Read Quechua Cuzco Bible 1988 1 SAMUEL 8 Bible Online

1 SAMUEL 8 - Quechua Cuzco Bible 1988 bible

1 SAMUEL 8

¹Samuelqa machuyaykapuspanmi churinkunata Israel runakuna chaninchaqta churarqan.

²Kurak churinpa sutinmi Joel karqan, sullk'akaqpataq Abías karqan, Beerseba llaqtapin paykunaqa servirqanku.

³Ichaqa manan taytanku hinañachu ruwarqanku, aswanpas qolqe sonqo kaspankun lluk'iykusqata chaskikuqku, chanin-kaytapas waqllichiqku.

⁴Chaymi Israel kurak runakunaqa huñuykunakuspa Ramá llaqtaman Samuelwan parlaq rirqanku.

⁵Hinaspan nirqanku: —Qanqa machuñan kanki, hinaspapas churiykikunaqa manañan qan hinañachu ruwanku, chayrayku reyta churapuwayku, aswanpas wakin suyukuna hina reyniyoq kapusaqku, nispa.

⁶“Reyta qowayku” nisqankun ichaqa Samuelmanqa mana allinchu rikch'akurqan, chaymi Señor Diosllamanta payqa mañakurqan.

⁷Señor Diostaq Samuelta nirqan: —Uyarillay llaqtaq mañakusqasuykitaqa, manan qantachu pisichasunki aswanpas ñoqatan pisichawanku, manaña paykunaq reynin kanayta munaspanku.

⁸Egipto suyumanta horqomusqaymantapachan wak dioskunata yupaychaspanku saqerparipuwanku, kaqllataqmi qantapas ñoqata hina pisichasunkiku.

⁹Uyarillay mañakusqankuta, ichaqa kunaykuspa ñawpaqta willay imakunatachus reyqa paykunata ruwanqa chayta, nispa.

¹⁰Hinan Samuelqa rey mañakuqkunaman Señor Diospa nisqanta willarqan:

¹¹—Munasqaykichis reyqa kay hinatan ruwasunkichis: Churiykichiskunatan soldadopaq apanqa, wakintan maqanakuy carretaman churanqa, wakintataq caballopi maqanakuqman, wakintataq carretanpa ñawpaqen phawaqman.

¹²Akllakullanqataq wakinta waranqa soldado kamachiqpaq, wakintataq phisqa chunka kamachiqpaq. Hinallataq chakmaqpaq, wakinta ichhuqpaq, wakintataq maqanakuypaq arma ruwaqpaq, wakintañataq carretaq imankunapas ruwaqpaq churanqa.

¹³Chay hinallataq ususiykichiskunatapas churanqa wayk'uqpaq, t'anta ruwaqpaq, q'apaq hawina wakichiqpaq ima.

¹⁴Uvas chakraykichismantapas, olivos chakraykichismantapas aswan allinnin kaqtan qechusunkichis, chay chakratataqmi oficialninkunaman rakiykunqa.

¹⁵Chakraykichispa ruruntapas uvasniykichistapas chunkakaq p'akintan mañasunkichis, kamachikuqninkunaman oficialninkunamanwan qonanpaq.

¹⁶Kaqllataqmi runa uywasqaykichiskunawan, allichachaq uywaykichiswan, asnoykichiswanpas ruwanantan llank'achikunqa.

¹⁷Uywaykichismantapas chunkakaq p'akintan mañasunkichis, qankunapas paypa kamachillantaqmi kapunkichis.

¹⁸Chay hinata akllakusqaykichis rey ruwaqtinmi, qankunaqa Diosmanta waqyakuyta qallarinkichis, manañataqmi payqa uyarisunkichischu, nispa.

¹⁹Llapa runakunan ichaqa Samuelpa nisqanta mana uyariqpas tukurqankuchu, aswanmi nirqanku: —¡Manan! Wakin suyukuna hinan reyniyoq kaytapuni munayku. Reyniykuqa kamachiwanqakun, maqanakuqpas ñawpaqeykuta lloqsispan maqanakamunqa, nispa.

²¹Samueltaq llaqtaq nisqanta llapallanta Señor Diosman willarqan.

²²Hinan Señor Diosqa nirqan: —Mañakusqankuman hina reyta churay, nispa. Chaymi Samuelqa Israel runakunata nirqan: —Ripuychis llaqtaykichista, nispa.