Read Rade Klei Kbiă 30 Bible Online

Klei Kbiă 30 - Rade bible

Klei Kbiă 30

¹“Brei ih ngă sa boh knưl čuh mnơ̆ng ƀâo mngưi hŏng kyâo akasi.

²Awan ñu mâo sa heh, leh anăn găn ñu sa heh mơh, brei ñu jing mta dhar, leh anăn boh dlông ñu dua heh. Pă ƀĕ ki ti srăng jing sa đrông hŏng ñu.

³Brei ih luôm ñu hŏng mah doh anôk tĭng dlông, tĭng djiêô jŭm dar, leh anăn ti pă ƀĕ ki; leh anăn brei ih ngă sa griŏ hŏng mah jŭm dar.

⁴Brei ih ngă ti gŭ griŏ dua kwang mah tĭng dua nah djiêô. Brei ih dưm kwang anăn ti dua nah djiêô čiăng dưi hrô giê pioh kkung ñu.

⁵Brei ih ngă giê kkung anăn hŏng kyâo akasi leh anăn luôm digơ̆ hŏng mah.

⁶Brei ih dưm knưl ti anăp čhiăm păng dôk giăm hip klei bi mguôp, ti anăp kđhăp klei pap brei dôk ti dlông hip anăn. Tinăn Kâo srăng bi tuôm hŏng ih.

⁷Y-Arôn srăng čuh mnơ̆ng ƀâo mngưi tinăn; ñu srăng čuh mnơ̆ng anăn grăp aguah tơdah ñu mkra pui kđen.

⁸Ñu srăng čuh mơh mnơ̆ng anăn ti tlam tơdah ñu mkra pui kđen. Gơ̆ jing mnơ̆ng ƀâo mngưi nanao ti anăp Yêhôwa hlăm jih jang ênuk diih.

⁹Đăm čuh ôh ti dlông knưl anăn mnơ̆ng ƀâo mngưi amâo doh, kăn myơr rei mnơ̆ng myơr čuh, mnơ̆ng myơr kpŭng ƀhĭ, amâodah mnơ̆ng myơr tuh.

¹⁰Sa blư̆ grăp thŭn Y-Arôn srăng ngă klei bi doh klei soh ti pă ki ñu hŏng êrah mnơ̆ng ngă yang bi doh klei soh. Gơ̆ srăng ngă klei bi doh klei soh tinăn sa blư̆ grăp thŭn hlăm jih jang ênuk diih. Ñu jing mnơ̆ng doh jăk hĭn kơ Yêhôwa.”

¹¹Yêhôwa lač kơ Y-Môis,

¹²“Tơdah ih yap phung ƀuôn sang Israel, grăp čô diñu srăng blei mơ̆ng Yêhôwa klei bi tui kơ ñu pô tơdah ih yap diñu, čiăng đăm mâo klei ruă tưp hdơ̆ng phung diñu tơdah ih yap diñu.

¹³Grăp čô phung arăng yap srăng brei sa mkrah sêkel tui si sêkel mơ̆ng adŭ doh jăk (sa sêkel jing dua pluh gêra), sa mkrah sêkel anăn jing mnơ̆ng myơr kơ Yêhôwa.

¹⁴Grăp čô phung arăng yap mơ̆ng pô mâo dua pluh thŭn kơ dlông srăng brei mnơ̆ng myơr anăn kơ Yêhôwa.

¹⁵Mnuih mdrŏng amâo srăng blei lu hĭn ôh, leh anăn mnuih ƀun kăn srăng tuh ƀiă hĭn kơ sa mkrah sêkel rei, tơdah diih brei mnơ̆ng myơr kơ Yêhôwa čiăng bi doh diih pô kơ klei soh.

¹⁶Brei ih mă tŭ mơ̆ng phung ƀuôn sang Israel prăk kơ klei bi doh klei soh, leh anăn yua prăk anăn kơ bruă hlăm sang čhiăm klei bi kƀĭn, čiăng jing mnơ̆ng brei Yêhôwa hdơr kơ phung ƀuôn sang Israel, čiăng bi doh diih pô kơ klei soh.”

¹⁷Yêhôwa lač kơ Y-Môis,

¹⁸“Brei ih ngă msĕ mơh hŏng kông sa boh thŭng êa pioh rao, leh anăn jơ̆ng ñu hŏng kông mơh. Brei ih dưm gơ̆ plah wah sang čhiăm klei bi kƀĭn leh anăn knưl, leh anăn brei ih tuh êa hlăm thŭng anăn.

¹⁹Hŏng êa anăn Y-Arôn leh anăn phung anak êkei ñu srăng rao jơ̆ng kngan.

