Read Quechua Cuzco Bible 1988 APOCALIPSIS 6 Bible Online

APOCALIPSIS 6 - Quechua Cuzco Bible 1988 bible

APOCALIPSIS 6

¹Hinan rikurqani Corderota ñawpaqkaq sellosqa kicharishaqta, hinaspan uyarirqani tawa kawsashaqkunamanta ñawpaqkaqnin chikchi t'oqyay kunkawan hina: Hamuy, nishaqta.

²Chaymi qhawarispay huk yuraq caballota rikurqani, chaypi sillakuqtaq huk wach'inata hap'ishasqa. Paymanmi huk coronata qorqanku, hinaspanmi atipaspa lloqsirqan astawan atipananpaq.

³Iskaykaq sellosqata Cordero kichariqtintaq, iskaykaq kawsashaqta uyarirqani: ¡Hamuy! nishaqta.

⁴Hinan lloqsimurqan sansaq puka caballo, chaypi sillakuqmantaq atiyta qorqan, kay pachamanta thak-kayta qechunanpaq, runakuna paykuna pura wañuchinakunankupaqwan. Huk hatun espadatapas paymanqa qollarqantaqmi.

⁵Kinsakaq sellosqata Cordero kichariqtintaq, kinsakaq kawsashaqta uyarirqani: ¡Hamuy! nishaqta. Chaymi qhawarispay huk yana caballota rikurqani, chaypi sillakuqtaq balanzata hap'ishasqa.

⁶Chay tawa kawsashaqkuna chawpimantataq huk kunkata hina uyarirqani: Huk kilo trigon huk jornal qolqepaq, kinsa kilo cebadapas huk jornal qolqellapaqtaq, ichaqa ama aceitetapas vinotapas imanaypaschu, nishaqta.

⁷Tawakaq sellosqata Cordero kichariqtintaq, tawakaq kawsashaqta uyarirqani: ¡Hamuy! nishaqta.

⁸Chaymi qhawarispay huk tunti-q'ellu caballota rikurqani, chaypi sillakuqpa sutinmi kasqa “Wañuy”, paypa qhepantataq Ukhu-pacha risharqan. Hinan paykunaman atiyta qorqan kay pachaq kuskanpa kuskanninta maqanakuywan, yarqaywan, onqoywan, kay pachapi phiña animalkunawan ima wañuchinankupaq.

⁹Phisqakaq sellosqata Cordero kichariqtintaq, altar chakipi rikurqani Diospa siminta willakusqankurayku wañuchisqakunaq almankunata.

¹⁰Paykunan kunkayoqta waqyakurqanku: Qollana Señorniyku, cheqaqmi ch'uyataqmi kanki. ¿Hayk'aqkamataq hallp'a pachapi tiyaqkunata wañuchiwasqankumanta mana huchachankichu, aynitapas mana kutichinkichu? nispa.

¹¹Hinaqtinmi sapankaman yuraq p'achata qorqan, hinallataq paykunata nirqan: Pisi tiempollatawanmi samarinkichis, kamachi-masiykichis wawqe-panaykichiskunapas qankuna hinallataq wañuchisqa kananku hunt'akunankama, nispa.

¹²Soqtakaq sellosqata Cordero kichariqtintaq qhawarirqani, hinan karqan sinchi pacha chhaphchiy. Intin yanayarqan yana ch'illu p'acha hina, killapas yawarman hinan tukurqan.

¹³Hanaq pachapi qoyllorkunapas kay pachamanmi urmaykamurqan, imaynan higos sach'apas sinchita wayra kuyuchiqtin higosninta pampaman urmachin hinata.

¹⁴Cielopas k'uyukushaq qelqa hinan ch'usaqyapurqan, llapa orqokunapas islakunapas maypichus kasqankumantan suchurichisqa karqanku.

¹⁵Chaymi kay pachapi reykuna, kamachikuqkuna, qhapaqkuna, oficialkuna, atiyniyoqkuna, hinallataq llapa kamachikunapas, mana kamachikunapas pakaykukurqanku qaqa t'oqokunapi, orqo qaqa k'aktukunapi.

¹⁶Hinaspan orqokunatapas qaqakunatapas nirqanku: Urmaykamuwayku, tiyanapi tiyaqpa uyanmanta, Corderoq k'arak phiñakuyninmantawan pakaykuwayku.

¹⁷Paypa sinchi k'arak phiñakuynin p'unchaymi chayamunña. ¿Pitaq chayta muchuyta atinman? nispa.