Read Rade Klei Kbiă 40 Bible Online

Klei Kbiă 40 - Rade bible

Klei Kbiă 40

¹Yêhôwa lač kơ Y-Môis,

²“Hruê tal sa hlăm mlan tal sa brei ih mdơ̆ng sang čhiăm klei bi kƀĭn.

³Brei ih dưm tinăn hip klei bi mguôp, leh anăn gang hip hŏng čhiăm păng.

⁴Brei ih ba jhưng leh anăn dăp bi djŏ mnơ̆ng dưm ti dlông. Brei ih ba jơ̆ng diăn leh anăn mkra pui kđen.

⁵Brei ih dưm knưl mah pioh čuh mnơ̆ng ƀâo mngưi ti anăp hip klei bi mguôp, leh anăn yuôl čhiăm păng ti ƀăng bhă mŭt sang čhiăm.

⁶Brei ih dưm knưl mnơ̆ng myơr čuh ti anăp ƀăng bhă mŭt sang čhiăm klei bi kƀĭn.

⁷Brei ih dưm thŭng êa plah wah sang čhiăm klei bi kƀĭn hŏng knưl, leh anăn dưm êa hlăm anăn.

⁸Brei ih mdơ̆ng wăl jŭm dar, leh anăn yuôl čhiăm păng ti ƀăng jang wăl.

⁹Brei ih mă êa ƀâo mngưi pioh trôč, leh anăn trôč sang čhiăm leh anăn jih jang mnơ̆ng hlăm ñu. Brei ih pioh brei ñu wăt jih jang mnơ̆ng yua kơ ñu, leh anăn ñu srăng jing doh jăk.

¹⁰Brei ih trôč knưl mnơ̆ng myơr čuh leh anăn jih jang mnơ̆ng yua kơ ñu, leh anăn pioh brei knưl; leh anăn knưl srăng jing doh jăk hĭn.

¹¹Brei ih trôč êa ƀâo mngưi ti thŭng êa wăt jơ̆ng ñu, leh anăn pioh brei ñu.

¹²Leh klei anăn brei ih atăt Y-Arôn wăt phung anak êkei ñu kơ ƀăng bhă sang čhiăm klei bi kƀĭn, leh anăn bi mnei diñu hŏng êa.

¹³Brei ih bi hơô Y-Arôn hŏng čhiăm ao doh jăk, leh anăn trôč êa ƀâo mngưi ti ñu pioh brei ñu, čiăng kơ ñu dưi mă bruă kơ Kâo jing khua ngă yang.

¹⁴Brei ih atăt phung anak êkei ñu leh anăn bi hơô diñu hŏng ao jhung,

¹⁵leh anăn trôč êa ƀâo mngưi kơ diñu msĕ si ih trôč ama diñu, čiăng kơ diñu dưi mă bruă kơ Kâo jing phung khua ngă yang. Klei trôč êa ƀâo mngưi anăn srăng bi sĭt kơ diñu klei jing phung khua ngă yang nanao hlăm jih jang ênuk diñu.”

¹⁶Snăn Y-Môis ngă tui si jih klei Yêhôwa mtă leh kơ ñu.

¹⁷Hruê tal sa hlăm mlan tal sa thŭn tal dua diñu bi leh mdơ̆ng sang čhiăm.

¹⁸Y-Môis mdơ̆ng sang čhiăm; ñu dưm klŏ đal gơ̆, mdơ̆ng mdhă gơ̆, dưm giê gang gơ̆, leh anăn mdơ̆ng kmeh gơ̆.

¹⁹Ñu mblang čhiăm ti dlông sang čhiăm, leh anăn ñu tlŭm čhiăm ti dlông tui si Yêhôwa mtă leh kơ Y-Môis.

²⁰Ñu mă mdhă klei hưn leh anăn dưm gơ̆ hlăm hip, ñu hrô giê kkung ti hip, leh anăn dưm kđhăp klei pap brei ti dlông hip.

²¹Ñu ba hip hlăm sang čhiăm leh anăn yuôl čhiăm păng bi mdăp hip klei bi mguôp, tui si Yêhôwa mtă leh kơ Y-Môis.

²²Ñu dưm jhưng hlăm sang čhiăm klei bi kƀĭn tĭng dưr sang čhiăm ti êngao čhiăm păng.

²³Ñu dăp kpŭng djŏ pruê̆ ti anăp Yêhôwa tui si klei Yêhôwa mtă leh kơ Y-Môis.

²⁴Ñu dưm jơ̆ng diăn hlăm sang čhiăm klei bi kƀĭn, phă hŏng jhưng tĭng dhŭng sang čhiăm,

²⁵leh anăn ñu mkra pui kđen ti anăp Yêhôwa, tui si Yêhôwa mtă leh kơ Y-Môis.

²⁶Ñu dưm knưl mah hlăm sang čhiăm klei bi kƀĭn ti anăp čhiăm păng.

²⁷Ñu čuh ti dlông anăn mnơ̆ng ƀâo mngưi tui si Yêhôwa mtă leh kơ Y-Môis.

²⁸Ñu yuôl čhiăm păng ti ƀăng bhă mŭt sang čhiăm.

²⁹Ñu dưm knưl mnơ̆ng myơr čuh ti ƀăng bhă mŭt sang čhiăm klei bi kƀĭn, leh anăn ñu myơr ti dlông anăn mnơ̆ng myơr čuh leh anăn mnơ̆ng myơr kpŭng ƀhĭ tui si Yêhôwa mtă leh kơ Y-Môis.

³⁰Ñu dưm thŭng êa plah wah sang čhiăm klei bi kƀĭn leh anăn knưl, leh anăn ñu tuh êa hlăm anăn pioh rao.

³¹Y-Môis, Y-Arôn, leh anăn phung anak êkei Y-Arôn rao jơ̆ng kngan tinăn.

³²Grăp blư̆ diñu mŭt hlăm sang čhiăm klei bi kƀĭn leh anăn diñu nao giăm knưl, diñu rao hĕ, tui si Yêhôwa mtă leh kơ Y-Môis.

³³Ñu mdơ̆ng wăl jŭm dar sang čhiăm leh anăn knưl, leh anăn ñu păng čhiăm ƀăng jang wăl. Snăn Y-Môis bi ruê̆ jih bruă anăn.

³⁴Leh klei anăn knam guôm sang čhiăm klei bi kƀĭn, leh anăn klei guh kơang Yêhôwa bi bŏ sang čhiăm.

³⁵Y-Môis amâo dưi mŭt ôh hlăm sang čhiăm klei bi kƀĭn, kyuadah knam dôk ti dlông, leh anăn klei guh kơang Yêhôwa bi bŏ sang čhiăm.

³⁶Êjai jih klei diñu hiu êbat, tơdah knam đĭ đuĕ mơ̆ng dlông sang čhiăm hlăk anăn phung ƀuôn sang Israel dưi nao kơ anôk mkăn.

³⁷Ƀiădah tơdah knam amâo đĭ đuĕ ôh, diñu amâo đuĕ nao ôh tơl hruê knam đĭ đuĕ phă dlông.

³⁸Kyuadah êjai jih klei diñu hiu êbat, knam Yêhôwa dôk ti dlông sang čhiăm êjai hruê, leh anăn mâo pui hlăm anăn êjai mlam, ti anăp ală jih jang sang Israel.