Read Quechua Cuzco Bible 1988 1 SAMUEL 15 Bible Online

1 SAMUEL 15 - Quechua Cuzco Bible 1988 bible

1 SAMUEL 15

¹Chaymantan Samuelqa Saulta nirqan: —Señor Diosmi ñawpaqta kachamuwarqan qanta Israelpi rey kanaykipaq aceitewan hawiykunaypaq. Chayrayku uyariy Señor Diospa rimasqanta.

²Tukuy-atiyniyoq Señor Diosmi nin: Egiptomanta Israel runakuna hamushaqtinkun Amalek runakuna hark'arqanku, chaymantan kunan paykunata ñak'arichisaq.

³Chayrayku kunan phawaykuspa Amalek runakunata wañuchimuy, llapan kaqninkunatapas ch'usaqyachimuy. Ama khuyapayaykuspataq sipimunki llapa qharita, warmita, erqekunata, qholla wawakunatapas, hinallataq wakakunata, ovejakunata, camellokunata, asnokunatapas, nispan, nispa.

⁴Saultaq Telaim llaqtaman runakunata huñuspa yuparqan, chaypin iskay pachak waranqa chakipi soldadokuna karqan, Judamanta soldadokunataq chunka waranqa karqan.

⁵Chaykunapiwanmi Saulqa Amalekpa llaqtankama rispa, ch'aki mayuq kasqanpi pakakurqanku maqanakunankupaq.

⁶Kayin runakunatataq Saulqa nirqan: —Qankunaqa kay Amalekpa llaqtanmanta ripuychis, ama paykunawan kuska wañuchisqa kanaykichispaq. Qankunaqa Egiptomanta Israel runakuna hamushaqtinkus khuyapayaykusqankichis, nispa. Chaymi Kayin runakunaqa chay llaqtamanta ripurqanku.

⁷Hinan Saulqa wañurachirqan Amalek runakunata Havilamanta qallarispa Egipto suyu inti lloqsimuy lado Shur ch'inneqkama.

⁸Amalek runakunaq reynin Agagtataq presota hap'irqorqanku, llapan runakunatañataq espadawan wañurachirqanku.

⁹Saultaq soldadonkunapiwan Agagta mana wañuchirqankuchu, manallataq allichachaq ovejakunata, wakakunata, wira torillokunata, borregokunatapas wañuchirqankuchu, ch'usaqyachirqankuqa llapan mana imapaq valeq kaqkunallatan.

¹⁰Chaymi Señor Diosqa Samuelta nirqan:

¹¹—Yanqapunin Saultaqa reyta churaykurqani, kamachisqaykunata mana hunt'aspan waqllirqapun, nispa. Niqtinmi Samuelqa llakikurqan, chay tutataq illariqta Señor Diosman waqyakurqan.

¹²Pacha illarimuytataq Samuelqa Saúl maskhaq purirqan, hinan runakunaqa willarqanku: —Saulqa Carmel llaqtantan muyumun, chaypitaqmi paymanta yuyarina saywata perqaspa Gilgal llaqtaman ripun, nispa.

¹³Chaymanmi Samuelqa chayarqorqan Saulpa kasqanman, Saultaq payta nirqan: —Señor Dios saminchasunki, kayqa Señor Diospa kamachiwasqantaqa hunt'arqamunin, nispa.

¹⁴Niqtintaq Samuelqa nirqan: —Chay hinari, ¿ima ovejakunaq ch'aqwasqantataq uyarishani? ¿Ima wakakunaq waqasqantataq uyarishani? nispa.

¹⁵Saultaq nirqan: —Soldadokunan Amalek runakunamanta allichaqnin ovejakunata wakakunata ima apamurqanku Apu Señor Diosniykiman sacrificio haywanankupaq, ichaqa llapantapunin wañuchimurqayku wakin uywakunataqa, nispa.

¹⁶Chaymi Samuelqa nirqan: —¡Upallay! Aswanpas uyariway, Señor Diospa qayna tuta niwasqantan willasqayki, nispa. Saultaq: —Niway, nirqan.

¹⁷Hinan Samuelqa nirqan: —Qan kikiykin pisipaq qhawarikurqanki, riki. Chay tukuywanpas Israel suyupi kamachikuqpuniraqmi kanki, Señor Diosmi Israelpi rey kanaykipaq aceitewan hawirqasunki.

