Read Quechua Cuzco Bible 1988 1 SAMUEL 1 Bible Online

1 SAMUEL 1 - Quechua Cuzco Bible 1988 bible

1 SAMUEL 1

¹Efrainpa orqo-orqon Ramá llaqtapin Jerohampa churin Elkanaqa tiyarqan, machulankunataq karqan Efraín ayllumanta Eliú, Tohu, Zufpiwan.

²Elkanaqa iskay warmiyoqmi karqan, hukkaqpa sutinmi karqan Ana, payqa mana wachakuqmi karqan. Hukkaqpañataq Penina, payqa wachakuq warmin karqan.

³Elkanataq sapa watallapuni Silo llaqtaman wichaq Tukuy-atiyniyoq Señor Diosta yupaychaq, hinallataq sacrificiotapas haywaq. Silo llaqtapitaqmi iskay sacerdotekuna karqan, Elipa churinkuna Ofniwan Fineespiwan.

⁴Sacrificiota haywaspañataq Elkanaqa chay sacrificasqanmanta warminman wawankunamanpas qoykariq mikhunankupaq.

⁵Hinaña Anata anchata munakurqan chaypas, paymanqa tupaqnillantapunin qoykapurqan, payman Dios mana wawata qosqanrayku.

⁶Chayraykun Peninaqa Anata imaymana millayta k'amiq llakichinankama.

⁷Watan-watanpas Diospa wasinman rispanku Peninaqa k'amillaqpuni, chaymi Anaqa waqapakurqan mana mikhunankamaraq.

⁸Qosan Elkanataq nirqan: —Ana, mikhuyyá. ¿Imamantataq waqashanki? Chaytaq khayna llakisqari kashanki. ¿Manachu ñoqari chunka wawamantapas astawanraq kani? nispa.

⁹Silopi ukyasqankumanta mikhusqankumantan Anaqa kaq llakisqa sonqollantin sayarispa, sinchita waqaykukuspa Señor Diosmanta mañakurqan. Chaykamataq sacerdote Eliqa Dios yupaychana karpa punku hawapi huk tiyanapi tiyasharqan.

¹¹Anaqa cheqaqtan prometekurqan: Tukuy-atiyniyoq Señor Diosníy, kay warmi wawaykimanta yuyarikuway, llakikuyniypi amapuni qonqarpariwaychu. Kay warmi kamachiykimanqa huk qhari wawatayá qoykuway, chay qowasqaykitaqa qanllamantaqmi pasaqta qopusqayki, manan chukchantapas rutukunqachu, nispa.

¹²Ahinatan payqa Señor Diospa qayllanpi unayña mañakusharqan, Elitaq Anaq siminta qhawasharqan.

¹³Anaqa sonqon ukhullapin mañakusharqan, mana imata rimaspalla, simillanmi kuyusharqan mana uyarinata, chaymi Eliqa machasqa kananpaq yuyaspa

¹⁴nirqan: —¡Lloqsiy yaw, machasqa warmi, machasqaykitaraq pasarachikuy! nispa.

¹⁵Hinan Anaqa kutichirqan: —Wiraqocháy, manan ñoqaqa vinowanpas cervezawanpas machasqachu kashani, aswanmi llakikuymanta nanasqa sonqoyoq mañaykukushani.

¹⁶Amalla millay warmipaq kay kamachiykita hap'iwaychu, ñoqaqa llakikuyniypi sonqoypa phutikuynintan willakushallarqanipuni, nispa.

¹⁷Niqtintaq Eliqa: —Israelpa Diosninmi tukuy mañakusqaykita qosunki, kusisqalla ripuy, nirqan.

¹⁸Chaymi Anaqa nillarqantaq: —Niwasqaykita chaskinaypaq hinapuni kachun, nispa. Hinaspan payqa kutipurqan, manaña llakisqañachu mikhurqan.

¹⁹Tutallamanta sayarispankutaq Señor Diosta yupaychaykuspa, Ramapi wasinkuman ripurqanku. Chay qhepatataq Elkanaqa warmin Anawan puñuykurqan, Señor Diostaq mañakusqanta kutichirqan.

²⁰Chaymi Anaqa wiksallikurqan, killan hunt'akamuqtintaq qhari wawata wachakurqan, chay wawatataq suticharqan Samuelta[1], payqa nirqanmi: Diosmanta mañakusqay wawan, nispa.

²¹Chaymantan Elkanaqa warmintin wawakunantin Silo llaqtaman wicharqan, Señor Diosman prometekusqanta hunt'ananpaq, sapa wata sacrificiota haywananpaqwan.

²²Anataq ichaqa mana wicharqanchu, payqa qosantan nisqa: Manan riymanraqchu kay wawata ñuñumanta p'itinaykama, chaymantañan Señor Diosman apapusaq, chaypitaq pasaqta qhepakampunqa, nispa.

²³Qosan Elkanataq nisqa: Allinmi yuyaykusqayki, chhaynata ruway, qhepakuy wawa p'itinaykikama, Señor Diostaq hunt'anaykipaq yanapasunki, nispa. Hinan Anaqa wawata uywaspa p'itinankama qhepakurqan.

²⁴Wawata p'itispa hinataq, Silo llaqtapi Señor Diospa wasinman Samuelta pusampurqan, huk kinsa watayoq torillota, huk arroba hak'uta, huk p'uyñu vinotawan apamuspa.

²⁵Torillota nak'aspataq, wawata Elipa kasqanman pusampurqanku, hina huch'uyllata.

²⁶Chaymi Anaqa nirqan: —Wiraqocháy, yachashankipas hina, unayñan qanpa qayllaykipi Señor Diosmanta mañakusharqani, chay warmin kashani.

²⁷Kay wawatan Señor Diosmanta mañakurqani, hinan payqa qowarqan.

²⁸Kunantaqmi qopunaypaq Señor Diosllamantaq pusampushani, tukuy kawsasqan p'unchaypin Señor Diosllataña servispa kawsanqa, nispa. Hinan Señor Diosta chaypi yupaychaykurqan.