Read Quechua Cuzco Bible 1988 1 SAMUEL 30 Bible Online

1 SAMUEL 30 - Quechua Cuzco Bible 1988 bible

1 SAMUEL 30

¹Kinsa p'unchaymantaña Davidqa runankunantin Siklag llaqtaman chayarqamunankupaqtaq, Amalek runakunaqa Neguev ch'inneqninta phawaykuspa Siklag llaqtata llat'anarqospa kanaykusqaku.

²Hinallataq warmikunata, wawakunata, qharikunatapas, chaypi kaqkunata watucharqosqaku, mana pitapas wañuchispa.

³David runankunantin chayamuspankutaq llaqtata ninawan kanaykusqata, warmikunatapas lliw wawakunatapas aparqapusqata tarirqanku.

⁴Chaymi qaparispa waqararqanku kallpankuq chiriyanankamaraq.

⁵Davidpa iskaynin warminkuna Jezreel llaqtayoq Ahinoamta, Carmel llaqtayoq Nabalpa viudan Abigailtapas apallasqakutaq.

⁶Soldadokunapas llapallanku wawankumanta phutisqa kaspanku Davidta ch'aqeyta yuyaykusharqanku, chaymi Davidqa sinchi llakisqallaña kaykusharqan. Chaytukuypiwanpas payqa Apu Señor Diosnillanpi kallpachakusharqan.

⁷Hinaspan Ahimelekpa churin Abiatarta nirqan: —Ama hinachu kay, Diospa munaynin tapuna Urimniyoq Tumimniyoq unkuta aparqamuway, nispa. Abiatartaq unkuta Davidman aparqamurqan,

⁸hinan Davidqa Señor Diosta tapuykurqan: —¿Chay llat'anaq suwakunata qatipasaqchu? ¿Atiymanchu taripayta? nispa. Señor Diostaq nirqan: —Qatipay, taripaspaykin apasqakunata qechumunki, nispa.

⁹Chaymi Davidqa kaq ratopacha soqta pachak runankunantin puririrqan, Besor ukhu wayq'o pataman chayaspataq chaypi wakin qhepakurqanku.

¹⁰Davidtaq tawa pachak runallantinña chay wayq'ota chimparqan, iskay pachak runataq qhepakapurqanku, wayq'ota mana chimpayta atispanku sinchi sayk'usqa kasqankurayku.

¹¹Ñan purisqanku pampapitaq Egipto suyu waynata tarirqanku. Paytataq Davidman pusarqorqanku, hinaspan mikhunata ukyanata qorqanku.

¹²Qollarqankutaq higos k'umpa phasmita, iskay k'umpa pasastawan. Chaykunata mikhuykuspataq Egipto suyu waynaqa chayraq kallpacharikurqan, kinsa p'unchay kinsa tutaña mana ima mikhusqa ukyasqa kasqanmanta.

¹³Chaymantataq Davidqa tapuykurqan: —¿Pin uywaqeyki? ¿Maymantan hamushanki? nispa. Waynataq kutichirqan: —Egipto suyumantan kani, Amalek runaq kamachin, ichaqa onqosqa kaqtiymi kinsa p'unchayña uywaqey wikch'upuwarqan.

¹⁴Ñoqaykuqa rirqayku llat'anaqmi Neguev ch'inneqpi tiyaq Keret runakunata, Judapi wakin runakunata, Neguev ch'inneqpi tiyaq Calebpa mirayninkunatawan, hinallataq Siklag llaqtatapas ninawan kanaykamurqayku, nispa.

¹⁵Hinan Davidqa tapuykurqan: —¿Chay llat'anaq t'aqaman pusarqowankimanchu? nispa. Egipto waynataq kutichirqan: —Arí, paykunaman pusarqosqaykin, ichaqa juray Diospa sutinpi ama wañuchiwanaykipaq, amallataq uywaqeymanpas hap'iykachiwanaykipaq, nispa.

¹⁶Llat'anaqkunaq kasqanman pusarqoqtintaq, chay runakunaqa hinantin pampapi ch'eqeykusqa mikhushasqaku, ukyashasqaku, tusushasqaku ima, llapan Filistea hallp'amanta Judá hallp'amantawan llat'anaykusqankumanta.

¹⁷Hinan Davidqa qhepantin paqar chayllaraq illarimuymantapacha wañurachiyta qallarirqan ch'isiyaqnintinta. Tawa pachak camellopi sillaykusqa waynakunallañan ayqerikuyta atirqanku.

¹⁸Chay hinatan Davidqa Amalek runakunaq llapan apasqankunata qechukampurqan, iskaynin warminkunatapas pusakampullarqantaq.

¹⁹Llat'anasqanku runamantapas wawamantapas kaqninkunamantapas lliw imapas llapallanmi kashasqa, llapallantan Davidqa apakampurqan.

²⁰Chaymantapas Davidqa hap'illarqantaq ovejakunata wakakunatapas, chaykunatataq qatimurqanku: Davidpa tarikamusqan uywan, nispanku.

²¹Hinaspan Davidqa kutimpurqan chay iskay pachak runakunaq kasqanman, paykunaqa sinchi sayk'usqa-kaymantan mana riysispa Besor ukhu wayq'o patallapi qhepakurqanku. Chaymantan Davidman runankunamanwan napaykuq tariparqanku, Davidtaq paykunaman qayllaykamuspa sumaqta napaykurqan.

²²Davidwan riq runakunamantan karqanku wakin millay mana chanin runakuna, paykunan nirqanku: —Manan imatapas qokunmanchu llat'anasqa apakamusqanchismantaqa mana riysiwaqninchiskunamanqa. Wawankuta warmillankutawan hap'ikapuchunku, hinaspa ripuchunku, nispa.

²³Niqtinmi Davidqa paykunata nirqan: —Wawqeykuna, kaytaqa ama ruwaychischu Señor Diospa llapan qoykuwasqanchiswanqa, paymi kawsayninchistapas waqaychaqqa, chay llat'anaqninchis suwakunatapas hap'iykachiwaqninchisqa.

²⁴Chay hinata niqtiykichisqa, ¿pitaq “allinmi” ninman? Phasminakusunchis chayqa, llapan kuskata chaskisunchis, q'epi qhawaqpas, maqanakuyman riqwanpas, nispa.

²⁵Chay p'unchaymantan unanchakurqan chay chaninchanakuy Israel llaqtaq ruwananpaq.

²⁶Siklag llaqtaman chayaspataq Davidqa Judapi reqsinakuq masin kurak runakunaman llat'anamusqankumanta wakinninta apachirqan: Kayqa qankunapaq huk qokuy, Señor Diospa awqankunamanta qechumusqaykuq wakinnin, nispa.

²⁷Chaytan apachirqan Betel llaqtapi kaqkunaman, Neguevpi kaq Ramot llaqtamanpas, hinallataq Jatir llaqtaman,

²⁸Arad llaqtaman, Sifmot llaqtaman, Estemoa llaqtaman,

²⁹Rahal llaqtaman, Jerameelpa miraynin llaqtakunaman, Kayin runakunaq llaqtankunaman,

³⁰Horma llaqtaman, Borasán llaqtaman, Atak llaqtaman,

³¹Hebrón llaqtamanpas. Runankunantin purimusqanku llapan llaqtakunamanmi apachirqan.