Read Quechua Cuzco Bible 1988 1 SAMUEL 19 Bible Online

1 SAMUEL 19 - Quechua Cuzco Bible 1988 bible

1 SAMUEL 19

¹Churin Jonatanta oficialninkunatawanmi Saulqa kamachirqan Davidta wañuchinankupaq. Jonatantaq Davidta sinchitapuni munakurqan,

²chaymi Davidman willarqorqan: —Taytay Saulmi wañuchiyta munashasunki. Paqarinmi tutallamanta pakakamunki mayllapipas,

³ñoqataq taytaywan paseaq hamusaq qanpa kasqayki cheqasman. Chaypitaq payta qanmanta rimapayasaq, imaninqachus chaytaqa willasqaykiñan, nispa.

⁴Jonatantaq taytanta sumaqta Davidmanta rimapayaspa nirqan: — Reyníy, ama ima mana allintapas Davidtaqa ruwaychu, payqa manan ima mana allintapas qanpaqqa ruwanchu, aswanmi allintakama ruwarqasunki.

⁵Hinallataq wañuyta mana manchakuspa Filistea runatapas wañuchirqan, chay hinapitaq Señor Diosqa Israel llaqtata hatun atipaywan qespichirqan. Chayta rikuspataq kusikurqanki, chayri, ¿imamantataq Davidta yanqa wañuchiwaq mana huchanmantari? nispa.

⁶Niqtintaq reyqa jurarqan: —Diosmi yachashan Davidpa mana wañunanta, nispa.

⁷Chay qhepatataq Jonatanqa Davidman chay nisqanta willarqamurqan, hinaspataq kaqta Saulman pusampurqan, ñawpaq imaynatachus purirqan hinata purikapunanpaq.

⁸Wakmanta hatun maqanakuy kallarqantaq, Davidtaq lloqsirqan Filistea runakunawan maqanakuq, hinaspataq manchanata wañurachimurqan, wakintaq ayqekapurqan.

⁹Señor Diospa kachamusqan mana allin espiritun wakmanta Saultaqa hap'irqapurqan, wasinpi lanza hap'iykusqa tiyashaqtin, Davidpas arpanta tocashaqtin.

¹⁰Hinan Saulqa Davidta lanzanwan perqaman ch'antirqonanpaq chanqarqan, Davidtaq laq'ochirqan. Chaymi Saulpa lanzanqa perqallaman ch'antikurqan. Chay kikin tutapachataq Davidqa ayqekuspa pasakapurqan.

¹¹Kaq ratopachataq Saulqa Davidpa wasin qhamiyaqta runakunata kacharqan, paqarisnintin Davidta wañuchipunankupaq. Chaytan warmin Mikalqa Davidman lliwta willaspa nirqan: —Manachus kunan tuta ayqekunki chayqa paqarinmi taytayqa wañuchisunki, nispa.

¹²Chaymi Mikalqa Davidta ventananta waskhapi warkuspa kacharparirqan, paytaq pasakapurqan.

¹³Qhepanmantataq Mikalqa wasinpi idolota Davidpa puñunanman churaykurqan, cabra millmamanta awasqawantaq sawnaykachirqan, patanmantaq huk llamp'unawan qataykurqan.

¹⁴Saulmi runakunata David apaqta kachamurqan, Mikaltaq ichaqa nirqan: —Onqoshanmi, nispa.

¹⁵Wakmanta Saulqa kachamullarqantaq: —¡Hina onqosqata apamuychis wañuchinaypaq! nispa.

¹⁶Saulpa kachasqan runakuna Davidpa wasinman haykuqtintaq idololla kapushasqa cabra millmamanta awasqawan sawnaykachisqa.

¹⁷Chaymi Mikalta Saulqa nirqan: —¿Imanaqtinmi q'otuwanki chhayna niraqta, awqayta kacharparishaspa? nispa. Niqtinmi payqa nirqan: —Ama hark'awaychu chinkakapunayta, icha qantachu sipirqosqayki, niwanmi, nispa.

¹⁸Davidtaq Samuelpa kasqan Ramá llaqtaman ayqekapurqan, chaypitaq Saulpa tukuy imaymana ruwasqanta willaykukurqan. Chaymantataq kuskapacha ripurqanku Naiotpi tiyakuq.

¹⁹Saulmanqa willallarqankutaq Davidpa Ramá llaqtapi kaq Naiotpi kashasqanta.

²⁰Chaymanmi kacharqan runakunata Davidta apamunankupaq. Runakunataq rikurqanku huk t'aqa profetakunata qaparkachaspa tusushaqta, Samueltataq llapankuta pusashaqta. Chayllamanmi Diospa Espiritunqa hamurqan chay runakunamanpas, hinan paykunapas qaparkachayta tusuyta qallaripurqanku.

²¹Chayta yachaspataq Saulqa huk runakunata kachamurqan, paykunapas chayamuspaqa kaqllatataq qaparkachaspa tususharqanku. Wakmanta kinsakaq kutitawan runakunata Saulqa kachamullarqantaq, hinan chaykunapas qaparkachaspa tusupushallarqantaq.

²²Chaymi Saulqa pay kikin Ramá llaqtaman puririmurqan. Sekupi hatun unu p'uytu pataman chayamuspataq tapukurqan: —¿Maypin Samuelwan Davidwan tiyanku? nispa. Huk runataq nirqan: —Ramá llaqtapi kaq Naiotpin kashanku, nispa.

²³Paytaq chayman rishallaqtinraq Diospa Espiritunqa paymanpas hamullarqantaq, chaymi Saulpas qaparkachaspa tusupushallarqantaq chayanankama.

²⁴Chayaspataq payqa p'achanta ch'utirqokuspa Samuelpa qayllanpi qaparkachaspa tususharqan, chaymantataq q'alalla wikch'urayarqan chay p'unchayta chay tutatawan. Chaymantan rimay rikhurirqan: ¿Saulpas profetamanchu tukupun? nispa, nisqa.