Read Rade Klei Kbiă 21 Bible Online

Klei Kbiă 21 - Rade bible

Klei Kbiă 21

¹Nĕ anei klei mtă brei ih bi êdah kơ diñu.

²Tơdah ih blei sa čô hlŭn Hêbrơ, ñu srăng mă bruă năm thŭn, leh anăn thŭn tal kjuh ñu srăng êngiê, amâo mâo tla ênoh ôh.

³Tơdah ñu mŭt leh hjăn, ñu srăng kbiă hjăn; tơdah ñu mŭt mâo mô̆ mbĭt, wăt mô̆ ñu srăng kbiă mbĭt hŏng ñu.

⁴Tơdah khua ñu brei mô̆ kơ ñu leh anăn mô̆ ñu kkiêng kơ anak êkei amâodah mniê, mô̆ leh anăn phung anak gơ̆ srăng jing dŏ khua ñu, leh anăn ñu srăng kbiă hjăn ñu.

⁵Ƀiădah tơdah hlŭn lač mngač, “Kâo khăp kơ khua kâo, mô̆ kâo, leh anăn phung anak kâo, kâo amâo čiăng jing êngiê ôh,”

⁶hlăk anăn khua ñu srăng atăt ba ñu ti anăp Aê Diê, leh anăn gơ̆ srăng brei ñu nao kơ ƀăng bhă prŏng amâodah kơ gơ̆ng ƀăng bhă; leh anăn khua ñu srăng čao knga ñu hŏng hjei knur, leh anăn hlŭn anăn srăng mă bruă kơ khua ñu jih klei hdĭp ñu.

⁷Tơdah sa čô mnuih čhĭ anak mniê ñu brei jing hlŭn, gơ̆ amâo srăng êngiê ôh msĕ si phung hlŭn êkei êngiê.

⁸Tơdah gơ̆ amâo bi mơak kơ khua gơ̆, pô čuăn leh gơ̆ kơ mô̆, ñu dưi brei arăng bi tui gơ̆; ƀiădah ñu amâo dưi čhĭ gơ̆ kơ phung tue ôh, kyuadah ñu amâo dôk sĭt suôr hŏng gơ̆ ôh.

⁹Tơdah ñu čuăn gơ̆ kơ anak êkei ñu, ñu srăng ngă hŏng gơ̆ tui si klei djŏ kơ phung anak mniê.

¹⁰Tơdah ñu mă sa čô mô̆ mkăn, ñu amâo dưi bi hrŏ ôh mơ̆ng mniê êlâo mnơ̆ng ƀơ̆ng huă, čhiăm ao, amâodah klei bhiăn gơ̆ jing mô̆ tal êlâo.

¹¹Leh anăn tơdah ñu amâo ngă ôh tlâo mnơ̆ng anăn kơ gơ̆, gơ̆ srăng êngiê mang, amâo tla ênoh ôh.

¹²Hlei pô čăm sa čô mnuih tơl djiê, arăng srăng bi mdjiê ñu.

¹³Tơdah ñu amâo dôk kăp ôh, ƀiădah Aê Diê brei gơ̆ lĕ hlăm kngan ñu, snăn Kâo srăng ktrâo sa boh ƀuôn anôk ñu dưi đuĕ dăp.

¹⁴Ƀiădah tơdah sa čô ngă kơ pô mkăn hŏng klei čiăng bi mdjiê gơ̆, brei ih ktŭng mă ñu mơ̆ng knưl Kâo leh anăn bi mdjiê ñu.

¹⁵Hlei pô čăm ama amâodah amĭ ñu, brei arăng bi mdjiê ñu.

¹⁶Hlei pô tlĕ mă sa čô mnuih leh anăn lŏ čhĭ gơ̆, amâodah tơdah arăng ƀuh gơ̆ hlăm kngan ñu, brei arăng bi mdjiê ñu.

¹⁷Hlei pô tăm pah kơ ama amâodah kơ amĭ ñu, brei arăng bi mdjiê ñu.

¹⁸Tơdah phung mnuih bi msao, leh anăn sa čô čăm hĕ pô mkăn hŏng boh tâo amâodah tŭk hŏng kngan, amâo tơl djiê ôh, ƀiădah tơl gơ̆ amâo dưi lŏ kgŭ;

¹⁹tơdah gơ̆ lŏ kgŭ leh anăn êbat hiu djă giê dra, snăn pô čăm gơ̆ srăng tlaih; knŏng ñu srăng tla ênoh hruê gơ̆ luč bruă, leh anăn ñu srăng brei arăng mdrao gơ̆ tơl hlao.

