Read Rade Klei Kbiă 37 Bible Online

Klei Kbiă 37 - Rade bible

Klei Kbiă 37

¹Y-Bêsalel ngă hip klei bi mguôp hŏng kyâo akasi; boh dlông ñu dua heh mkrah, găn ñu sa heh mkrah, leh anăn boh dơ̆ng ñu sa heh mkrah.

²Ñu luôm gơ̆ hŏng mah doh ti lam leh anăn ti êngao, leh anăn ñu ngă griŏ kmăn jŭm dar hŏng mah.

³Ñu tuh kơ gơ̆ pă boh kwang mah dưm ti pă bĭt kiêng gơ̆, sa nah dua kwang leh anăn sa nah mkăn dua kwang mơh.

⁴Ñu ngă giê kkung hŏng kyâo akasi, leh anăn luôm digơ̆ hŏng mah.

⁵Ñu hrô giê kkung hlăm kwang ti djiêô hip pioh kkung gơ̆.

⁶Ñu ngă sa boh kđhăp klei pap brei hŏng mah doh; boh dlông ñu dua heh mkrah, găn ñu sa heh mkrah.

⁷Ñu ngă dua rup čêrubim hŏng mah arăng tia ti dua bĭt knhal kđhăp klei pap brei,

⁸sa rup čêrubim ti sa bĭt knhal leh anăn sa rup čêrubim ti sa bĭt knhal mkăn. Ñu ngă rup čêrubim sa đrông hŏng kđhăp klei pap brei ti dua bĭt knhal.

⁹Rup čêrubim mblang siap diñu phă dlông, guôm hŏng siap diñu kđhăp klei pap brei, leh anăn ƀô̆ diñu bi anăp mbĭt. Ƀô̆ čêrubim dlăng kơ kđhăp klei pap brei.

¹⁰Ñu ngă jhưng hŏng kyâo akasi; boh dlông gơ̆ dua heh, găn gơ̆ sa heh, leh anăn boh dơ̆ng gơ̆ sa heh mkrah.

¹¹Ñu luôm gơ̆ hŏng mah doh, leh anăn ngă griŏ kmăn jŭm dar hŏng mah.

¹²Ñu mkă jŭm dar gơ̆ sa plă kngan, ti dlông anôk mkă anăn ñu ngă griŏ hŏng mah jŭm dar.

¹³Ñu tuh pă kwang hŏng mah, leh anăn dưm kwang anăn ti pă bĭt kiêng ti pă ƀĕ jơ̆ng gơ̆.

¹⁴Kwang anăn dôk giăm ti knhal griŏ jing anôk hrô giê pioh kkung jhưng.

¹⁵Ñu ngă giê kkung hŏng kyâo akasi leh anăn luôm digơ̆ hŏng mah, čiăng yua kkung jhưng anăn.

¹⁶Ñu ngă mnơ̆ng yua ti dlông jhưng, jam leh anăn čhiên dưm mnơ̆ng ƀâo mngưi, êlŭ, leh anăn kbhê pioh yua tuh mnơ̆ng myơr. Ñu ngă digơ̆ hŏng mah doh.

¹⁷Ñu ngă jơ̆ng diăn hŏng mah doh; ñu ngă jơ̆ng diăn hŏng mah arăng tia, jơ̆ng gơ̆, asei gơ̆, kčok gơ̆, boh gơ̆, leh anăn mnga gơ̆ jing hlăm sa đrông.

¹⁸Mâo năm ƀĕ adhan kbiă tĭng djiêô, tlâo ƀĕ adhan jơ̆ng diăn tĭng sa nah, leh anăn tlâo ƀĕ adhan jơ̆ng diăn tĭng sa nah mkăn.

¹⁹Sa ƀĕ adhan mâo tlâo boh kčok ngă msĕ si boh amandê, sa boh leh anăn mnga ñu, leh anăn ti adhan mkăn mâo tlâo boh kčok ngă msĕ si boh amandê, sa boh leh anăn mnga ñu, jing msĕ mơh kơ năm ƀĕ adhan kbiă mơ̆ng jơ̆ng diăn.

²⁰Ti gơ̆ng pui diăn mâo pă boh kčok ngă msĕ si boh amandê, sa boh leh anăn mnga ñu.

²¹Mâo sa boh ti gŭ dua ƀĕ adhan hlăm sa đrông anăn, snăn yơh kơ năm ƀĕ adhan kbiă mơ̆ng jơ̆ng diăn anăn.

²²Boh diñu leh anăn adhan diñu jing sa đrông; jih anăn tia hlăm sa đrông mah doh.

²³Ñu ngă kjuh pui kđen kơ gơ̆, dŏ bi mdjiê pui gơ̆, leh anăn čhiên djă dŏ anăn ñu ngă hŏng mah doh.

²⁴Ñu yua sa talăng mah doh pioh ngă gơ̆ mbĭt hŏng jih jang mnơ̆ng yua kơ ñu.

²⁵Ñu ngă knưl čuh mnơ̆ng ƀâo mngưi hŏng kyâo akasi; boh dlông gơ̆ sa heh, găn gơ̆ sa heh, mta dhar, leh anăn boh dơ̆ng gơ̆ dua heh, ki gơ̆ jing sa đrông hŏng gơ̆.

²⁶Ñu luôm gơ̆ hŏng mah doh, anôk ti dlông, tĭng djiêô jŭm dar, leh anăn ki; leh anăn ñu ngă sa griŏ hŏng mah doh jŭm dar.

²⁷Ñu ngă ti gŭ griŏ dua kwang mah tĭng dua nah djiêô, ñu dưm kwang anăn ti dua nah djiêô čiăng hrô giê pioh kkung gơ̆.

²⁸Ñu ngă giê kkung hŏng kyâo akasi, leh anăn luôm digơ̆ hŏng mah.

²⁹Ñu ngă êa ƀâo mngưi kơ klei trôč pioh brei, leh anăn mnơ̆ng ƀâo mngưi doh leh anăn mmih, tui si klei bhiăn phung mkra mnơ̆ng ƀâo mngưi.