Read Quechua Cuzco Bible 1988 APOCALIPSIS 5 Bible Online

APOCALIPSIS 5 - Quechua Cuzco Bible 1988 bible

APOCALIPSIS 5

¹Hinallataq rikurqani tiyanapi tiyaqpa paña makinpi huk qelqa k'uyuta, ukhunpipas patanpipas qelqasqata, lacrewan qanchis cheqaspi sellowan hina wisq'asqata ima.

²Atiyniyoq angeltataq kunkayoqta tapukushaqta rikurqani: ¿Pitaq kay qelqa k'uyuta kichananpaq hina, lacrewan sellosqakunatapas kichananpaq hina kashan? nispa.

³Hinan mana pipas hanaq pachapipas, kay pachapipas, kay pachaq ukhunpipas qelqata kichariy atiq karqanchu, manapuni qhawaykuyta atiqllapas.

⁴Chaymi ñoqaqa anchatapuni waqarqani, qelqata kichananpaqpas, qhawaykunallanpaqpas manapuni pillapas kasqanrayku.

⁵Chaymi hukkaq kurak runa niwarqan: ¡Amaña waqaychu! ¡Qhawariy, rey Davidpa mirayninmanta Judá ayllu Leonmi atiparqan! Paymi atin lacrewan sellosqakunata p'akispa qelqa k'uyuta kichayta, nispa.

⁶Hinan qhawarispa rikurqani tiyana qayllapi, tawa kawsashaqkunaq chawpinpi, kurak runakunaq chawpinpiwan huk Cordero nak'asqa hina sayashaqta. Chay Corderon kasqa qanchis waqrayoq qanchis ñawiyoq ima. Chay ñawikunan kay pachantinman kachamusqa Diospa qanchis espiritunkuna.

⁷Chay Corderon tiyanapi tiyaqman asuykuspa paña makinmanta qelqa k'uyuta chaskirqan.

⁸Qelqata chaskiqtintaq tawa kawsashaqkunapas, iskay chunka tawayoq kurak runakunapas Corderoq ñawpaqenpi k'umuykukurqanku. Kurak runakunataq sapanka kasqaku arpayoq, incienso hunt'a qori hatun p'ukuyoq ima. Chay p'ukupi inciensoqa Diospi iñiqkunaq mañakusqankunan.

⁹Hinan chay kurak runakunaqa mosoq takita takirqanku: Qanqa qelqa k'uyuta chaskinaykipaq, sellosqakunatapas kicharinaykipaq hinapunin kanki. Qanqa wañuchisqan karqanki, yawarniykiwanmi Diospaq rantirqanki lliw ayllumanta, rimaymanta, llaqtamanta, suyumantawan.

¹⁰Diosniykupaqmi reykunata, sacerdotekunata churarqanki, chaymi kay pachapi kamachikunqaku, nispa.

¹¹Chaymantataq qhawarirqani, hinaspa uyarirqani askha angelkunaq kunkata. Paykunan karqanku waranqaq waranqan, chaykunan tiyanatapas kawshaqkunatapas kurak runakunatapas muyuykurqanku,

¹²hinaspan kunkayoqta nirqanku: Wañuchisqa kaq Corderoqa atiytapas, qhapaq-kaytapas, yachaytapas, kallpatapas, yupaychaytapas, hatunchaytapas, alabaytapas chaskinanpaq hinapunin, nispa.

¹³Hinallataq hanaq pachapi tukuy kamasqakunata, kay pachapi kaqkunata, kay pachaq ukhunpi kaqkunata, mama qochapi kaqkunata, tukuy chaykunapi kaqkunatapas uyarirqani: Tiyanapi tiyaqpaq Corderopaqwan kachun alabay, yupaychay, hatunchay, atiypas wiñay-wiñaypaq, nishaqta.

¹⁴Hinan tawantin kawsashaqkunaqa: Ahinapuni kachun, nirqanku. Iskay chunka tawayoq kurak runakunataq pampakama k'umuykukuspa yupaycharqanku.