²⁰Tơdah sa čô čăm hŏng giê hlŭn ñu, êkei amâodah mniê, leh anăn hlŭn anăn djiê hĕ, brei arăng bi kmhal ñu.

²¹Ƀiădah tơdah gơ̆ ăt dôk hdĭp sa amâodah dua hruê, đăm brei arăng bi kmhal ñu ôh, kyuadah gơ̆ jing ngăn ñu keh.

²²Tơdah phung mnuih bi čĭk leh anăn diñu drăm hĕ sa čô mniê ba tian leh anăn bi plĕ hĕ gơ̆, ƀiădah amâo mâo klei jhat mkăn ôh, ung mniê anăn srăng đŭ pô ngă kơ gơ̆, leh anăn ñu srăng ba kđi tui si phung khua phat kđi lač.

²³Ƀiădah tơdah mâo klei jhat mkăn truh, snăn brei ih bi hnô klei hdĭp kơ klei hdĭp,

²⁴ală kơ ală, êgei kơ êgei, kngan kơ kngan, jơ̆ng kơ jơ̆ng,

²⁵anôk pui ƀơ̆ng kơ anôk pui ƀơ̆ng, anôk êka kơ anôk êka, anôk brăm kơ anôk brăm.

²⁶Tơdah sa čô mnuih čăm bi luč ală hlŭn ñu, êkei amâodah mniê, ñu srăng bi êngiê gơ̆ jing ênoh hnô kơ ală gơ̆.

²⁷Tơdah ñu bi joh sa boh êgei hlŭn ñu, êkei amâodah mniê, ñu srăng bi êngiê gơ̆ jing ênoh hnô kơ êgei gơ̆.

²⁸Tơdah sa drei êmô mnuh hĕ sa čô êkei amâodah sa čô mniê tơl djiê, brei arăng bhĭr bi mdjiê hĕ êmô anăn hŏng boh tâo, leh anăn arăng amâo srăng ƀơ̆ng ôh kđeh ñu; ƀiădah pô êmô srăng tlaih.

²⁹Ƀiădah tơdah êmô anăn êlâo khăng mnuh mnuih, leh anăn arăng hưn leh klei anăn kơ pô gơ̆, ƀiădah ñu amâo tuôm kiă kriê gơ̆ ôh, tơdah êmô anăn bi mdjiê hĕ sa čô êkei amâodah mniê, brei arăng bhĭr bi mdjiê êmô hŏng boh tâo, wăt bi mdjiê pô êmô mơh.

³⁰Tơdah arăng lư ênua kơ pô êmô sa ênoh čiăng bi tui klei hdĭp pô anăn, brei ñu ba kđi jih tui si klei arăng lư ênua kơ ñu.

³¹Tơdah êmô mnuh sa čô anak êkei amâodah anak mniê, brei arăng ngă tui si klei bhiăn anăn.

³²Tơdah êmô mnuh sa čô hlŭn, êkei amâodah mniê, brei pô êmô brei tlâo pluh sêkel prăk kơ khua hlŭn, leh anăn brei arăng bhĭr boh tâo bi mdjiê êmô.

³³Tơdah sa čô mnuih pŏk sa bĭt ƀăng amâodah sa čô mnuih klei sa bĭt ƀăng leh anăn amâo găm ñu ôh, leh anăn sa drei êmô amâodah sa drei aseh dliê lĕ hlăm ƀăng anăn,

³⁴pô ƀăng anăn srăng čiu ênoh kơ pô êmô; bi asei hlô mnơ̆ng djiê, pô ƀăng srăng mă kơ ñu pô.

³⁵Tơdah êmô sa čô mnuih mnuh hĕ êmô sa čô mnuih mkăn tơl djiê, brei diñu čhĭ êmô hdĭp leh anăn bi mbha ênoh. Brei diñu bi mbha mơh êmô djiê leh.

³⁶Ƀiădah tơdah arăng thâo kơ êmô anăn êlâo khăng mnuh, leh anăn pô gơ̆ amâo tuôm kiă kriê gơ̆ ôh, pô gơ̆ srăng bi hnô êmô msĕ; bi êmô djiê anăn mă kơ ñu pô.