Read Quechua Cuzco Bible 1988 RUT 3 Bible Online

RUT 3 - Quechua Cuzco Bible 1988 bible

RUT 3

¹Suegran Noemitaq Rut-ta nirqan: —Ususíy, ¿manachu casarachipuykiman allillan kanaykipaq?

²Boozqa parientenchismi riki, ichhuqninkunawanmi llank'amusharqanki. Paymi kay ch'isi cebadata wayrachinqa.

³Chhaynaqa bañakuy, sumaq q'apaqwan hawikuy, allinta p'achakuy, hinaspa erata rinki, ichaqa aman chay qhariwan reqsichikunkichu mikhuyta ukyayta tukunankama.

⁴Mayneqpichus paypa puñusqantan reparanki, puñushaqtin asuykuspaykitaq chakinta qataranki, hinaspa chayman suchuykunki. Paymi imatachus ruwanaykita nisunki, nispa.

⁵Hinan Rutqa kutichirqan: —Tukuy niwasqaykitan ruwasaq, nispa.

⁶Erata rispataq suegranpa nisqanta hina ruwarqan.

⁷Boozqa mikhuspaña ukyaspaña, kusisqa sonqoyoq ch'uyachasqa cebada qayllaman puñuq rirqan. Puñushaqtintaq Rutqa ch'inlla qayllaykurqan, chakinta qataraspataq suchuykurqan.

⁸Chawpi tutatataqmi chay runaqa rikch'arirqorqan, hinaspan tiyarimuspa huk warmi hayt'anpi puñushasqanwan utirayarqan.

⁹Chaymi payqa nirqan: —¿Pin kanki? nispa. Paytaq kutichirqan: —Ñoqaqa kamachiyki Rutmi kani. Qanqa parienteymi kanki, yanapawanaykin kani, chayrayku ñoqawan imachus ruwanaykita hunt'ay, nispa.

¹⁰Paytaq nirqan: —Señor Diosña saminchasunki, ususíy, munakuq sonqowan kay ruwasqaykiqa aswanraqmi suegraykipaq ruwasqaykimantaqa. Manan waynakunatachu qhawakurqanki, wakchaña qhapaqña kaqtinkupas.

¹¹Chhaynaqa ama manchakuychu, ususíy, llaqtayqa llaqtallantinmi yachan ancha allin warmi kasqaykita, ñoqan imatachus niwasqaykita ruwapusqayki.

¹²Chaywanpas, ñoqaña qanpaq hunt'ayta atishani chaypas, ñoqamanta aswan qanpaq hunt'ay atiqqa kanraqmi.

¹³Kaypi illariykullay, paqarinña yachasun, pay qanpaq hunt'anqa chayqa, allinmi kanqa. Manachus pay hunt'ayta munanqa chayqa, Señor Diospa ñawpaqenpin rimariyki ñoqan hunt'asaq. Samakuy paqarinkama, nispa.

¹⁴Chaymi Rutqa illarimuykama puñurqan, rankhi-rankhitataq sayarirqan, Boozqa manan munarqanchu eraman warmiq hamusqanta pipas yachananta.

¹⁵Chaymantataq Boozqa nirqan: —Llikllaqakuy, hinaspa mast'ay, nispa. Chayta Rut mast'aqtintaq, payqa soqta tupu cebadata qorqan. Hinaspataq Rutman q'epiykachirqan llaqtata ripunanpaq.

¹⁶Suegranpa kasqanman chayaqtintaq, suegranqa payta nirqan: — ¿Imaynan, ususíy? nispa. Hinan payqa suegranman willarqan imakunatachus chay qhari paypaq ruwasqanta.

¹⁷Nillarqantaq: —Kay soqta tupu cebadatan qoykamuwan: Mana imayoqchu suegraykiman ripuwaq, nispan, nispa.

¹⁸Noemitaq nirqan: —Suyaykullay, ususíy, chay asuntoq imaynachus kananta yachanaykikama. Chay qhariqa manan samaykunqachu chay asuntota mana kunan tukuspaqa, nispa.