²⁰Tơdah diñu mŭt hlăm sang čhiăm klei bi kƀĭn, amâodah tơdah diñu nao giăm knưl čiăng mă bruă čuh hŏng pui mnơ̆ng myơr kơ Yêhôwa, diñu srăng rao jơ̆ng kngan hŏng êa huĭdah diñu djiê.

²¹Brei diñu rao jơ̆ng kngan diñu huĭdah diñu djiê. Klei anăn srăng jing klei bhiăn hlŏng lar kơ ñu leh anăn kơ phung anak čô ñu hlăm jih jang ênuk.”

²²Yêhôwa lač kơ Y-Môis,

²³“Mă bĕ mnơ̆ng ƀâo mngưi jăk hĭn: êma êtuh sêkel êa drao phĭ mơêa, dua êtuh êma pluh sêkel, čiăng lač sa mkrah anăn, sinamôn ƀâo mngưi, leh anăn dua êtuh êma pluh sêkel mbô ƀâo mngưi,

²⁴êma êtuh sêkel kas, tui si sêkel mơ̆ng adŭ doh jăk, leh anăn sa hin êa boh ôliwơ.

²⁵Brei ih ngă hŏng mnơ̆ng anăn sa mta êa ƀâo mngưi pioh kơ klei trôč doh jăk, jing êa ƀâo mngưi bi lŭk tui si klei bhiăn phung mkra êa ƀâo mngưi. Ñu srăng jing êa ƀâo mngưi pioh kơ klei trôč doh jăk.

²⁶Brei ih trôč êa ƀâo mngưi anăn ti sang čhiăm klei bi kƀĭn leh anăn hip klei bi mguôp,

²⁷jhưng wăt jih jang mnơ̆ng yua kơ ñu, jơ̆ng diăn wăt jih jang mnơ̆ng yua kơ ñu, leh anăn knưl čuh mnơ̆ng ƀâo mngưi,

²⁸knưl mnơ̆ng myơr čuh wăt jih jang mnơ̆ng yua kơ ñu, leh anăn thŭng êa wăt jơ̆ng ñu.

²⁹Brei ih pioh brei digơ̆, čiăng kơ digơ̆ srăng jing doh jăk hĭn. Ya mnơ̆ng djŏ hŏng digơ̆ srăng jing doh jăk.

³⁰Brei ih trôč êa ƀâo mngưi ti Y-Arôn leh anăn ti phung anak êkei ñu, leh anăn pioh brei diñu, čiăng kơ diñu dưi mă bruă kơ Kâo hlăm bruă phung khua ngă yang.

³¹Brei ih lač kơ phung ƀuôn sang Israel, ‘Mnơ̆ng anei srăng jing kơ Kâo êa ƀâo mngưi pioh kơ klei trôč doh jăk hlăm jih jang ênuk diih.

³²Đăm brei arăng tuh ñu ôh ti asei mlei sa čô mnuih ƀuôn sang, kăn diih dưi ngă êa ƀâo mngưi mkăn rei tui si hnơ̆ng msĕ snăn. Ñu jing doh jăk, leh anăn brei diih dlăng kơ ñu jing doh jăk mơh.

³³Hlei pô ngă msĕ, amâodah hlei pô dưm gơ̆ ti sa čô mnuih mkăn, brei arăng ktlah hĕ ñu mơ̆ng găp djuê Israel.’ ”

³⁴Yêhôwa lač kơ Y-Môis, “Mă bĕ mnơ̆ng ƀâo mngưi stakê, ônika, galbanum, mnơ̆ng ƀâo mngưi mmih leh anăn doh (grăp mta srăng mkă hnơ̆ng msĕ).

³⁵Brei ih ngă hŏng mnơ̆ng anăn sa mta mnơ̆ng ƀâo mngưi bi lŭk tui si klei bhiăn pô mkra êa ƀâo mngưi, bi ƀăt hŏng hra, êngeh leh anăn doh jăk.

³⁶Brei ih mă sa kdrêč, bi ƀhĭ, leh anăn dưm ti anăp hip klei hưn hlăm sang čhiăm klei bi kƀĭn ti anôk Kâo srăng bi tuôm hŏng ih. Ñu srăng jing doh jăk hĭn kơ diih.

³⁷Mnơ̆ng ƀâo mngưi anăn diih amâo dưi ngă pioh kơ diih pô ôh tui si hnơ̆ng anăn. Brei ih dlăng ñu jing doh jăk pioh kơ Yêhôwa.

³⁸Hlei pô srăng ngă msĕ snăn čiăng yua kơ ñu pô, brei arăng bi ktlah hĕ ñu mơ̆ng găp djuê Israel.”