Read Quechua Cuzco Bible 1988 1 SAMUEL 27 Bible Online

1 SAMUEL 27 - Quechua Cuzco Bible 1988 bible

1 SAMUEL 27

¹Davidtaq sonqonpi yuyaykurqan: Ima p'unchaychá Saulpa wañuchisqan kasaq, aswan ripusaq Filistea suyuman, chaypi kaqtiyqa Saulpas mana maskhawanqañachu llapan Israel suyu ukhupi. Chay hinapin paymantaqa chinkakapusaq, nispa.

²Chaymi soqta pachak runantin Davidqa ripurqan Gat llaqtata rey Maokpa churin Akispata.

³Chaypitaq Gat llaqtapi Akiswan kuska tiyakurqanku, sapankanku wawantin warmintinkama, Davidpas iskaynin warmintin, Jezreel llaqtayoq Ahinoam, Carmel llaqtayoq Nabalpa viudan Abigail ima.

⁴Saultaq yacharqorqan Gat llaqtaman Davidpa ripusqanta, chaymi manaña paytaqa maskharqanñachu.

⁵Akistataq Davidqa nirqan: —Allinpaq qhawariwanki chayqa ama hinachu kay, suyuykipi huk cheqas llaqtata qowayku tiyakunaykupaq, manamá allinchu reypa tiyanan llaqtapi kay kamachiykikunaq tiyanaykuqa, nispa.

⁶Mañakusqanman hinataq Akisqa Siklag llaqtata tiyanankupaq qorqan, chaymi chay p'unchaymantapacha Siklag llaqtaqa Judá suyuman yupasqa kapurqan.

⁷Davidtaq wata tawa killanta Filistea hallp'api tiyarqan.

⁸Siklag llaqtamantataq runakunantin lloqsirqan llat'anaq Gesurpa mirayninta, Gezriq mirayninta, Amalek runakunatawan. Paykunan chay suyu uray ladopi ñawpaqmantapacha tiyakurqanku Shur ch'inneqkama Egipto suyukama ima.

⁹Chay hallp'akunamanmi phawaykuqku manataq qharitapas warmitapas manaqa wañuchiqkuchu. Chaymantapas qatiykakamuqku ovejakunata, wakakunata, asnokunata, camellokunatapas, hinallataq aparikamuqku p'achakunatapas. Chaymantataq Akispa kasqanman kutimuqku.

¹⁰Akistaq tapukuyta yachaq: ¿Ima llaqtatan kunan kutiqa llat'anarqamunkichis? nispa. Davidtaq kutichiq: Neguev ch'inneqpi tiyaq Judá runakunatan, nispa, otaq: Neguev ch'inneqpi tiyaq Jerameelpa miraynintan, nispa, otaq: Neguev ch'inneqpi tiyaq Kayin runakunatan, nispañataq.

¹¹Davidqa llapallantan qharitapas warmitapas wañuchimuq, paypa imachus ruwasqankunata Gat llaqtaman willakuq mana rinankupaq. Filistea hallp'api tiyashaspan Davidqa tukuy tiempo ahinallatapuni ruwaq.

¹²Akistaq Davidpa nisqanta cheqaqpaq hap'irqan, chaymi nirqan: —Kayqa kamachiypunin kapunqa, llaqtanpas cheqnikapunñataq chayqa, nispa.