Read Rade Klei Kbiă 39 Bible Online

Klei Kbiă 39 - Rade bible

Klei Kbiă 39

¹Hŏng mrai ñuôm êa piơk, hrah jŭ, hrah huč diñu ngă čhiăm ao hŏng klei mbruă pioh kơ bruă hlăm adŭ doh jăk; diñu ngă čhiăm ao doh jăk kơ Y-Arôn tui si Yêhôwa mtă leh kơ Y-Môis.

²Ñu ngă ao êphôt hŏng mrai mah, piơk, hrah jŭ, hrah huč, leh anăn kbuă điêt aruăt.

³Arăng tia lu pŏk mah êpih leh anăn khăt brei jing mrai, čiăng mñam mbĭt hŏng mrai piơk, hrah jŭ, hrah huč, leh anăn kbuă điêt aruăt hŏng klei mbruă.

⁴Diñu ngă dua pŏk čhiăm guôm mra bi mtuôp mbĭt hŏng dua knhal ao êphôt.

⁵Hdrăng kơiêng arăng mñam hŏng klei mbruă ti ao êphôt čiăng hyuă gơ̆, diñu ngă msĕ si ao mơh leh anăn đuôm hŏng ao, arăng ngă ñu hŏng mrai mah, piơk, hrah jŭ, hrah huč, leh anăn kbuă điêt aruăt tui si Yêhôwa mtă leh kơ Y-Môis.

⁶Diñu mkra boh tâo ônik, mƀlir hlăm griŏ mah, kač msĕ si mnơ̆ng kđăm, tui si anăn phung anak êkei Y-Israel.

⁷Ñu dưm digơ̆ ti čhiăm guôm mra ao êphôt, jing boh tâo bi hdơr kơ phung anak êkei Y-Israel, tui si Yêhôwa mtă leh kơ Y-Môis.

⁸Diñu ngă mnal đah da hŏng klei mbruă msĕ si ao êphôt hŏng mrai mah, piơk, hrah jŭ, hrah huč, leh anăn kbuă điêt aruăt.

⁹Mnal anăn mđơr dơ̆ng găn. Diñu ngă mnal đah da dua tal, dơ̆ng sa mkrah heh, leh anăn găn ñu sa mkrah heh, jing dua tal.

¹⁰Diñu mƀlir mâo pă pruê̆ boh tâo yuôm: pruê̆ tal sa, sa asăr sardôn, sa asăr tôpas, sa asăr êmêrôt;

¹¹pruê̆ tal dua, sa asăr êskabuk, sa asăr saphir, sa asăr diamôn;

¹²pruê̆ tal tlâo, sa asăr ôpal, sa asăr agat, sa asăr amêtis;

¹³pruê̆ tal pă, sa asăr bêril, sa asăr ônik, sa asăr jaspidi. Boh tâo yuôm anăn arăng mƀlir hlăm griŏ mah.

¹⁴Mâo pluh dua asăr tui si anăn phung anak êkei Y-Israel, arăng kač digơ̆ msĕ si mnơ̆ng arăng kđăm, grăp asăr boh tâo mâo sa anăn hlăm phung pluh dua găp djuê.

¹⁵Diñu ngă ti mnal đah da klei săng đai điêt aruăt hŏng mah doh, ƀôñ msĕ si klei kuĭ.

¹⁶Diñu ngă dua griŏ hŏng mah leh anăn dua boh kwang mah, leh anăn diñu dưm dua boh kwang anăn ti dua nah djiêô mnal đah da.

¹⁷Diñu hrô dua aruăt klei kuĭ mah hlăm dua boh kwang ti dua nah djiêô mnal đah da.

¹⁸Diñu kă knhal dua aruăt klei kuĭ ti anăp dua kwang griŏ dôk ti čhiăm guôm mra ao êphôt.

¹⁹Diñu ngă mơh dua boh kwang mah, dưm diñu ti dua nah djiêô mnal đah da hlăm lam sô̆ hŏng ao êphôt.

²⁰Diñu ngă dua boh kwang mah, dưm digơ̆ tĭng nah gŭ ti čhiăm guôm mra ao êphôt tĭng anăp giăm anôk bi kkuh ti dlông hdrăng kơiêng ao êphôt mñam hŏng klei mbruă.

²¹Diñu kă mnal đah da ti kwang ñu hŏng kwang ao êphôt hŏng klei kuĭ piơk, čiăng kơ mnal đah da dôk ti dlông hdrăng kơiêng ao êphôt arăng mñam hŏng klei mbruă, čiăng kơ mnal đah da amâo tlaih ôh mơ̆ng ao êphôt, tui si Yêhôwa mtă leh kơ Y-Môis.