¹⁸Hinaspan qanta Señor Diosqa allinta kamachispa kacharqasunki huchasapa Amalek runakunata hap'ispa llapanta wañuchimunaykipaq.

¹⁹Chayri, ¿imanaqtintaq qanri mana kasukuspa awqanmanta llat'anaspa qechumusqata apakamunki, Señor Diospa ñawpaqenpi mana allinta ruwaspa? nispa.

²⁰Saultaq kutichirqan: —Ñoqaqa allintan ruwasharqani, Señor Diospa kamachiwasqantapas llapantan hunt'asharqani, chaymi Amalek runakunaq reynin Agagtapas presota apamurqani, Amalek runakunatapas llapantan wañuchimurqani.

²¹Soldadokunan ichaqa wañuchinapaq kaq uywakunamanta allichaqninkunata wakata ovejakunata apamurqanku Gilgalpi Apu Señor Diosniykiman haywanankupaq, nispa.

²²Hinaqtinmi Samuelqa nirqan: —Señor Diospa qayllanpi aswan allinqa kasukuymi ruphachina sacrificiota wak sacrificiotawan haywaymantaqa. Aswan allinqa uyarikuywan kasukuypiwanmi uywakunaq wiran ruphachisqamantaqa.

²³Señor Dios contra sayariqqa, watuqwan kuska huchachasqan, wak'a idolota yupaychaqwan kuskachasqan, chay llapa mana kasukuqkunaqa. Qanpas manañataq kasukunkichu kamachikusqanta chayqa, paypas rey kanaykitaqa manan munanñachu, nispa.

²⁴Chaymi Saulqa Samuelta nirqan: —Cheqaqtapunin huchallikuni Señor Diospa kamachisqanta qanpa nisqaykitapas mana kasukuspay, llaqta runata manchakuspaymi mañakusqankuta ruwarqani.

²⁵Pampachaykuwaypuni kay huchayta. Haku, kutiysiway Señor Diosta yupaychaykuq, nispa.

²⁶Samueltaq nirqan: —Manan kutiysiykimanchu, Señor Diosmi Israelpi rey kanaykita mana munanñachu, paypa kamachinta mana hunt'aq kasqaykimanta, nispa.

²⁷Samuel ripunanpaq kutirishaqtintaq Saulqa llaqollanmanta hap'ipakuspa ch'ullpanta llik'iqarqorqan.

²⁸Chaymi Samuelqa kutirimuspa Saulta nirqan: — Ahinallatataqmi Señor Diosqa Israel suyupi rey-kayta qanmanta llik'iqapun, hinaspanmi qanmanta aswan allinnin kaq llaqtamasiykiman qopunña.

²⁹Israelpa Qhapaq atiyniyoq Diosninqa manan llullakuqchu, manataqmi yanqa runachu qhepataña yuyaykukunanpaqpas, nispa.

³⁰Hinan Saulqa nirqan: —Huchallikunipunin, chay tukuywanpas valekuykipunin Israel kurak runakunaq qayllanpiqa reyta hinapuniraqyá qhawariwanki. Chhaynaqa riysiwaypuniraq Apu Señor Diosniykita yupaychaykuysiq, nispa.

³¹Chaymi Samuelqa paypa qhepanta rirqan, Saultaq Señor Diosta yupaychaykurqan.

³²Samueltaq nirqan: —Pusamuway Amalek runakunaq reynin Agagta, nispa. Agagñataq mana kuyuriyta munarqanchu: —Wañuyqa manchakuymá, nispa.

³³Samueltaq nirqan: —Imaynan qanpas espadaykiwan askha warmiq wawanta sipirarqanki, kaqllataqmi mamaykipas mana churiyoq kapunqa, niykuspataq Agagta nak'aspa Gilgalpi Señor Diospa ñawpaqenpi kuchurqarirqan.

³⁴Chaymantan Samuelqa Ramá llaqtata ripurqan. Saulñataq Gabaa llaqtapi wasinman kutipurqan.

³⁵Manaña astawanpas Saulta rikuspataq, Samuelqa khuyayta waqarqan. Señor Diostaq llakikurqan Saulta Israel suyuman rey churasqanmanta.