Read Quechua Cuzco Bible 1988 1 SAMUEL 23 Bible Online

1 SAMUEL 23 - Quechua Cuzco Bible 1988 bible

1 SAMUEL 23

¹Huk p'unchaymi Filistea runakunaqa Keila llaqtaman phawaykuspa chayllaraq saruchisqa trigota suwakurqanku, chaytan Davidman willarqanku.

²Chaymi Davidqa Señor Diosta tapuykurqan: —¿Filistea runakunawan maqanakuq riymanchu? nispa. Señor Diostaq nirqan: —Riy, Keila llaqtata Filistea runakunaq makinmanta qechumuy, nispa.

³Runankunataq ichaqa payta nirqan: —Kay Judapi manchasqataq kashanchis chayri, ¿imayna aswan manchasqaraqtaq Keila llaqtata risunman Filistea runakunawan maqanakuq? nispa.

⁴Chaymi Davidqa Señor Diosta tapuykullarqantaq, Señor Diostaq payta nirqan: —Rillay Keila llaqtaman, Filistea runakunataqa hap'iykachisqaykin, nispa.

⁵Davidtaq runankunantin Keila llaqtata puririrqan, chaypin Filistea runakunawan maqanakamuspa pasaqta atipaykamurqanku, uywankutapas qatimurqanku. Chay hinatan Davidqa Keila llaqtapi tiyaq runakunata qespichirqan.

⁶Keila llaqtapi Davidwan huñukapuyta yuyaspa, Ahimelekpa churin Abiatarqa Diospa munaynin watuna Urimniyoq Tumimniyoq unkuta aparikuspa Keila llaqtaman rirqan.

⁷Hinan Saulman willarqamurqanku Keila llaqtapi Davidpa kashasqanta, chaymi Saulqa kusikurqan: Hap'iykachiwanñan Diosqa, paymantakama llaqtaman haykuspa wisq'aykukunqa, allin perqasqa llaqtapi allinta chakarqarikuspa, nispa.

⁸Hinaspataq Saulqa llapan soldadonkunata waqyachirqan Keila llaqtata rispanku Davidta runankunatawan muyuykunankupaq.

⁹Davidtaq chayta yacharqospa sacerdote Abiatarta nirqan: — Unkuta apamuy, nispa.

¹⁰Hinaspan Davidqa mañakurqan: —Israelpa Diosnin Señorníy, kay kamachiykin yachani Saulpa Keila llaqtaman hamunanta, ñoqa hawa kay llaqtata thuninantawan.

¹¹¿Saulqa yachasqayman hina ñoqa maskhaq hamunqapunichu? ¿Keila llaqtayoq runakuna Saulwan hap'iykachiwanqapunichu? Israelpa Diosnin Señorníy, kay kamachiykin valekuyki willaykuwanaykita, nispa. Señor Diostaq nirqan: —Arí, hamunqapunin, nispa.

¹²Davidqa tapuykullarqantaq: —¿Keila llaqtayoq runakuna Saulwan hap'iykachiwanqapunichu runaykunatawan? nispa. Señor Diostaq nirqan: —Arí, hap'iykachisunkichispunin, nispa.

¹³Chaymi Davidqa runankunantin usqhaylla Keila llaqtamanta ripurqanku, cheqas-cheqaspi tiyaspataq purirqanku. Paykunaqa yaqa soqta pachak hinan karqanku. Saulmantaq Davidpa ripusqanta willarqanku, chaymi payqa manaña Keila llaqtaman rirqanchu.

¹⁴Ahinapin Davidqa kawsarqan Zif ch'inneq orqo-orqopi pakakuspa, hinaña sapa p'unchay Saúl maskhaykachisharqan chaypas, Diosqa manapunin tarichirqanchu.

¹⁵Davidtaq ichaqa Zif ch'inneq Horespi kashaspa repararqan payta wañuchinanpaq Saulpa maskhaspa hamusqanta.

¹⁶Chaymantataq Jonatanqa Davidpa kasqan Horesman rirqan, Diospi suyakuyninta aswanta kallpachaykuq.

¹⁷Nirqantaq: —Ama manchakuychu, manan taytay Saulqa tarisunkichu. Qanpunin Israelpi reyqa kanki, ñoqataq qanman qatiq kamachikuq kasaq, taytaypas yachanñan chaytaqa, nispa.

¹⁸Chaypitaq Diospa sutinpi rimanakurqanku, chaymantan Jonatanqa wasinta kutipurqan, Davidtaq kaq Horespi qhepakurqan.

¹⁹Hinan Zif llaqtayoq runakunaqa Saulman willaq Gabaa llaqtaman rispa nirqanku: —Davidqa hallp'ayku ukhupin pakakushan, Jeshimonpa uran Horespi Hakilaq orqon qaqa-qaqapi.

²⁰Reyniyku, chayman rillayña, ñoqaykupas maskhaspa hap'iysisqaykikun, nispanku.

²¹Chaymi Saulqa kusisqa runakunata nirqan: —¡Señor Diosmi saminchasunkichis ñoqa khuyapayawasqaykichismanta!

²²Kunantaq valekuykichis, rispaykichis allinta qhawamunkichis maypichus kashasqanta pichus rikusqantawan, niwankutaqmi sinchi yuyaysapallaña kasqanta.

²³Chayrayku allinta qhawamuychis llapan pakakunankunata, hinaspa willawankichis allillantaña, ñoqapas qankunata riysinaypaq. Chay hallp'apipunichus kashan chayqa, ñoqa maskhasaq q'alata Judapa llapan ayllun ukhuta, nispa.

²⁴Hinan Saulpa qayllanmanta Zif llaqtayoq runakunaqa llaqtankuta ripurqanku. Davidtaq runankunantin kasharqanku Maón ch'inneqpi, Jeshimonpa uran Kachi Qocha qaylla pampapi.

²⁵Chaymantataq Saulqa runankunantin David maskhaq rirqanku. Chayta yacharqospataq Davidqa runankunantin rirqanku Maón ch'inneq qaqa-qaqaman. Saultaq chayta yachaspa Davidta qatiykachaq Maonman rirqan.

²⁶Hinaspan runankunantin orqoq wak qhatanta rirqanku, Davidtaq runankunantin Saulmanta aswanta karunchayta yuyaspa wakninta rirqanku. Saultaq ichaqa hap'inanpaq ña paykunata muyuriqninmanta wisq'arqosqaña.

²⁷Chayllamanmi Saulman huk willaq tariparqamurqan: —Usqhay haku, reyníy, Filistea runakunan suyunchisman haykurqamunku, nispa.

²⁸Chaymi Davidta qatiykachanantapas wikch'usparaq pasampurqan Filistea runakunawan maqanakuq. Chay hawataqmi chay cheqasta suticharqanku T'aqarikuna Qaqa nispa.

²⁹Chaymantan Davidqa Engadi qaqa-qaqapi pakakuq ripurqan.