Read Rade Klei Mphŭn Dơ̆ng 9 Bible Online

Klei Mphŭn Dơ̆ng 9 - Rade bible

Klei Mphŭn Dơ̆ng 9

¹Aê Diê hơêč hmưi klei jăk jĭn kơ Y-Nôê leh anăn kơ phung anak êkei ñu, leh anăn lač kơ digơ̆, “Brei diih jing lar êngŭm leh anăn bi bŏ lăn ala.

²Jih jang hlô mnơ̆ng hlăm lăn ala leh anăn jih jang čĭm hlăm adiê, jih jang mnơ̆ng êbat ban rui ti lăn, leh anăn jih jang kan hlăm êa ksĭ srăng huĭ kơ diih. Kâo jao leh jih jang mnơ̆ng anăn hlăm kngan diih sơăi.

³Jih jang mnơ̆ng hdĭp kpư̆ hiu srăng jing mnơ̆ng diih dưi ƀơ̆ng; Kâo brei kơ diih jih jang mnơ̆ng anăn msĕ si Kâo brei leh êlâo ana djam mtah.

⁴Knŏng đăm diih ƀơ̆ng ôh kđeh adôk klei hdĭp, čiăng lač êrah ñu.

⁵Tơdah arăng bi mdjiê diih, sĭt nik Kâo srăng rŭ ênua; Kâo srăng rŭ ênua kơ grăp hlô mnơ̆ng leh anăn mnuih. Kâo srăng rŭ ênua kơ mnuih bi mdjiê găp ñu.

⁶Hlei pô tuh êrah mnuih, mnuih mơh srăng tuh êrah pô anăn; kyuadah Aê Diê mjing mnuih tui si rup Ñu pô.

⁷Bi diih, brei diih bi lar êngŭm, brei diih mâo phung anak čô lu tơl diñu bi bŏ lăn ala.”

⁸Aê Diê lač kơ Y-Nôê leh anăn kơ phung anak êkei ñu,

⁹“Nĕ anei, Kâo ngă klei Kâo bi mguôp hŏng diih leh anăn hŏng phung anak čô diih kơ êdei,

¹⁰hŏng jih jang mnơ̆ng hdĭp dôk mbĭt hŏng diih, čĭm čap, hlô mnơ̆ng rông, leh anăn jih jang hlô dliê hlăm lăn ala mbĭt hŏng diih, kơ jih jang mnơ̆ng kbiă leh mơ̆ng kŭmpăn.

¹¹Kâo ngă klei Kâo bi mguôp hŏng diih; Kâo amâo srăng lŏ bi rai jih jang mnơ̆ng hdĭp hŏng êa lip ôh; kăn srăng lŏ mâo rei êa lip bi rai lăn ala.”

¹²Aê Diê lač, “Anei mnơ̆ng bi knăl klei bi mguôp Kâo ngă hŏng diih leh anăn hŏng jih jang mnơ̆ng hdĭp mbĭt hŏng diih kơ jih jang ênuk êdei.

¹³Kâo dưm kêñ krô Kâo hlăm knam; ñu srăng jing mnơ̆ng bi knăl klei bi mguôp Kâo hŏng lăn ala.

¹⁴Tơdah Kâo brei mâo knam ti dlông lăn ala, kêñ krô srăng bi êdah hlăm knam,

¹⁵Kâo srăng hdơr klei bi mguôp Kâo hŏng diih leh anăn hŏng jih jang mnơ̆ng hdĭp, tui si mta mdê mdê, leh anăn êa amâo srăng lŏ jing êa lip čiăng bi rai jih jang mnơ̆ng hdĭp ôh.

¹⁶Tơdah kêñ krô dôk hlăm knam, Kâo srăng dlăng kơ ñu čiăng kơ Kâo hdơr klei bi mguôp hlŏng lar ngă leh mơ̆ng Aê Diê hŏng jih jang mnơ̆ng hdĭp ti rŏng lăn ala.”

¹⁷Aê Diê lač kơ Y-Nôê, “Anei yơh mnơ̆ng bi knăl kơ klei bi mguôp Kâo ngă leh plah wah Kâo hŏng jih jang mnơ̆ng hdĭp ti rŏng lăn ala.”

¹⁸Phung anak êkei Y-Nôê kbiă mơ̆ng kŭmpăn jing Y-Sem, Y-Čam, leh anăn Y-Japhet. Y-Čam jing ama kơ Y-Kanaan.

¹⁹Tlâo čô anei jing anak êkei Y-Nôê; leh anăn mơ̆ng diñu yơh lŏ mâo mnuih bi bŏ lăn ala.

²⁰Y-Nôê jing pô ngă hma, ñu ngă đang boh kriăk ƀâo.

²¹Ñu mnăm kpiê leh anăn ñu kpiê ruă; ñu đih lưng mlŭn hlăm sang čhiăm ñu.

²²Y-Čam, ama Y-Kanaan, ƀuh klei ama ñu dôk lưng mlŭn, leh anăn hưn klei anăn kơ dua čô ayŏng ñu ti tač.

²³Y-Sem leh anăn Y-Japhet mă sa blah čhiăm, dưm ti mra diñu, leh anăn êbat kdŭn tluôn. Diñu bi msăm ama diñu. Diñu wir ƀô̆ diñu dlăng kơ anôk mkăn, amâo ƀuh ôh klei lưng mlŭn ama diñu.

²⁴Tơdah Y-Nôê mdih mơ̆ng klei kpiê ngă kơ ñu, ñu thâo si klei anak mda ñu ngă kơ ñu.

²⁵Ñu lač, “Brei Y-Kanaan mâo klei tăm pah! Ñu srăng jing hlŭn kơ phung hlŭn phung ayŏng adei ñu.”

²⁶Ñu lač msĕ mơh, “Mpŭ mni kơ Khua Yang, Aê Diê Y-Sem! Brei Y-Kanaan jing hlŭn kơ Y-Sem.

²⁷Brei Aê Diê bi ƀai knông lăn kơ Y-Japhet; leh anăn brei ñu dôk hlăm sang čhiăm Y-Sem, leh anăn brei Y-Kanaan jing hlŭn kơ Y-Japhet.”

²⁸Leh êa lip, Y-Nôê dôk hdĭp tlâo êtuh êma pluh thŭn.

²⁹Jih jang hruê Y-Nôê dôk hdĭp mâo dua păn êtuh êma pluh thŭn, leh anăn ñu djiê.