqkunaqa sapankankun soqta raphrayoq kasqaku, muyuriqninkupipas raphranku ukhupiwanpas ñawikunawan hunt'aykusqa. Mana samaykuspan tuta-p'unchay nisharqanku: Ch'uyay-ch'uyapunin Tukuy-atiyniyoq Diosqa, paymi ñawpa kaqpas, kunan kaqpas, qhepaman kaqpas, nispa.

⁹Chay kawsashaqkunan tiyanapi tiyashaq wiñay-wiñaypaq kawsaqta hatuncharqanku, yupaycharqanku, hinallataq graciasta qorqanku. Sapa kuti chayta ruwaqtinkun,

¹⁰chay iskay chunka tawayoq kurak runakunaqa k'umuykukuspa tiyanapi tiyashaq wiñay-wiñaypaq kawsaqta yupaycharqanku, tiyanaq ñawpaqenman coronankuta churaykuspataq nirqanku:

¹¹Qanqa Señor Diosniyku, hatunchaytapas, yupaychaytapas, atiytapas chaskinaykipaq hinapunin kanki, tukuy imaymanata qan kamasqaykirayku, chaymi munayniykiwan kashankupas, kamasqapas karqanku, nispa.