Read Rade Klei Kbiă 15 Bible Online

Klei Kbiă 15 - Rade bible

Klei Kbiă 15

¹Y-Môis leh anăn phung ƀuôn sang Israel mmuñ klei mmuñ anei kơ Yêhôwa: “Kâo srăng mmuñ kơ Yêhôwa, kyuadah Ñu dưi hŏng klei guh kơang; Ñu hwiê hĕ leh aseh leh anăn mgăt ñu hlăm êa ksĭ.

²Yêhôwa jing klei ktang kâo leh anăn klei mmuñ kâo, Ñu yơh jing leh klei bi mtlaih kâo; Pô anei jing Aê Diê kâo, kâo srăng mmuñ bi mni kơ Ñu. Ñu jing Aê Diê ama kâo, kâo srăng mpŭ kơ Ñu.

³Yêhôwa jing kahan thâo bi blah; Yêhôwa jing anăn Ñu.

⁴Ñu hwiê leh êdeh aseh leh anăn phung kahan Pharaôn hlăm êa ksĭ; phung khua kahan Pharaôn ruah leh mngăt jih hlăm Êa Ksĭ Hrah.

⁵Anôk êlam guôm leh diñu; diñu kngăm leh ti tur êa ksĭ msĕ si sa klŏ boh tâo.

⁶Ơ Yêhôwa, Kngan hnuă Ih, mâo klei ktang guh kơang, ơ Yêhôwa kngan hnuă Ih, bi rai leh pô roh.

⁷Hŏng klei prŏng kdrưh Ih, Ih dưi leh hŏng phung bi kdơ̆ng hŏng Ih; Ih mơĭt leh klei Ih ngêñ, leh anăn bi rai diñu msĕ si pui ƀơ̆ng adrăng.

⁸Hŏng êwa mơ̆ng ƀăng adŭng Ih, êa bư̆ hĕ, êa lip mđĭ dơ̆ng msĕ si mnư̆; anôk êlam jing khăng ti krah êa ksĭ.

⁹Pô roh lač, ‘Kâo srăng tiŏ, kâo srăng hmao, kâo srăng bi mbha mnơ̆ng plah mă; kâo srăng bi hrăp klei kâo čiăng hŏng diñu. Kâo srăng suê̆ đao gưm, kngan kâo srăng bi rai digơ̆.’

¹⁰Ih thut leh hŏng angĭn Ih, êa ksĭ guôm diñu leh; diñu kngăm leh msĕ si kmrak hlăm êa êlam.

¹¹Hlei yang jing msĕ si Ih, Ơ Yêhôwa? Hlei jing msĕ si Ih, guh kơang hlăm klei doh jăk, Pô thâo bi huĭ hŏng bruă guh kơang, ngă lu klei yuôm bhăn?

¹²Ih yơr leh kngan hnuă Ih, lăn lun diñu leh.

¹³Hŏng klei Ih khăp sĭt suôr Ih atăt leh phung ƀuôn sang Ih bi tui leh; Ih gai diñu hŏng klei myang Ih kơ anôk doh jăk Ih dôk.

¹⁴Phung găp djuê mnuih hmư̆ leh klei anăn, diñu ktư̆ yơ̆ng; klei huĭ prŏng ngă leh kơ phung Philistin.

¹⁵Ară anei phung khua čar Êđôm mâo klei rŭng răng; phung khua čar Môap ktư̆ yơ̆ng; jih jang phung dôk hlăm čar Kanaan dlưh ai tiê.

¹⁶Klei huĭ leh anăn klei hyưt truh kơ diñu; kyuadah păl Ih ktang, diñu jing kmlô msĕ si sa klŏ boh tâo, tơl phung ƀuôn sang Ih găn leh, Ơ Yêhôwa, tơl phung ƀuôn sang Ih blei leh găn jih.

¹⁷Ih srăng brei digơ̆ mŭt, leh anăn pla digơ̆ ti dlông čư̆ Ih, anôk Ih mkra leh jing anôk Ih dôk, Ơ Yêhôwa, anôk doh jăk kngan Ih mdơ̆ng leh, Ơ Khua Yang.

¹⁸Yêhôwa jing mtao srăng kiă kriê nanao hlŏng lar.”

¹⁹Kyuadah tơdah aseh Pharaôn, êdeh aseh ñu, leh anăn phung mgăt aseh ñu mŭt leh hlăm êa ksĭ, Yêhôwa bi wĭt leh êa ksĭ ti dlông diñu. Ƀiădah phung ƀuôn sang Israel êbat ti lăn thu ti krah êa ksĭ.

²⁰H'Miriam, khua pô hưn êlâo mniê, amai Y-Arôn, djă sa boh hgơr điêt; leh anăn jih jang phung mniê tui hlue ñu djă hgơr điêt leh anăn kdŏ.

²¹H'Miriam mmuñ kơ diñu: “Mmuñ bĕ kơ Yêhôwa, kyuadah Ñu dưi leh hŏng klei guh kơang; Ñu hwiê leh aseh leh anăn mgăt hlăm êa ksĭ.”

²²Y-Môis atăt ba phung Israel mơ̆ng Êa Ksĭ Hrah. Diñu nao phă kdrăn tač Sur. Diñu êbat tlâo hruê hlăm kdrăn tač, ƀiădah amâo ƀuh êa ôh.

²³Tơdah diñu truh ti Mara, diñu amâo dưi mnăm êa Mara ôh kyuadah êa anăn phĭ. Kyuanăn arăng pia anôk anăn Mara.

²⁴Phung ƀuôn sang blŭ dŭñ dŭñ kơ Y-Môis, lač, “Ya drei srăng mnăm lĕ?”

²⁵Y-Môis ur kơ Yêhôwa, leh anăn Yêhôwa ktrâo sa kdrêč ana kyâo kơ ñu. Ñu dlăm gơ̆ hlăm êa, leh anăn êa jing jăk, dưi mnăm. Tinăn yơh Yêhôwa brei leh klei bhiăn leh anăn klei mtă kơ phung ƀuôn sang, leh anăn tinăn Ñu lông dlăng digơ̆.

²⁶Ñu lač, “Tơdah ih dôk hmư̆ bi nik kơ asăp Yêhôwa, Aê Diê ih, leh anăn ngă klei djŏ ti anăp ală Kâo, tơdah ih mđing knga kơ klei Kâo mtă leh anăn gưt jih jang klei bhiăn Kâo, kâo amâo srăng bi truh kơ ih ôh sa mta klei ruă Kâo ngă leh kơ phung Êjip; kyuadah Kâo jing Yêhôwa, Pô bi hlao ih.”

²⁷Diñu truh ti Êlim. Tinăn mâo pluh dua bĭt akŏ êa ƀlĕ leh anăn kjuh pluh ƀĕ ana kyâo boh đung. Diñu jưh tinăn giăm êa.