²²Ñu ngă ao jhung êphôt mñam hŏng mrai piơk sơăi.

²³Ƀăng ti krah ao jhung ñu să jŭm dar msĕ si ƀăng arăng riêm, čiăng kơ đăm tĭ ôh.

²⁴Jŭm knhal ao ti gŭ diñu ngă boh pomgranat hŏng mrai piơk, hrah jŭ, hrah huč, leh anăn kbuă điêt aruăt.

²⁵Diñu ngă rĭng riâo hŏng mah doh, leh anăn bi kmlah hŏng boh pomgranat jŭm dar knhal ao ti gŭ,

²⁶sa asăr rĭng riâo mah leh anăn sa asăr boh pomgranat, sa asăr rĭng riâo mah leh anăn sa asăr boh pomgranat jŭm dar knhal ao pioh kơ bruă, tui si Yêhôwa mtă leh kơ Y-Môis.

²⁷Diñu mñam ao jhung hŏng kbuă điêt aruăt kơ Y-Arôn leh anăn phung anak êkei ñu,

²⁸kưn hŏng kbuă điêt aruăt, đuôn hŏng kbuă điêt aruăt, leh anăn čhum hŏng kbuă điêt aruăt,

²⁹leh anăn hdrăng kơiêng hŏng kbuă điêt aruăt piơk, hrah jŭ, leh anăn hrah huč, bruă đêč, tui si Yêhôwa mtă leh kơ Y-Môis.

³⁰Diñu ngă hŏng mah doh sa pŏk mdhă điêt đuôn mtao doh jăk. Diñu ktur tinăn msĕ si arăng ktur sa mnơ̆ng kđăm: “DOH JĂK KƠ YÊHÔWA”.

³¹Diñu kă gơ̆ hŏng sa aruăt klei kuĭ piơk, čiăng kă gơ̆ ti anăp kưn, tui si Yêhôwa mtă leh kơ Y-Môis.

³²Snăn ruê̆ leh jih bruă ngă sang čhiăm klei bi kƀĭn. Phung ƀuôn sang Israel ngă leh jih tui si klei Yêhôwa mtă kơ Y-Môis.

³³Diñu ba sang čhiăm kơ Y-Môis: sang čhiăm leh anăn jih jang mnơ̆ng yua kơ ñu, mnơ̆ng kđip, mdhă, giê kal, kmeh, leh anăn klŏ đal ñu;

³⁴mnơ̆ng guôm hŏng klĭt biăp knô mkra leh, leh anăn mnơ̆ng guôm klĭt jăk siam, leh anăn čhiăm păng;

³⁵hip klei bi mguôp wăt giê kkung ñu leh anăn kđhăp klei pap brei;

³⁶jhưng leh anăn jih jang mnơ̆ng yua kơ ñu, leh anăn kpŭng myơr kơ Aê Diê;

³⁷jơ̆ng diăn mah doh wăt pui kđen ñu, jing pui kđen anăn mkra leh, mnơ̆ng yua kơ ñu, leh anăn êa boh ôliwơ kơ pui kđen;

³⁸knưl mah, êa ƀâo mngưi pioh trôč, mnơ̆ng ƀâo mngưi, leh anăn čhiăm phiang ti ƀăng bhă mŭt sang čhiăm;

³⁹knưl kông wăt driah kông mñam rưng ñu, giê kkung ñu, leh anăn jih jang mnơ̆ng yua kơ ñu; thŭng êa wăt jơ̆ng ñu;

⁴⁰čhiăm kpal păng ti wăl, kmeh wăt klŏ đal ñu, leh anăn čhiăm phiang ti ƀăng jang mŭt wăl, klei kuĭ, giê mnư̆; leh anăn jih jang mnơ̆ng yua kơ bruă sang čhiăm, kơ sang čhiăm klei bi kƀĭn;

⁴¹čhiăm ao ngă hŏng klei mbruă pioh kơ bruă hlăm adŭ doh jăk, čhiăm ao doh jăk khua ngă yang Y-Arôn leh anăn čhiăm ao kơ phung anak êkei ñu pioh kơ bruă phung khua ngă yang.

⁴²Phung ƀuôn sang Israel ngă jih jang bruă anăn tui si Yêhôwa mtă leh kơ Y-Môis.

⁴³Y-Môis ksiêm jih jang bruă, leh anăn nĕ anei, diñu ngă leh klei anăn tui si Yêhôwa mtă leh. Leh anăn Y-Môis hơêč hmưi kơ diñu.