Read Quechua Cuzco Bible 1988 1 SAMUEL 28 Bible Online

1 SAMUEL 28 - Quechua Cuzco Bible 1988 bible

1 SAMUEL 28

¹Chay p'unchaykunataq Filistea runakunaq Israelwan maqanakunanpaq soldadonkunata huñuykusharqan. Chaymi Davidta Akisqa nirqan: —Maqanakuymanmi kunan qanqa ñoqawan rinki runaykikunapiwan, nispa.

²Davidtaq nirqan: —Kusa allinmi, kunanmi qan yachanki imatachus kamachiyki ruwasaq chayta, nispa. Akistaq payta nirqan: —Chay hina kaqtinqa, ñoqa kikiyta guardiaqpa umallintan pasaqpaq churasqayki, nispa.

³Samuel wañukapuqtinñan kikin Ramá llaqtanpi p'ampaykuspanku Israel runakuna waqaraytapas thaniqtinkuñan, Saulqa llapan watuqkunata wañusqakunaq almanta tapuspa rimachiqkunatawan Israel suyumanta wikch'usqa.

⁴Chaykuna qhepatataq Filistea runakunaqa huñuykukuspa hatarimurqanku, hinaspan Sunem llaqtapi qaynarqanku. Kaqllataq Saulpas Israel runakunantin huñuykunakuspa lloqsillarqantaq Gilboa orqoman qaynaq.

⁵Filistea soldadokunata rikurqospataq Saulqa pasaqta mancharikuspan sonqonpi muspharqan.

⁶Chaymi payqa Señor Diosta tapuykurqan, Señor Diostaq payta mana ima nirqanpaschu, manapunin mosqoyllapipas, Urimnintapas, profetakunaq siminwanpas.

⁷Hinan payqa oficialninkunata nirqan: —Pasaychis, wañusqakunaq almanta tapuspa rimachiq warmita maskhamuychis, paywan ñoqa tapuchikunaypaq, nispa. Chaymi oficialninkunaqa kutichirqan: —Kanmi Endor llaqtapi huk warmi, nispa.

⁸Hinan Saulqa chay tutapacha wak p'achawan churarqokuspa iskay runantin chay warmiqta rirqan, hinaspa nirqan: —Ama hinachu kay, watuykapuway, chayachimpuway mayqen wañusqatachus munasqayta, nispa.

⁹Warmitaq payta nirqan: —Qanmi aswan allinta yachanki, kay llaqtamanta llapan watuqkunata wañusqakunaq almanta tapuspa rimachiqkunatawan Saulqa wikch'usqanta. ¿Imaraykutaq hamuwanki? Icha, ¿wañunaytachu munanki? nispa.

¹⁰Chayta niqtinmi Saulqa jurarqan: —Señor Diosmi yachan, manan ima mana allinpas kasunkichu, nispa.

¹¹Warmitaq payta nirqan: —¿Pitan munanki chayachimunayta? nispa. Chaymi payqa nirqan: —Samueltan, nispa.

¹²Warmitaq Samuelta rikurqospa manchayta qaparirqan, Saultataq nirqan:

¹³—¿Imapaqmi q'otuwanki? ¡Qanqa Saulmá kashasqanki! nispa. Chaymi rey Saulqa nirqan: —Ama mancharikuychu. ¿Imatan rikurqonki? nispa. Warmitaq nirqan: —Huk kukuchitan hallp'amanta suchurqamushaqta rikurqoni, nispa.

¹⁴Saultaq tapuykurqan: —¿Imaynataq kasqari? nispa. Warmitaq nirqan: —Huk yuyaqmi llaqollawan p'istuykusqa, nispa. Chaymi Saulqa entienderqan Samuel kasqanta, hinaspan qonqoriykukurqan, pampakamaraq uyanpas tuparqan.

¹⁵Samueltaq payta nirqan: —¿Imanaqtinmi samakushaqta hatarichimuwanki hamunaypaq? nispa. Saultaq nirqan: —Ñoqan sinchi phutisqa kashani, Filistea soldadokunan hatarimunku ñoqawan maqanakuq, Diospas saqerparipuwanmi, manapunin kutichimuwanchu profetakunaq siminwanpas mosqoypipas. Chayraykun qanllataña waqyachikamuyki ima ruwanaytapas willaykuwanaykipaq, nispa.

¹⁶Samueltaq payta nirqan: —¿Imapaqñataq ñoqatapas tapukuwankiri? Señor Diospas manaña uyarishaqtin, awqaykiñataq kanpas chayri.

¹⁷Señor Diosmi ñoqawan willachirqasunki qanmanta rey-kayniykita qechupuspa puriqmasiyki Davidman qoykapunanta, chaymi kunan hunt'akushan.

¹⁸Qanqa manan Señor Diosta kasurqankichu: Amalek runakunata ch'usaqyachimuy, nishaqtinpas, chayraykun Señor Diosqa kayta ruwashasunki.

¹⁹Hinaspapas Señor Diosmi Israel runakunata qantawan Filistea runakunaman hap'iykachinqa. Paqarinmi qanpas churiykikunapas ñoqawan kankichis, hinallataq Señor Diosqa Filistea runakunawan Israel soldadokunata atipachinqa, nispa.

²⁰Saultaq kaq ratopacha pampa qhawantin kumpakapurqan, Samuelpa nisqankunamanta llakikuspa yuyayninraq chinkarqan, manataq kallpanpas karqanñachu, chay kikin p'unchay tutantin mana imallatapas mikhusqanrayku.

²¹Chaymantataq warmiqa Saulman chimpaykurqan, pasaq llaksasqallaña kashasqanta reparaspataq nirqan: —Kayqa niwasqaykita ruwani, wañuytapas mana manchakusparaq kamachiwasqaykita kasuyki.

²²Qantapas valekuykin nisqayta uyariwanaykita. Kunan mikhunata aparqamusqayki chayta mikhuykunki, chaywan kallpachaykukuspa ripunaykipaq, nispa.

²³Saultaq ichaqa mana mikhuyta munarqanchu. Oficialninkunataq chay warmipiwan mat'iykurqanku mikhunanpaq, chayraqmi kasuspa tiyarirqan, hinaspa puñuna patapi tiyaykurqan.

²⁴Chaykamataq warmiqa wira torillonta nak'arqochirqan, hak'umantapas mana qonchuyoq t'antata ruwarqorqan.

²⁵Hinaspan warmiqa Saulman oficialninkunamanwan aparqamurqan mikhunankupaq, paykunataq mikhuykuspanku chay tutapacha ripurqanku.