Read Quechua Cuzco Bible 1988 RUT 2 Bible Online

RUT 2 - Quechua Cuzco Bible 1988 bible

RUT 2

¹Noemipa qosan Elimelekpa ayllunmantan huk qhapaq runa karqan, Booz nisqa sutiyoq.

²Rut-taq Noemita nirqan: —Valekuyki chakrata kachawanaykita, pichus hinallata qhellachiwanqa chaypa qhepanpi cebadata qhellakamunaypaq, nispa. Hinan Noemiqa nirqan: —Riy, ususíy, nispa.

³Chakrata rispataq ichhuqkunaq qhepanpi qhellarqan, chay chakraqa Elimelekpa parienten Boozpan kasqa.

⁴Chayllamanmi kikin Boozqa Belenmanta chayamurqan, hinaspan ichhuqkunata napaykurqan: —Qankunawan Señor Diosqa kachun, nispa. Paykunataq kutichirqanku: —Qantapas Señor Diosña saminchasunki, nispa.

⁵Boozmi ichhuchiq qollanata nirqan: —¿Pitaq chay sipasri? nispa.

⁶Ichhuchiq qollanataq kutichirqan: —Moab suyumanta Noemiwan hamuq sipasmi.

⁷Paymi niwan: —Ama hinachu kay, ichhuqkunaq qhepanpi qhellarichiway, nispa. Tutamantapacha haykumuspan kunankama mana samaykuspa qhellashan, nispa.

⁸Chaymi Boozqa Rut-ta nirqan: —Ususíy, kay chakrallapin qhellakunki, aman kaymanta wakman rinkichu, kaypin ichhuqniykunawan kuska kanki.

⁹Ichhusqankuta allinta qhawanki, hinaspa ichhuqkunaq qhepanta rinki. Ñoqan ichhuqniykunata kamachiniña ama imaninasuykipaq. Ch'akisuqtiykipas urpukunaman asuykuspa ichhuqkunaq wisimusqan unuta ukyakunki, nispa.

¹⁰Hinan Rutqa pampakama k'umuykukuspa nirqan: — ¿Imanaqtintaq khuyapayawanki? ¿Imanaqtintaq sumaqta qhawariwanki, ñoqa wak llaqtayoq kashaqtiy? nispa.

¹¹Booztaq nirqan: —Qosaykiq wañukapusqan qhepata tukuy imaymanata suegraykipaq ruwasqaykitan willawarqanku, hinallataq tayta-mamaykitapas nacesqayki llaqtatapas saqenaykikamaraq mana reqsisqayki llaqtaman hamusqaykitapas.

¹²Señor Diosña chay ruwasqaykimanta kutichipusunki, Israelpa Diosninmi hunt'asqata qopusunki, paypa waqaychasqan kanaykipaq hamusqaykirayku, nispa.

¹³Rut-taq nirqan: —Wiraqocháy, sumaqtan qhawarishawanki, sonqochaykushawanki, kamachiykiman sumaqta rimaykushawanki, manaña huknin kamachiyki hina kashaqtiypas, nispa.

¹⁴Booztaq mikhuna horata Rut-ta nirqan: —Asuykamuy, mikhusunchis, kay t'antata vinagreman challpuykuy, nispa. Hinan payqa ichhuqkunawan kuska tiyaykurqan, Booztaq payman cebada hank'atapas haywallarqantaq. Rutqa saksanankaman mikhurqan, puchuqtataq alzakurqan.

¹⁵Chaymantataq Rutqa qhellaq sayarirqan. Booztaq kamachinkunata kamachirqan: —Phichakuna ukhumantapas qhellakullachuntaq, amataq payta hark'ankichischu.

¹⁶Marq'aykunamantapas paypaq urmachillankichistaqmi, hinaspa saqenkichis chayta pallakunanpaq, amataq phiñarinkichischu, nispa.

¹⁷Rutmi chakrapi tutayanankama qhellarqan, hinaspan pallasqanta waqtarqan, hinan huk arroba cebada kasqa.

¹⁸Chayta aparikuspan llaqtata ripurqan, suegranmantaq qhellamusqanta rikuchirqan, alzakamusqantapas haywallarqantaq.

¹⁹Suegrantaq payta nirqan: —¿Maypitaq kunan qhellamurqanki? ¿Maypitaq llank'amurqanki? Dios saminchapuchun sumaq qhawarisuqniykita, nispa. Hinan payqa suegranman willarqan piqpapichus llank'amusqanta: — Kunan p'unchayqa qhellamuni Booz sutiyoq runaq chakranpin, nispa.

²⁰Noemitaq qhachuninta nirqan: —Boozqa Señor Diospa saminchasqan kachun. Diosqa wañukapuqkunapaqpas kawsaqkunapaqpas hunt'allanpunin, nispa. Chaymantataq Noemiqa Rut-ta nirqan: — Parientenchismi chay qhariqa, ñoqanchisqa paypa ayanmi[2] kanchis, nispa.

²¹Rut-taq nirqan: —Chaymantapas nillawantaqmi: Ichhuqniykunaq qhepanpi qhellakuy cosechay lliw tukukunankama, nispan, nispa.

²²Hinan Noemiqa qhachunin Rutman kutichirqan: —Aswan allinmi, ususíy, Boozpa ichhuqninkunawan kanki chayqa, paqtan hukpa chakranpiqa imanasunkikumanpas, nispa.

²³Chaymi Rutqa paykunawan qhellarqan cebada ichhuy trigo ichhuy tukukunankama. Suegranwantaq tiyasharqan.