Read Rade II Y-Samuel 22 Bible Online

II Y-Samuel 22 - Rade bible

II Y-Samuel 22

¹Y-Đawit blŭ kơ Yêhôwa boh blŭ klei mmuñ anei ti hruê Yêhôwa bi mtlaih ñu mơ̆ng kngan jih jang phung roh ñu, leh anăn mơ̆ng kngan Y-Sôl.

²Ñu lač: “Yêhôwa jing boh tâo kâo, kđông kâo, leh anăn Pô bi mtlaih kâo,

³Aê Diê kâo, boh tâo kâo, hlăm ñu kâo đuĕ dăp, khil kâo, leh anăn ki kơ klei bi mtlaih kâo, kđông kâo, leh anăn anôk kâo đuĕ dăp, Pô bi mtlaih kâo; Ih bi mtlaih kâo mơ̆ng klei măk ƀai.

⁴Kâo iêô kwưh kơ Yêhôwa, Pô năng arăng bi mni, leh anăn kâo tlaih mơ̆ng phung roh kâo.

⁵Kyuadah êa poh yă klei djiê wang kâo, êa êtăng klei luč ngă kơ kâo.

⁶Bră Ƀuôn Phung Djiê kă hruôt kâo, ñuăl klei djiê bi tuôm hŏng kâo.

⁷Hlăm klei knap mñai kâo, kâo iêô kwưh kơ Yêhôwa, kâo iêô kwưh kơ Aê Diê kâo. Mơ̆ng sang yang Ñu, Ñu hmư̆ leh asăp kâo, leh anăn klei kâo ur krao truh kơ ƀăng knga Ñu.

⁸Hlăk anăn lăn ala êyuh leh anăn ktư̆ yơ̆ng; atur adiê ktư̆ yơ̆ng leh anăn mgei, kyuadah Ñu ngêñ.

⁹Săp pui đĭ mơ̆ng ƀăng adŭng Ñu, leh anăn pui mơ̆ng ƀăng êgei Ñu bi rai; hdăng ngur trơ̆ng mơ̆ng Ñu.

¹⁰Ñu mdlưh adiê leh anăn trŭn, mâo klei mmăt kpal ti gŭ jơ̆ng Ñu.

¹¹Ñu đĭ ti dlông sa čô čêrubim leh anăn phiơr; arăng ƀuh Ñu ti dlông siap angĭn.

¹²Ñu mjing sang čhiăm jŭm dar Ñu hŏng klei mmăt, knam kpal, anôk bi kƀĭn êa.

¹³Mơ̆ng klei kmlăi ti anăp Ñu hdăng ngur trơ̆ng.

¹⁴Yêhôwa blŭ msĕ si grăm đah mơ̆ng adiê, leh anăn Pô Ti Dlông Hĭn blŭ hŏng asăp Ñu.

¹⁵Leh anăn Ñu sơ̆ng ƀrăm leh anăn bi bra đuĕ diñu; Ñu mơĭt kmlă, leh anăn suôt diñu.

¹⁶Leh anăn mnuôr êa ksĭ bi êdah leh, tur lăn ala bi êdah leh, tơdah Yêhôwa ƀuah, tơdah mâo ênai bi êwa mơ̆ng ƀăng adŭng Ñu.

¹⁷Mơ̆ng dlông Ñu yơr kngan mă kâo, Ñu ktŭng kâo mơ̆ng êa prŏng.

¹⁸Ñu bi mtlaih kâo mơ̆ng pô roh kâo ktang, mơ̆ng phung bi êmut kơ kâo; kyuadah diñu jing ktang đei kơ kâo.

¹⁹Diñu truh kơ kâo hlăm hruê kâo knap mñai; ƀiădah Yêhôwa jing Pô kâo knang.

²⁰Ñu atăt kâo kơ anôk êhai; Ñu bi mtlaih kâo leh, kyuadah Ñu mơak hŏng kâo.

²¹Yêhôwa mưn kâo leh tui si klei kpă ênô kâo; Ñu bi wĭt kơ kâo tui si klei êngeh kngan kâo.

²²Kyuadah kâo tui hlue leh êlan Yêhôwa, leh anăn amâo tuôm đuĕ lui Aê Diê kâo hŏng klei ƀai ôh.

²³Kyuadah jih jang klei Ñu mtă dôk ti anăp kâo, leh anăn kâo amâo tuôm weh mơ̆ng klei bhiăn Ñu ôh.

²⁴Kâo amâo mâo klei arăng ƀuah ôh ti anăp Ñu, leh anăn kâo mkhư̆ kâo pô kơ klei wê.

²⁵Kyuanăn Yêhôwa mưn kâo leh tui si klei kpă ênô kâo, tui si klei êngeh kâo ti anăp ală Ñu.

