Read Rade I Bruă Mtao 16 Bible Online

I Bruă Mtao 16 - Rade bible

I Bruă Mtao 16

¹Yêhôwa blŭ kơ Y-Jêhu anak êkei Y-Hanani bi kdơ̆ng hŏng Y-Baêsa, lač,

²“Kyuadah Kâo mđĭ ih leh mơ̆ng ƀruih lăn leh anăn mjing ih leh khua kiă kriê phung ƀuôn sang Kâo Israel, leh anăn kyuadah ih êbat leh hlăm êlan Y-Jêrôbôam, leh anăn bi msoh leh phung ƀuôn sang Kâo Israel, mčhur Kâo ăl kơ klei soh digơ̆,

³nĕ anei Kâo srăng bi luč jih Y-Baêsa leh anăn sang ñu, leh anăn Kâo srăng brei sang ih jing msĕ si sang Y-Jêrôbôam anak êkei Y-Nêbat.

⁴Hlei pô jing phung Baêsa djiê hlăm ƀuôn, asâo srăng ƀơ̆ng, leh anăn hlei pô hlăm phung ñu djiê hlăm hma, čĭm srăng ƀơ̆ng.”

⁵Bruă mkăn Y-Baêsa ngă leh anăn ya klei ñu ngă leh, leh anăn klei ktang ñu, amâo djŏ hĕ arăng čih leh hlăm Hdruôm Hră Klei Yăl Dliê Phung Mtao Israel?

⁶Leh anăn Y-Baêsa djiê nao dôk mbĭt hŏng phung aê ñu, leh anăn arăng dơr ñu ti ƀuôn Tirsa. Leh anăn Y-Êla anak êkei ñu kiă kriê čuê ñu.

⁷Leh anăn Yêhôwa blŭ kơ Y-Jêhu anak êkei Y-Hanani bi kdơ̆ng hŏng Y-Baêsa leh anăn sang ñu, kyuadah klei jhat ñu ngă leh ti anăp ală Yêhôwa, mčhur Gơ̆ ăl kơ bruă kngan ñu ngă, kyuadah ñu jing msĕ si sang Y-Jêrôbôam, leh anăn msĕ mơh kyuadah ñu bi rai leh sang anăn.

⁸Hlăm thŭn tal dua pluh năm Y-Asa mtao Yuđa, Y-Êla anak êkei Y-Baêsa dơ̆ng kiă kriê phung Israel hlăm ƀuôn Tirsa, leh anăn ñu kiă kriê dua thŭn.

⁹Ƀiădah dĭng buăl ñu Y-Simri, khua dlăng mkrah jih jang êdeh aseh ñu, trông čhai ngă kơ ñu. Tơdah ñu dôk ti ƀuôn Tirsa mnăm tơl kpiê ruă hlăm sang Y-Arsa, pô jing khua kiă sang hlăm ƀuôn Tirsa,

¹⁰Y-Simri mŭt čăm ñu leh anăn bi mdjiê hĕ ñu, hlăm thŭn tal dua pluh kjuh Y-Asa mtao Yuđa, leh anăn kiă kriê hrô ñu.

¹¹Tơdah ñu dơ̆ng kiă kriê, tơdah leh ñu dôk gŭ ti jhưng mtao ñu, ñu bi mdjiê jih sang Y-Baêsa. Ñu amâo lui sa čô êkei hlăm găp djuê gơ̆ amâodah phung mah jiăng gơ̆ ôh.

¹²Snăn Y-Simri bi rai jih sang Y-Baêsa, tui si klei Yêhôwa blŭ leh mơ̆ng Y-Jêhu khua pô hưn êlâo bi kdơ̆ng hŏng Y-Baêsa,

¹³kyuadah jih jang klei soh Y-Baêsa leh anăn klei soh Y-Êla anak êkei gơ̆, leh anăn klei digơ̆ bi msoh phung Israel, mčhur Yêhôwa Aê Diê Israel ăl kơ rup yang digơ̆.

¹⁴Bruă mkăn Y-Êla ngă, leh anăn jih klei ñu ngă leh, amâo djŏ hĕ arăng čih leh hlăm Hdruôm Hră Klei Yăl Dliê kơ Phung Mtao Israel?

¹⁵Hlăm thŭn tal dua pluh kjuh Y-Asa mtao Yuđa, Y-Simri kiă kriê kjuh hruê hlăm ƀuôn Tirsa. Phung kahan ngă kđông bi kdơ̆ng hŏng ƀuôn Gibêthôn, ƀuôn phung Philistin,

¹⁶leh anăn phung kahan hlăm kđông hmư̆ arăng lač, “Y-Simri trông čhai leh, leh anăn bi mdjiê leh mtao.” Kyuanăn hruê anăn hlăm kđông jih jang phung Israel mjing Y-Ômri khua kơ phung kahan mtao phung Israel.

