Read Rade Klei Mphŭn Dơ̆ng 1 Bible Online

Klei Mphŭn Dơ̆ng 1 - Rade bible

Klei Mphŭn Dơ̆ng 1

¹Hlăk mphŭn dơ̆ng Aê Diê hrih adiê leh anăn lăn ala.

²Lăn ala mâo klei lŭk lăk leh anăn êhŏng, klei mmăt guôm ti dlông ƀăng êlam; leh anăn Mngăt Myang Aê Diê krăm ti dlông êlah êa.

³Aê Diê lač, “Brei mâo klei mngač”; snăn mâo klei mngač mtam.

⁴Aê Diê ƀuh klei mngač anăn jing jăk; Aê Diê kah klei mngač mơ̆ng klei mmăt.

⁵Aê Diê pia klei mngač “hruê”, leh anăn Ñu pia klei mmăt “mlam”. Mâo tlam leh anăn mâo aguah, jing hruê tal sa.

⁶Leh anăn Aê Diê lač, “Brei mâo anôk êhŏng ti krah phung êa, čiăng bi kah êa hŏng êa.”

⁷Aê Diê mjing anôk êhŏng čiăng bi kah êa ti gŭ mơ̆ng êa ti dlông anôk êhŏng. Leh anăn klei anăn jing mtam.

⁸Aê Diê pia anôk êhŏng “adiê”. Mâo tlam leh anăn mâo aguah, jing hruê tal dua.

⁹Aê Diê lač, “Brei êa dôk ti gŭ adiê bi kƀĭn hlăm sa bĭt anôk, leh anăn brei lăn thu bi êdah.” Snăn klei anăn jing mtam.

¹⁰Aê Diê pia anôk thu “lăn”; leh anăn Ñu pia anôk êa bi kƀĭn “êa ksĭ”. Aê Diê ƀuh klei anăn jing jăk.

¹¹Leh anăn Aê Diê lač, “Brei lăn bi čăt ana kyâo mtâo, rơ̆k mâo mjeh, leh anăn ana kyâo mboh mâo mjeh tui si mta diñu ti rŏng lăn.” Snăn klei anăn jing mtam.

¹²Lăn čăt ana kyâo mtâo, rơ̆k mâo mjeh tui si mta diñu, leh anăn ana kyâo mboh mâo mjeh tui si mta diñu. Aê Diê ƀuh klei anăn jing jăk.

¹³Mâo tlam leh anăn mâo aguah, jing hruê tal tlâo.

¹⁴Aê Diê lač, “Brei mâo lu boh mngač hlăm anôk êhŏng ti adiê, čiăng bi kah hruê hŏng mlam; brei diñu jing mnơ̆ng yua bi êdah klei bi knăl, yan, hruê, leh anăn thŭn.

¹⁵Wăt brei diñu jing lu boh mngač hlăm anôk êhŏng ti adiê čiăng mtrang lăn ala.” Snăn klei anăn jing mtam.

¹⁶Aê Diê mjing dua boh mngač prŏng, boh mngač prŏng hĭn kiă êjai hruê, boh mngač điêt hĭn kiă êjai mlam. Ñu mjing wăt phung mtŭ mơh.

¹⁷Aê Diê dưm diñu hlăm anôk êhŏng ti adiê pioh mtrang lăn ala,

¹⁸čiăng kiă êjai hruê leh anăn mlam, leh anăn bi kah klei mngač mơ̆ng klei mmăt. Aê Diê ƀuh klei anăn jing jăk.

¹⁹Mâo tlam leh anăn mâo aguah, jing hruê tal pă.

²⁰Aê Diê lač, “Brei êa mâo lu mnơ̆ng hdĭp, leh anăn brei čĭm phiơr ti dlông lăn ala hlăm anôk êhŏng ti adiê.”

²¹Snăn Aê Diê hrih lu kan prŏng leh anăn lu mnơ̆ng hdĭp kpư̆ hiu hlăm êa lar êngŭm tui si mta diñu, leh anăn lu čĭm mâo siap tui si mta diñu. Aê Diê ƀuh klei anăn jing jăk.

²²Aê Diê hơêč hmưi kơ diñu, lač, “Brei diih mđai bi lar êngŭm, bi bŏ êa ksĭ, leh anăn brei čĭm bi lar êngŭm ti lăn ala.”

²³Mâo tlam leh anăn mâo aguah, jing hruê tal êma.

²⁴Aê Diê lač, “Brei lăn ala mâo mnơ̆ng hdĭp tui si mta diñu: hlô mnơ̆ng rông, mnơ̆ng êbat ban, leh anăn hlô dliê tui si mta diñu.” Snăn klei anăn jing mtam.

²⁵Aê Diê mjing hlô dliê ti lăn ala tui si mta diñu, leh anăn hlô mnơ̆ng rông tui si mta diñu, leh anăn jih jang mnơ̆ng êbat ban ti lăn tui si mta diñu. Aê Diê ƀuh klei anăn jing jăk.

²⁶Hlăk anăn Aê Diê lač, “Brei Drei mjing mnuih tui si rup Drei, msĕ si Drei pô; leh anăn brei diñu kiă kriê kan hlăm êa ksĭ, čĭm hlăm adiê, hlô mnơ̆ng rông, jih jang hlô dliê tar ƀar lăn ala leh anăn jih jang mnơ̆ng êbat ban ti rŏng lăn ala.”

²⁷Snăn Aê Diê hrih mnuih tui si rup Ñu pô; Ñu hrih gơ̆ tui si rup Aê Diê pô, Ñu hrih digơ̆ êkei leh anăn mniê.

²⁸Aê Diê hơêč hmưi klei jăk jĭn kơ digơ̆ leh anăn lač kơ digơ̆, “Brei diih mâo anak leh anăn bi lar êngŭm, bi bŏ lăn ala, leh anăn brei diih jing khua kơ lăn ala; brei diih kiă kriê kan hlăm êa ksĭ, čĭm hlăm adiê, leh anăn jih jang mnơ̆ng hdĭp kpư̆ hiu ti lăn ala.”

²⁹Aê Diê lač, “Nĕ anei, Kâo brei leh kơ diih tar ƀar lăn ala jih jang djam mâo mjeh leh anăn jih jang ana kyâo mâo boh hŏng mjeh; mnơ̆ng anăn srăng jing mnơ̆ng diih ƀơ̆ng huă.

³⁰Kơ jih jang hlô dliê ti lăn ala, kơ jih jang čĭm hlăm adiê, kơ jih jang mnơ̆ng êbat ban ti rŏng lăn ala, kơ jih jang mnơ̆ng mâo êwa klei hdĭp, Kâo brei leh jih jang djam mtah jing mnơ̆ng diñu ƀơ̆ng.” Snăn klei anăn jing mtam.

³¹Aê Diê ƀuh jih jang mnơ̆ng Ñu mjing leh, leh anăn nĕ anei, diñu jing jăk snăk. Mâo tlam leh anăn mâo aguah, jing hruê tal năm.