²⁶Hŏng phung thâo pap Ih bi êdah Ih pô jing thâo pap, hŏng pô amâo mâo klei arăng ƀuah ôh, Ih bi êdah Ih pô jing Pô arăng amâo mâo klei ƀuah ôh.

²⁷Hŏng pô êngeh Ih bi êdah Ih pô jing êngeh, leh anăn hŏng pô wê Ih bi êdah Ih pô jing khăng.

²⁸Ih bi mtlaih sa phung ƀuôn sang luă gŭ, ƀiădah ală Ih dlăng kơ phung krưh čiăng mdlưh diñu.

²⁹Sĭt nik, Ih jing pui kđen kâo, Ơ Yêhôwa, leh anăn Aê Diê kâo bi mngač klei mmăt kâo.

³⁰Sĭt nik hŏng Ih kâo dưi bi rai sa phung kahan; leh anăn hŏng Aê Diê kâo, kâo dưi kdăt mnư̆.

³¹Aê Diê anei — êlan Ñu jing klă; klei Yêhôwa ƀuăn truh sĭt; Ñu jing khil kơ jih jang phung đuĕ dăp hlăm Ñu.

³²Kyuadah hlei jing Aê Diê? hjăn Yêhôwa yơh! Leh anăn hlei jing sa Boh Tâo prŏng? knŏng Aê Diê drei yơh!

³³Aê Diê anei jing anôk kâo đuĕ dăp kjăp, leh anăn Ñu brei êlan kâo jing hơĭt.

³⁴Ñu brei jơ̆ng kâo jing msĕ si jơ̆ng hlô rang ana, Ñu dưm kâo hŏng klei hơĭt ti dlông čư̆.

³⁵Ñu bi hriăm kngan kâo kơ klei bi blah, snăn kơh păl kâo dưi ƀêč sa ƀĕ hna kông.

³⁶Ih brei leh kơ kâo khil klei Ih bi mtlaih, leh anăn Ih đru kâo jing prŏng.

³⁷Ih brei leh sa anôk êhai kơ knhuang kâo, leh anăn jơ̆ng kâo amâo ksak ôh.

³⁸Kâo tiŏ phung roh kâo leh anăn bi rai leh diñu, leh anăn kâo amâo wĭt ôh tơl kâo bi luč hĕ diñu.

³⁹Kâo bi luč leh diñu, kâo tlŏ diñu leh tơl diñu amâo kgŭ ôh. Diñu êbuh leh ti gŭ jơ̆ng kâo.

⁴⁰Kyuadah Ih hyuă kâo leh hŏng klei ktang kơ klei bi blah; Ih mdlưh leh ti gŭ kâo phung ngă kơ kâo.

⁴¹Ih brei leh phung roh kâo wir rŏng kơ kâo, phung bi êmut kơ kâo, kâo bi rai diñu leh.

⁴²Diñu dlăng, ƀiădah amâo mâo pô bi mtlaih diñu ôh, diñu ur kơ Yêhôwa, ƀiădah Gơ̆ amâo lŏ wĭt lač kơ diñu ôh.

⁴³Kâo tlê diñu tơl ƀhĭ msĕ si ƀruih lăn, kâo mñir diñu leh anăn juă diñu msĕ si lŭ hlăm êlan.

⁴⁴Ih bi mtlaih leh kâo mơ̆ng klei bi čĭk hŏng phung ƀuôn sang; Ih pioh kâo brei jing akŏ kơ phung găp djuê mnuih; phung ƀuôn sang kâo amâo thâo kral ôh mă bruă leh kơ kâo,

⁴⁵phung tue ktư̆ yơ̆ng hriê kơ kâo; tơdah diñu hmư̆ hing kơ kâo, diñu gưt kâo.

⁴⁶Phung tue êdu ai, leh anăn hriê ktư̆ yơ̆ng mơ̆ng anôk kjăp diñu.

⁴⁷Yêhôwa dôk hdĭp; mpŭ mni kơ Boh Tâo kâo, brei Aê Diê kâo mâo klei mpŭ, Boh Tâo klei bi mtlaih kâo.

⁴⁸Aê Diê Pô rŭ brei ênua kơ kâo, leh anăn mdlưh phung ƀuôn sang ti gŭ kâo,

⁴⁹Pô bi mtlaih kâo mơ̆ng phung roh kâo. Ih mpŭ kâo ti dlông phung bi kdơ̆ng hŏng kâo, Ih bi mtlaih leh kâo mơ̆ng phung jhŏng ƀai.

⁵⁰Kyua klei anei, kâo srăng bi mni kơ Ih, Yêhôwa, ti krah phung găp djuê, leh anăn mmuñ bi mni kơ anăn Ih.

⁵¹Ñu brei klei dưi prŏng kơ mtao ñu, leh anăn bi êdah klei khăp sĭt suôr kơ pô Ñu trôč leh êa ƀâo mngưi; kơ Y-Đawit, leh anăn kơ phung anak čô gơ̆ nanao hlŏng lar.”