Read Quechua Cuzco Bible 1988 APOCALIPSIS 7 Bible Online

APOCALIPSIS 7 - Quechua Cuzco Bible 1988 bible

APOCALIPSIS 7

¹Chaykuna qhepatataq rikurqani kay pachaq tawantin ladonpi tawa angelkuna sayashaqta, kay pacha tawantin wayrata hark'ashaqta, ama hallp'a patamanpas, mama qochamanpas, ima sach'amanpas wayramunanpaq.

²Rikullarqanitaqmi huk angeltapas inti lloqsimuy ladomanta kawsaq Diospa sellon hap'iykusqa hamushaqta. Paymi kunkayoqta waqyakurqan hallp'ata mama qochatawan muchuchinankupaq kamachisqa chay tawa angelkunata:

³Amaraq muchuchiychischu hallp'atapas, mama qochatapas, sach'akunatapas, Diosninchispa kamachinkunata mat'inkupi sellowan marcanaykukama, nispa.

⁴Hinan uyarirqani hayk'achus sellowan marcasqakuna kasqanta. Israelpa llapan ayllunkunamanta karqan pachak tawa chunka tawayoq waranqa marcasqakuna.

⁵Judá ayllumantan karqan chunka iskayniyoq waranqa. Rubén ayllumantan karqan chunka iskayniyoq waranqa. Gad ayllumantan karqan chunka iskayniyoq waranqa.

⁶Aser ayllumantan karqan chunka iskayniyoq waranqa. Neftalí ayllumantan karqan chunka iskayniyoq waranqa. Manasés ayllumantan karqan chunka iskayniyoq waranqa.

⁷Simeón ayllumantan karqan chunka iskayniyoq waranqa. Leví ayllumantan karqan chunka iskayniyoq waranqa. Isakar ayllumantan karqan chunka iskayniyoq waranqa.

⁸Zabulón ayllumantan karqan chunka iskayniyoq waranqa. José ayllumantan karqan chunka iskayniyoq waranqa. Benjamín ayllumantapas chunka iskayniyoq waranqallataqmi karqan.

⁹Chaykuna qhepatataq qhawarispay rikurqani mana piqpa yupay atinan ancha askha runakunata. Paykunan karqan llapa suyukunamanta, ayllukunamanta, llaqtakunamanta, tukuy rimaykunamantawan hinaspan kamachikuy tiyanaq ñawpaqenpi Corderoq ñawpaqenpiwan sayasharqanku, yuraq p'achawan p'achasqakama, palmero k'allma hap'iykusqakama.

¹⁰Kunkayoqtataq qaparirqanku: ¡Kamachikuy tiyanapi tiyashaq Diosninchismi Corderopiwan qespichiqninchisqa! nispa.

¹¹Llapa angelkunataq kamachikuy tiyanaqpas, kurak runakunaqpas, tawantin kawsashaqkunaqpas muyuriqninkupi sayasharqanku, hinaspan tiyanaq ñawpaqenpi pampakama k'umuykukuspa Diosta yupaycharqanku:

¹²¡Ahinapuni kachun! Hatunchaypas, qhapaqchaypas, yachaypas, gracias qoypas, yupaychaypas, atiypas, kallpapas, Diosninchisman wiñay-wiñaypaq kachun. Ahinapuni kachun, nispa.

¹³Hinan hukkaq kurak runa tapuykuwarqan: ¿Pikunataq kaykunari yuraq p'achawan p'achasqa? ¿Maymantataq hamunkupas? nispa.

¹⁴Hinan ñoqaqa payta nirqani: Señor, qanmi chaytaqa yachanki, nispa. Paytaq niwarqan: Kaykunaqa manchay ñak'ariymanta lloqsimuqkunan, p'achankuta t'aqsaspa Corderoq yawarninpi yuraqyachiqkunan.

¹⁵Chayraykun Diospa kamachikuy tiyananpa ñawpaqenpi kashanku, tuta-p'unchaytaq yupaychana wasipi payta servishanku. Tiyanapi tiyashaqtaq paykunata qataykuspa waqaychanqa.

¹⁶Manañan yarqaytapas ch'akiytapas muchunqakuchu, manallataq intipas chayanqachu, ruphaypas kankanqachu,

¹⁷tiyana chawpipi kashaq Corderon paykunataqa michinqa, kawsachiq unu pukyukunamantaqmi paykunataqa pusanqa, Diostaqmi paykunaq lliw weqenkutapas pichanqa, nispa.