Read Quechua Cuzco Bible 1988 1 SAMUEL 26 Bible Online

1 SAMUEL 26 - Quechua Cuzco Bible 1988 bible

1 SAMUEL 26

¹Zif llaqtayoq runakunan Saulman willaq Gabaa llaqtakama rispa nirqanku: —Davidmi pakakushan Jeshimonpa chimpan Hakila orqopi, nispanku.

²Chaymi Saulqa David maskhaq Zif ch'inneqman puririrqan Israelmanta kinsa waranqa allichachaq qharikunantin.

³Chayman chayaspan qaynarqanku llapanku Jeshimonpa chimpan ñan pata Hakila orqopi. Davidtaq chay ch'inneqpi kashaspa repararqan Saulpa chaykama qatipamusqanta,

⁴chaymi qhawaqkunata kachamurqan Saulpunichus hamusqa chayta reqsinankupaq.

⁵Hinaspan Davidqa Saulpa qaynasqanman usqhaylla rirqan, chaypitaq allinta qhawararqan may cheqaspichus Saulpa puñusqanta ejercitonpa umallin Nerpa churin Abnerpa puñusqantawan. Saultaq qorpachakusqankupipuni puñushasqa soldadonkuna chawpipi.

⁶Chaymi Davidqa tapuykurqan Sarviaq churin Joabpa wawqen Abisaita Het runa Ahimelektawan: —¿Mayqenniykichismi ñoqawan riwaqchis Saulpa qaynasqanman? nispa. Abisaitaq nirqan: —Ñoqan riysisqayki, nispa.

⁷Chay tutapachataq Davidqa Abisaipiwan qaynasqankuman rirqanku, Saultan tarirqanku pampapi puñushaqta. Sawnanan qayllapitaq lanzanqa pampaman sat'iykusqa sayasharqan, muyuriqninpitaq Abnerqa soldadonkunapiwan puñusharqanku.

⁸Hinaspan Davidta Abisaiqa nirqan: —Kayqa awqaykita Diosninchis hap'iykachisunkin. Kunanqa ñoqalla lanzanwan hukpaqkamallaña pampaman mana ñak'arichispa sat'irqapusaq, nispa.

⁹Davidtaq ichaqa nirqan: —Ama wañuchiychu. ¿Pitaq Señor Diospa akllakusqan reyta wañuchispa mana huchachasqari qhepakunman?

¹⁰Señor Diosmi yachan, paymi kawsay qechuqqa, onqoypipas maqanakuypipas.

¹¹Ñoqataqa Señor Dios waqaychawachun paypa akllakusqan contra huchallikunaymanta. Aswanpas lanzanta unu jarrontawan aparikuspa hakuchis, nispa.

¹²Chay hinatan Davidqa Saulpa sawnananpi lanzanta unu jarrontawan hoqarispa aparikurqan. Manataq pillapas paykunata rikurqanchu uyarirqanpaschu manallataq rikch'arirqankupaschu. Llapallankun puñusharqanku Señor Diosqa paykunata misk'ita puñuchisqanrayku.

¹³Chaymanta pasapuspataq Davidqa wayq'o chimpa orqo patamanta sayaykamurqan, Saulpa kasqanmantaqa karuraqmi karqan.

¹⁴Hinaspataq Davidqa kunkayoqta waqyamurqan Nerpa churin Abnerta soldadonkunatawan: —¡Yaw Abner, uyariway! nispa. Abnertaq nirqan: —¿Pitaq qanri kanki reyta waqyamuq? nispa.

¹⁵Niqtinmi Davidqa nirqan: —¿Pitaq qan hina Israelpi? ¿Manachu qan qhari kanki? Chayri, ¿imanaqtintaq reytari mana amachankichu, huk runa reyman wañuchiy yuyaywan haykumushaqtinri?

¹⁶Chay ruwasqaykiqa manan allinchu, Señor Diosmi yachan, qankunaqa llapaykichismi wañuchinapaq kankichis, Señor Diospa akllakusqanta mana qhawasqaykichismanta. Kunanri maytaq reypa unu jarronpas sawnananpi kashaq lanzanpas? nispa.

¹⁷Davidpa kunkanta reqsirqospataq Saulqa nirqan: —¿Manachu waway Davidpa kunkayki chayqa? nispa. Chaymi Davidqa nirqan: —Arí, ñoqaqpunin, reyníy.

¹⁸Qanrí, ¿imanaqtintaq khaynata kamachiykita qatiykachawanki? ¿Imatapunitaq ruwarqani? ¿Ima huchaytan ñoqapi tarinki?

¹⁹Kunanmi valekuyki, reyníy, kay kamachiykita uyariykuwanaykita. Señor Dioschus tanqarisunki ñoqa qatiykachawanaykipaq chayqa, may kusachá kanman sumaq kawsay sacrificiowanqa tukukapunmanmi. Runakunataqchus tanqarisunki chayqa, paykunataqa Señor Diospuni ñakachun, ñoqata Señor Diospa hallp'anmanta wikch'uwaspanku: Wak dioskunata servimushachun, niq hina tanqarpariwasqankumanta.

²⁰Ama Señor Dios munachunchu paymanta karupi wañunayta. ¿Imaraykun, reyníy, piki maskhaq hina otaq p'isaq maskhaq hinaraq maskhawanki orqo-orqonta? nispa.

²¹Hinan Saulqa kutichirqan: —Wawalláy David, reqsikunin huchallikusqayta, mana yuyayniyoq hina purispaymi hatuntapuni pantasqani. Chhaynaqa kutipuyyá, manan kunanmantaqa mana allinniykita maskhasaqñachu, kunan p'unchay kawsayniyta khuyapayaykuspa mana wañuchiwasqaykimanta, nispa.

²²Chaymi Davidqa nirqan: —Kaymi lanzayki kashan, reyníy, huk soldadoykita kachamuway apachimpunaypaq.

²³Señor Diostaq sapankaman kutichipuchun cheqaq kasqanman hina, hunt'aq kasqanman hina. Hinaña Señor Dios qanta makiyman hap'iykachiwashaqtinpas, manan ñoqaqa munarqanichu qan reyniyta wañuchiyta Señor Diospa akllasqan kaqtiyki.

²⁴Imaynan kunan kawsayniykita khuyapayasqayman hina Señor Diospas khuyapayawaspa tukuy llakikuymanta horqowachun, nispa.

²⁵Saultaq nirqan: —Wawalláy David, qanqa saminchasqapunin kanki. Tukuy ruwasqaykipipas qanqa ñawpaqmanpunin rinki, nispa. Niykuspataq wasinta kutipurqan, Davidpas ñanninta ripurqan.