Read Quechua Cuzco Bible 1988 RUT 4 Bible Online

RUT 4 - Quechua Cuzco Bible 1988 bible

RUT 4

¹Boozmi llaqta haykunapi huñukuna cheqasman wicharqan, hinaspan chaypi tiyaykurqan. Hinan pimantachus Boozpa rimasqan chay hunt'ay atiqqa pasasharqan, chaymi waqyarqan: —Taytáy, hamuy, tiyaykuy, nispa. Paytaq asuykuspa tiyaykurqan.

²Chaymi Boozqa kurak runakunamanta chunka runata waqyakurqan paywan tiyaykunankupaq. Paykuna tiyaykuqtinkutaq chay hunt'ay atiq runata nirqan: —Moab suyumanta kutimuq Noemimi vendeyta munashan ayllunchis Elimelekpa hap'isqan chakrata.

⁴Ñoqataq qanman willaykunaypaq yuyaykurqani, qantaqchus chakrata rantiyta munanki chayqa, kay kurak runakunaq qayllanpi chayta rantiy. Manataqchus munanki chayqa, sut'inta rimariy. Qanmi rantiyta atinki, aswan qaylla parienten kasqaykirayku, mana munaqtiyki ichaqa ñoqaman rantina tupawan, nispa. Paytaq nirqan: —Ñoqan rantisaq, nispa.

⁵Hinaqtinmi Boozqa nirqan: —Chakrata Noemimanta rantispayki hina wañuqpa warmin Moab suyu warmi Rutwanpas casarakullankitaq, chakraqa wañuqpa viudanpa wawallanpaqpuni kashananpaq, nispa.

⁶Paytaq kutichirqan: —Chhayna kaqtinqa wawaykunaq herencianchá pisiyanman, chayrayku qan rantikuy ñoqaq rantinaytaqa, manan ñoqaqa rantisaqchu, nispa.

⁷(Israelpiqa hallp'a rantinakuypas hallp'a cambiaypas unaymantañan huk ruway hina kasqa: ima rimanakusqatapas allintapuni sayachinapaqqa hukninmi usut'anta ch'utikuspa qharimasinman haywaq. Chaymi Israelpi sut'i rimasqa señal kaq).

⁸Hinaspan chay qhariqa Boozta nirqan: —Qan rantikuy, nispa. Usut'anta ch'utikuspataq payman haywarqan.

⁹Hinan Boozqa kurak runakunata hukkunatawan nirqan: —Kay p'unchaymi testigoykuna kankichis. Elimelekpa kaqninkunata, Kilyonpa Maklonpa kaqninkunatapas Noemimanta rantisqaymanta,

¹⁰hinallataq Maklonpa viudan Moab suyu warmi Rutwan casarakunaymantapas. Chaywan hallp'aqa wañuqpa sutinwan sutichasqa wawallapaqpuni kanqa, hinallataq wañuqpa sutinqa ayllun ukhupipas llaqtanpipas mana chinkanqachu. Kay p'unchaymi testigoykuna kankichis, nispa.

¹¹Kurak runakunataq hukkunapiwan nirqanku: —Testigon kayku. Casarakunayki warmitaqa Señor Diosqa ruwachun Raquelta hina Leata hina, paykunan Israel aylluta paqarichirqanku. Qantaq Efrata ayllupi ancha qhapaq kay, Belenpipas allin reqsisqa kay.

¹²Señor Diosña chay sipaspi wawakunata qosunki Farespa ayllun hina kananpaq, Tamarqa Judapaqmi Faresta wachakusqa, nispa.

¹³Boozmi Rutwan casarakurqan, hinaspan wasinman pusarqan. Paywantaq puñurqan, Señor Diostaq munarqan wiksallikunanta, chaymi qhari wawata wachakurqan.

¹⁴Hinan warmikunaqa Noemita nirqanku: —¡Señor Diosqa yupaychasqa kachun! Kay p'unchaymi uywaqniyki nietota qorqasunki, paypa sutin Israelpi ancha reqsisqa kachun.

¹⁵Qhachuniykin munakusunki, payqa qanpaq qanchis qhari wawamantapas aswanraqmi, chay wachakusqan wawan sonqochasunki, payaña kaqtiykipas uywasunki, nispa.

¹⁶Noemitaq wawata marq'arikuspa oqllaykurqan, wawaq uywaqentaq kapurqan.

¹⁷Wasimasin warmikunataq nirqanku: —Noemipaqmi wawa nacen, nispa. Suticharqankutaq: Obed, nispa. Paymi Isaipa taytan, Davidpa machulan karqan.

¹⁸Kaymi Farespa mirayninkuna: Faresmi churiyarqan Hezronta,

¹⁹Hezrontaq churiyarqan Ramta, Ramtaq churiyarqan Aminadabta,

²⁰Aminadabtaq churiyarqan Naasonta, Naasontaq churiyarqan Salmonta,

²¹Salmontaq churiyarqan Boozta, Booztaq churiyarqan Obedta,

²²Obedtaq churiyarqan Isaita, Isaitaq churiyarqan Davidta.