Read Quechua Cuzco Bible 1988 1 SAMUEL 25 Bible Online

1 SAMUEL 25 - Quechua Cuzco Bible 1988 bible

1 SAMUEL 25

¹Samuelmi wañukapurqan, hinan llapan Israel runakunaqa huñuykukuspa llakisqa waqararqanku, Ramá llaqta wasinpitaq p'ampapurqanku. Chaymantataq Davidqa Parán ch'inneqta ripurqan.

²Maón llaqtapin tiyarqan huk qhapaq runa, kinsa waranqa ovejayoq waranqa cabrayoq. Yachasqapunin sapa kuti hina ovejankunataqa rutuchiq Carmel llaqtapi, chaypi qhatunayoq rantinayoq kaspa.

³Chay runan Caleb miraymanta karqan Nabal sutiyoq, payqa millay phiña uyan karqan maqllaraqtaq. Warmin Abigailñataq ichaqa allin yuyayniyoq munay uyayoq sumaq warmi karqan.

⁴Ch'inneqpi kashaspan Davidqa yacharqan Nabalpa oveja rutuchishasqanta,

⁵chaymi payqa chunka runankunata kacharparimuspan nirqan: — Carmel llaqtatan Nabalpata rinkichis, sutiypin napaykunkichis.

⁶Ninkichistaq: Q'aya wata kunan hinapas aswan allinraq kapusunki, wawaykikunapaqpas, wasiykipi lliw kaqkunapaqpas.

⁷Kunantaqmi yacharqoni oveja rutuchiypi kashasqaykita, qanpas yachankiñachá michiqniykikunaq ñoqaykuwan Carmelpi kasqanta. Ñoqaykuwan paykuna kashaqtinkuqa manan imallantapas qechuchirqaykuchu manallataq imanachirqaykupaschu.

⁸Munaspaqa michiqniykikunata tapuy, paykunan aswan allintaqa willasunki. Chayraykun qanta valekuyki, kay waynaykunata allillanta qhawaripuwanki, allin horasllapitaqmi hamushankupas. Kunantaqyari ima atisqallaykita paykunaman qoykapuway, ñoqapas churiyki hinan kani, nispaykichis, nispa.

⁹Davidpa runankunataq rispanku Nabalpaman chayaspa payman willarqanku Davidpa nisqankunata, hinaspan suyaykurqanku imatachus kutichinanta.

¹⁰Waynakunatataq Nabalqa phiñarikurqan: —¿Pitaq Isaipa churinri? ¿Pitaq Davidri? Kunanqa askhan sapa p'unchay patronninkumanta chinkakuqkunaqa kashan.

¹¹¿Imaynataq ñoqari qoyman rutuqniykunapaq wayk'uchikusqay mikhunata, ukyanata, aychatapas mana reqsisqay mana yachasqay runamanri? nispa.

¹²Hinan waynakunaqa ñanninkuta kutipurqanku, chayaspataq Davidman Nabalpa nisqanta llapanta willarqanku.

¹³Chaymi runankunata Davidqa nirqan: —Hakuchis espadaykichista apakuychis, nispa. Hinan runakunaqa chumpirqarikuspa espadankuta aparikurqanku, kaqllataq Davidpas. Paywan riqkunataq tawa pachak qharikuna karqan, wakin iskay pachaknintaq q'epita qhawaspa qheparqanku.

¹⁴Nabalpa runankunaq hukkaqnintaq chay uyarisqanta Nabalpa warmin Abigailman willarqorqan: —Davidpa waynankunan wiraqochaman hamusqa, payñataqmi millayta phiñarikuspa kutichin.

¹⁵Chay runakunaqa sumaqllañan ñoqaykupaqqa karqan, campopi paykunawan tiyamushaqtiykupas manan imaykutapas qechuwarqankuchu, manataq imanawarqankupaschu.

¹⁶Tuta p'unchaymi amachawarqanku ñoqaykutapas uywanchistapas.

¹⁷Qanpa wiraqochaykin ichaqa millaypuni mana piqpapas imanirqonan, ¿icha imallatapas ruwawaqchu? Kunan Davidqa ima mana allintaraqchá ruwanqa Nabalta aylluntapas, nispa.

¹⁸Chaymi Abigailqa usqhaylla q'epicharikurqan iskay pachak t'antata, iskay qara p'uyñu vinota, phisqa oveja aycha kankata, phisqa arroba hank'ata, pachak pasas k'umpakunata, iskay pachak higos k'umpakunatawan, chaykunatan llapanta asnokunapi cargaykukurqan.

¹⁹Hinaspan runankunata nirqan: —Qankuna ñawpashaychisña, ñoqataq qhepataña hamusaq, nispa. Manataq qosanmanqa imatapas willarqanchu.

²⁰Abigailqa huk asnopi sillaykukuspan tiyasqan orqomanta pakayllanta uraykurqan. Chayllamanmi Davidta runankunantinta rikurqan pay cheqasman hamushaqta.

²¹Davidtaq yuyaykusharqan: Yanqamá chay runaq lliw kaqnintaqa ch'inneqpi waqaychashasqani mana imantapas llamiykuspa, paytaq ichaqa allinta ruwashaqtiy mana allinwan kutichiwan.

²²Kunantaq chay awqayta llapa qharikunantinta wañurqarichimusaq mana hukniyoqta, mana hinata ruwaqtiyqa Señor Dios ñoqata ñak'arichiwachun, nispa.