¹⁷Snăn Y-Ômri leh anăn jih jang phung Israel mbĭt hŏng ñu đĭ nao mơ̆ng ƀuôn Gibêthôn leh anăn diñu wang ƀuôn Tirsa.

¹⁸Tơdah Y-Simri ƀuh arăng mă leh ƀuôn, ñu mŭt hlăm kđông kjăp sang mtao, leh anăn čuh hĕ sang mtao mbĭt hŏng ñu, snăn ñu djiê,

¹⁹kyua klei soh ñu ngă leh, ngă klei jhat ti anăp ală Yêhôwa, êbat hlăm êlan Y-Jêrôbôam, leh anăn kyua klei soh ñu ngă bi msoh kơ phung Israel.

²⁰Bruă mkăn Y-Simri ngă, leh anăn klei ñu trông čhai leh, amâo djŏ hĕ arăng čih leh hlăm Hdruôm Hră Klei Yăl Dliê kơ Phung Mtao Israel?

²¹Phung ƀuôn sang Israel bi mbha hlăm dua phung, sa mkrah phung ƀuôn sang tui hlue Y-Tipni anak êkei Y-Ginat, čiăng mjing gơ̆ mtao, leh anăn sa mkrah tui hlue Y-Ômri.

²²Ƀiădah phung ƀuôn sang tui hlue Y-Ômri dưi hŏng phung ƀuôn sang tui hlue Y-Tipni anak êkei Y-Ginat. Snăn Y-Tipni djiê, leh anăn Y-Ômri jing mtao.

²³Hlăm thŭn tal tlâo pluh sa Y-Asa mtao Yuđa, Y-Ômri dơ̆ng kiă kriê phung Israel, leh anăn ñu kiă kriê pluh dua thŭn; năm thŭn ñu kiă kriê hlăm ƀuôn Tirsa.

²⁴Ñu blei kbuôn Samari mơ̆ng Y-Sêmer hŏng dua talăng prăk; ñu mjing kbuôn anăn kđông kjăp, leh anăn bi anăn ƀuôn ñu mdơ̆ng anăn Samari, tui si anăn Y-Sêmer pô kbuôn anăn.

²⁵Y-Ômri ngă klei jhat ti anăp ală Yêhôwa, leh anăn ñu ngă klei jhat hĭn kơ jih jang phung êlâo kơ ñu.

²⁶Kyuadah ñu êbat hlăm jih êlan Y-Jêrôbôam anak êkei Y-Nêbat, leh anăn hlăm klei soh gơ̆ bi msoh leh kơ phung Israel, mčhur Yêhôwa Aê Diê Israel ăl kyua rup yang diñu.

²⁷Bruă mkăn Y-Ômri ngă, leh anăn klei ktang ñu bi êdah leh, amâo djŏ hĕ arăng čih leh hlăm Hdruôm Hră Klei Yăl Dliê kơ Phung Mtao Israel?

²⁸Y-Ômri djiê nao dôk mbĭt hŏng phung aê ñu, leh anăn arăng dơr ñu hlăm ƀuôn Samari; leh anăn Y-Ahap anak êkei ñu kiă kriê čuê ñu.

²⁹Hlăm thŭn tal tlâo pluh sa păn Y-Asa mtao Yuđa, Y-Ahap anak êkei Y-Ômri dơ̆ng kiă kriê phung Israel, leh anăn Y-Ahap anak êkei Y-Ômri kiă kriê phung Israel hlăm ƀuôn Samari dua pluh dua thŭn.

³⁰Y-Ahap anak êkei Y-Ômri ngă klei jhat ti anăp ală Yêhôwa êbeh hĭn kơ jih jang phung êlâo kơ ñu.

³¹Leh anăn tơdah jing msĕ si sa klei ênưih kơ ñu êbat hlăm klei soh Y-Jêrôbôam anak êkei Y-Nêbat, ñu mă kơ mô̆ H'Jêsêbel, anak mniê Y-Êtbal mtao phung Sidôn, leh anăn nao mă bruă kơ yang Baal, leh anăn kkuh mpŭ kơ yang anăn.

³²Ñu mdơ̆ng knưl kơ yang Baal hlăm sang Baal ñu mdơ̆ng leh hlăm ƀuôn Samari.

³³Leh anăn Y-Ahap ngă sa ƀĕ gơ̆ng kŭt rup yang Asêra. Y-Ahap ngă êbeh hĭn kơ jih jang phung mtao Israel êlâo kơ ñu, čiăng mčhur Yêhôwa Aê Diê Israel ăl.

³⁴Hlăm ênuk ñu Y-Hiêl mơ̆ng ƀuôn Bêthel mdơ̆ng ƀuôn Yêrikô. Ñu ngă tur gơ̆ hŏng ênoh Y-Abiram anak êkei tal êlâo ñu, leh anăn mdơ̆ng ƀăng jang gơ̆ hŏng ênoh Y-Sêgup anak êkei ñu mda hĭn, tui si klei Yêhôwa blŭ leh hŏng Y-Yôsuê anak êkei Y-Nun.