Read Quechua Cuzco Bible 1988 1 SAMUEL 6 Bible Online

1 SAMUEL 6 - Quechua Cuzco Bible 1988 bible

1 SAMUEL 6

¹Señor Diospa cajantaq Filistea runakunaq suyunpi qanchis killa kamurqan.

²Chaymantataq Filistea runakunaqa waqyarqan llapan sacerdotenkunata watuqninkunatawan: —¿Imatataq ruwasun Señor Diospa cajanwan? Willawaykuyá imaynatachus maypichus kasqanman kutichipunanchista, nispanku.

³Chaymi paykunaqa nirqanku: —Israelpa Diosninpa cajanta kutichipuyta munankichis chayqa, ama mana imayoqtaqa apachipuychischu, aswanpas huchaykichis pampachachiq regalotawan kutichipuychis. Chhaynapin qhaliyankichis, yachankichistaq imamantachus sinchita Dios ñak'arichisqasuykichista, nispa.

⁴Paykunataq nirqanku: —¿Ima regalotataq apachisunmanri? nispa. Hinan paykunaqa kutichirqanku: —Phisqa uma qollanakunataq llaqtanchispi kanku chayqa, chayman hina ruwaychis phisqa qori ch'uputa phisqa qori huk'uchatawan, chay kikin onqoyllawan ñak'arisqaykichisrayku.

⁵Chay hinaqa ruwarqoychisyari ch'upuykichis kasqallanta, hallp'aykichis q'aruq huk'uchatapas kaqllatataq, hinaspataq Israelpa Diosninta hatunchaykunkichis, ichapaschá manaña Diosqa phiñakunmanchu qankunamantapas, diosniykichismantapas, hallp'aykichismantapas.

⁶Amayá qankunaqa sonqoykichista rumiyachiychischu Egipto runakunapas rey Faraonpas rumiyachikurqan hinataqa. Paykunatapas Diosqa imaymanawanmi ñak'arichirqan, chayraqmi Israel runakunata kacharimurqanku.

⁷Kunanqa mosoq carretata ruwarqoychis, chaytataq iskay uñayoq wakakunaq waqranman yugowan wataykuspa aysaykachinkichis, uñantataq waka kanchaman wisq'amunkichis.

⁸Hinallataq Señor Diospa cajantapas carretaman churaykunkichis, ladonmantaq huchaykichismanta regalota huk cajonchapi churaykunkichis, hinaspa ripunanpaq qatirparipunkichis.

⁹Chaytataq makilla qhawankichis. Bet-semes llaqta ñannintachus rinqa chayqa, chaypin yachasun Israelpa Diosninpuni kay ñak'ariyta churamusqanta, mana chayqa yachallasuntaqmi mana Diospa phiñakuyninchu, aswanpas yanqa onqoylla kasqanta, nispa.

¹⁰Nisqanman hinapunitaq paykunaqa carretata iskaynin uñayoq wakaman wataykurqanku, uñantañataq waka kanchaman wisq'amurqanku.

¹¹Hinaspan Señor Diospa cajanta carretaman churaykurqanku, qori huk'uchakunayoq qori ch'upuyoq ima cajonchatataq cajatawan kuska churaykullarqankutaq.

¹²Wakakunataq Bet-semes llaqta ñannintapuni puririykapurqanku, mana maymanpas q'ewirispa cheqanllata rirqanku waqaykukuspa. Filistea runakunataq qhepanta qatipamurqanku Bet-semes llaqta qorpakama.

¹³Bet-semes llaqta runakunataq trigota wayq'opi ichhusharqanku, qonqay qhawarispataq cajata rikurqospa kusikurqanku.

¹⁴Carretataq chayamurqan Bet-semes llaqtapi Josuepa chakran pataman, hinaspan sayarparirqan hatun qaqaq kasqan cheqaspi. Ichhuqkunataq carretaq k'ullunta p'akirqarispa aysamuqnin wakakunata Señor Diosman haywaspa ruphachirqanku.

¹⁵Leví runakunan Señor Diospa cajanta apaqarqanku qori regaloyoq cajonchatawan, hinaspataq qaqa pataman iskayninta churarqanku. Chay kikin p'unchaymi Bet-semes llaqta runakunaqa Señor Diosman ruphachina sacrificiokunatawan sumaq kawsay sacrificiokunatawan haywarqanku.

¹⁶Chayta rikuspataq Filistea phisqantin uma qollanakunaqa kikin p'unchaypacha Ekrón llaqtakama kutipurqanku.

¹⁷Filistea runakunaq Señor Diosman huchankumanta regalamusqanku qori ch'upukunataq karqan phisqantin llaqtakunamanta hukkama: Asdodmanta, Gazamanta, Askalonmanta, Gatmanta, Ekronmantawan.

¹⁸Kaqllataq qori huk'uchakuna regalasqankupas karqan llapan phisqantin uma qollana runankunaq pukarasqa llaqtankumanta llaqtachankumantawan. Señor Diospa cajan churasqanku qaqaqa Josuepa chakran Bet-semes llaqtapi kashallanpunin.

¹⁹Diosmi Bet-semespi runakunata wañurachirqan paypa cajan ukhuta qhawaykusqankumanta, hinaspan wañurarqanku phisqa chunka waranqa runayoq llaqtapi qanchis chunka runakuna. Chaymi llaqtallantin runakunaqa waqararqanku Señor Diospa runakunata wañurachisqanmanta.

²⁰Paykunaqa ninakurqankun: —¿Piñataq kanman ch'uya Señor Diospa ñawpaqenman chimpaykuqqa? ¿Maymanpunitaq apachisun kay cajantari? nispa.

²¹Hinaspan Kiriat-jearim llaqtaman willaqta kacharqanku: — Filistea runakunan Señor Diospa cajanta kutichimpusqaku, hamuychis apakampuq, nispanku.