²³Davidman tariparqospataq, Abigailqa usqhaylla asnonmanta sillaqakuspa Davidpa ñawpaqenpi qonqoriykukuspa pampakama k'umuykukurqan.

²⁴Chakinman qonqoriykukuspataq nirqan: —Wiraqocháy, hukta huchachanaykitaqa ñoqata aswan huchachaway. Uyariykuwaypuni rimapayasqayta.

²⁵Ñoqaqa waynaykikunata kachamushaqtiykiqa manan chaypichu karqani. Chhaynaqa ama kasuychu chay uma muyusqa Nabaltaqa, imaynachus sutinqa Nabal[3] hinapuni payqa mana yuyayniyoq, imatapas manan yuyaywanpunichu ruwan.

²⁶Aswanpas Señor Diosmi manaraq munanchu qanpa hamuspayki yawar unuta ruwaspa makiykiwan awqaykita wañuchinaykita. Señor Diosraykun qanraykun jurani, qanta llapan mana allin ruway munaqkunaqa awqaykipiwan Nabal hina ruwasqapuni kachun.

²⁷Wiraqocháy, chaskiykuwayyá kay apamusqay mikhunakunata, hinaspa rakiykuy runaykikunaman.

²⁸Hinallataq valekuyki pampachaykuwanaykita kay warmi kamachiykita. Señor Diosmi qantaqa takyachisunki wawaykiq wawankama kamachikuq-kayniykita, Señor Diosrayku maqanakuq kasqaykimanta, hinallataq tukuy p'unchay kawsayniykipi mana ima mana allinpas kasunkichu.

²⁹Pillapas qanta wañuchinanpaq maskhaspa qatiykachaqniykimantaqa Apu Señor Diosniykin waqaychasunkipuni, awqaykitan ichaqa kikin Señor Diospuni rumi warak'asqata hina warak'arparinqa.

³⁰Chhaynaqa Señor Diospa llapan qanmanta allin nisqankuna hunt'akuqtin, Israelpipas umalliqta churaykusuqtiyki,

³¹qanqa aman llakikunkichu amataq sonqoykipipas phutikunkichu mana huchayoqta wañuchisqaykimanta, qan kikiykiq munayniykiman hina wañuchisqaykimantapas. Señor allinta ruwasuqtiykiqa, ñoqamantaqa yuyarikuwankipunin, nispa.

³²Chaymi Davidqa nirqan: —Saminchasqa kachun Israelpa Diosnin Señorqa ñoqaman qanta taripachimuwasqanmanta.

³³Saminchasqataq qanpas yuyaykusqaykipas kachun, ñoqa kikiy munayniyman hina makiykunawan wañuchispa yawar unuta ruwanay kashaqtin hark'aykuwasqaykimanta.

³⁴Israelpa Diosnin Señorpa sutinpi niyki, paymi mana allin ruwanaymanta hark'aykuwan, manachus qan usqhaylla taripamuwankiman karqan chayqa, qhariyki Nabalqa runankunantin manan kawsashaqñachu illarinkuman karqan, nispa.

³⁵Davidtaq chaskiykurqan payman apasqan mikhunakunata, hinaspan niykurqan: —Kunanqa kusisqa wasiykiman kutipuy, rikushankipas hina niwasqaykikunata uyariykin, mañakusqaykitapas kasuykitaqmi, nispa.

³⁶Abigail wasinman kutipunanpaqtaq qharin Nabalqa hatun mikhuyta ruwasqa reypaq hinaraq, kusisqan kasharqan sinchi machasqallaña, chayraykun payqa mana ima nirqanpaschu qhepantin p'unchaykama.

³⁷Tutamantanñataq Nabalpa machasqan thaniraqtin rikch'arimurqan, Abigailtaq llapanta willarqan imakunachus pasasqanta, chaymi Nabalpa sonqonqa qonqaylla phatarqorqan manataq kuyurirqanñachu.

³⁸Chunka p'unchaymanta hinataq Señor Diosqa Nabalta wañurqachipurqan.

³⁹Nabalpa wañukapusqanta uyarispataq Davidqa nirqan: — ¡Saminchasqa Señor Diosqa kachun, Nabalpa millay nimuwasqanmanta pay kutichin! Mana allin ruwanayta hark'aykuwaspataq, Nabal kikinman kutichin mana allin ruwawasqanta, nispa. Chaymantataq payqa Abigailman kacharqan rimaykuqta, icha paywan casarakuyta munanmanchus chay tapuykuqta.

⁴⁰Kamachinkunataq Carmel llaqtata Abigailman chayaspa nirqanku: —Davidmi kachamushawanku: Qantan warminpaq munasunki, nispanku.

⁴¹Chaymi warmiqa qonqoriykukuspan nirqan: —Ñoqaqa huk kamachillan kani, chay hinaqa wiraqochaypa runankunaq chakin maqchiqllaqa kasaqmi, nispa.

⁴²Chaymantataq asnonpi sillaykukuspa, phisqa sipasninkunantin puririrqan Davidpa runankunaq qhepanta, chhaynapin Davidwan casarakapurqan.

⁴³Davidqa casarakullarqantaqmi Jezreel llaqtayoq Ahinoamwan, iskayninkutaq warminkuna karqanku.

⁴⁴Davidpa warmin Mikaltataq taytan Saulqa qoykakapurqan Galim llaqtayoq Laispa churin Paltiman warminpaq.