Read Quechua Cuzco Bible 1988 1 SAMUEL 4 Bible Online

1 SAMUEL 4 - Quechua Cuzco Bible 1988 bible

1 SAMUEL 4

¹Chaymi Samuelpa rimasqantaqa llapa Israel runakuna uyarishallarqanpuni. Chay p'unchaymi Israel runakunaqa Filistea runakunawan maqanakuq lloqsirqanku, hinaspan qaynarqanku Yanapay Qaqa nisqa cheqaspi, Filistea runakunataq Afek llaqtapi.

²Filistea runakunan Israel runakunawan maqanakunanpaq sayaykurqanku, maqanakuspankun Israel runakunata atiparqanku, maqanakuna pampapitaq wañuchirqanku tawa waranqa runata.

³Wakmanta karpa-karpankuman kutimuspankutaq Israel kurak runakunaqa nirqanku: —¿Imanaqtintaq Señor Diosri Filistea runakunawan atipachiwanchis? Hakuchisyá Silo llaqtata, hinaspa Señor Diospa rimanakuynin cajata aparqamusunchis, ahinapin ñoqanchiswan kaspa awqanchismanta kacharichiwasun, nispa.

⁴Hinaspan runakunata Silo llaqtaman kacharqanku raphrayoqkunaq chawpinpi tiyaq Tukuy-atiyniyoq Señor Diospa rimanakuynin cajanman, apamurqankutaq Elipa iskaynin churinkunapiwan kuska.

⁵Karpa-karpaman Señor Diospa rimanakuynin cajata apamuqtinkutaq, llapallan Israel runakuna kusikuymanta pacha kuyuytaraq qaparkacharqanku.

⁶Chay qaparkachayta uyarispataq, Filistea runakunaqa ninakurqanku: —¿Ima qaparkachaytaq kashan Hebreo runakunaq karpa-karpanpiri? nispanku. Señor Diospa cajanta apamusqankuta yachaspankun,

⁷Filistea runakunaqa mayta mancharikuspa nirqanku: — ¡Diosmi karpa-karpaman hamurqon! ¿Imanaykusuntaq kunanqa? Manamá hayk'aqpas khaynaqa pasarqanchu.

⁸¿Imanaykusuntaq kunanqa? ¿Pillapunitaq chay atiyniyoq dioskunaq makinmanta qechuwasunchis? ¡Chay dioskunan Egipto runakunatapas tukuy muchuchiywan ch'inneqpi wañuchiqqa!

⁹¡Kallpachakuychis Filistea runakuna! ¡Qhari hina maqanakuychis ama Hebreo runakunaq kamachin kananchispaq imaynachus paykunapas kamachinchis karqan chay hinaqa! ¡Aswanta qhalichakuychis! nispa.

¹⁰Chaymi Filistea runakunaqa maqanakuspa Israel runakunata atiparqanku, chaypin wañurarqanku kinsa chunka waranqa chakillapi maqanakuq Israel runakuna, wakintaq wasinkuman ayqekapurqanku.

¹¹Chayllapitaqmi Diospa cajanpas qechusqa kapurqan, Elipa churinkunapas Ofniwan Fineespiwan wañuchisqa karqanku.

¹²Chay kikin p'unchaypachataq Benjamín ayllu qhariqa maqanakuymanta phawarispa Silo llaqtakama chayarqorqan, p'achanpas llik'i-llik'i, umanpas hallp'akama.

¹³Chayananpaqtaq Eliqa ñan patallapiña tiyaykuspa suyasharqan, Diospa cajanmanta sonqonpi sinchi llakisqa. Chay runaq willakusqanta llaqtantin yacharqospataq, llapallanku qaparirqanku.

¹⁴Elitaq chay qaparkachayta uyarispa: —¿Ima qaparkachaymi chay? nirqan. Hinan usqhaylla chay runaqa phawarimuspa Eliman willaykurqan.

¹⁵Eliqa yuyaqñan karqan, isqon chunka pusaqniyoq watayoq, ñawinpas manañan rikurqanchu.

¹⁶Chaymi chay runaqa Eliman willarqan: —Ñoqan maqanakuymanta kunallan ayqerqamuni, nispa. Hinan Eliqa tapuykurqan: —¿Imataq kunanri karqon? nispa.

¹⁷Willakuqtaq nirqan: —Filistea runakunamanta Israel runakuna ayqerikapunku, chhaynapin pasaq atipasqa rikukapuyku, churiykikunatapas Ofnitawan Fineestawan wañurqachipunku, Diospa cajantapas qechurqapuwanku, nispa.

¹⁸Elitaq Diospa cajanmanta willakusqanta uyarispa hina, punkupi tiyananmanta qhepaman wikch'ukurqan. Much'unta pampaman chayachikuspataq kaq rato wañukapurqan, yuyaq kaymanta llasa kaymantawan. Eliqa Israel runakunaq uma qollananmi tawa chunka watantin karqan.

¹⁹Elipa qhachunin Fineespa warmintaq hunt'a onqoq kasharqan, wachakunan patallapiña. Diospa cajan apapusqankuta, suegronpas qosanpas wañukapusqantawan uyarispataq, kaq ratopacha wachakuy onqoywan hap'ichikuspa wachakurqan manaraq killan hunt'akushaqtin.

²⁰Wañunayaq hina karqoqtintaq, paywan kaq warmikunaqa nirqanku: —Ama mancharikuychu, qharin wawayki kasqa, nispanku. Paytaq mana rimarirqanñachu uyarirqanpasñachu.

²¹Wawantataq Ikabodta[2] suticharqan: ¡Israelmantan Diospa qhapaq-atiynin ripun! nispa, Diospa cajan qechusqa kapusqanrayku, hinallataq suegron Elipas qosanpas wañukapusqanrayku.

²²Chaymi nirqan: Diospa cajan qechusqa kapusqanwanmi Israelmanta Diospa qhapaq atiynin ripun, nispa.