Read Rade Y-Yôp 11 Bible Online

Y-Yôp 11 - Rade bible

Y-Yôp 11

¹Y-Sôphar mnuih čar Naama lŏ wĭt lač:

²“Jing djŏ mơ̆ arăng amâo mâo klei lŏ wĭt lač ôh kơ klei blŭ lu, leh anăn sa čô mnuih thâo blŭ mâo klei yap kpă mơ̆?

³Jing djŏ mơ̆ klei ih blŭ tă tăn brei phung mnuih dôk kriêp, leh anăn tơdah ih mưč, arăng amâo srăng bi hêñ ih mơ̆?

⁴Kyuadah ih lač, ‘Mta klei kâo đăo jing êngeh, leh anăn kâo jing doh ti anăp ală Aê Diê.’

⁵Ƀiădah čiăng snăk kơ Aê Diê ha ƀăng êgei leh anăn blŭ hrăm hŏng ih,

⁶čiăng kơ Ñu hưn kơ ih klei hgăm hlăm klei thâo mĭn! Kyuadah klei knhâo sĭt Ñu mâo lu hĭn snăn brei ih thâo kơ Aê Diê amâo bi kmhal năng hŏng klei soh ih.

⁷Dưi mơ̆ ih thâo săng klei êlam Aê Diê? Dưi mơ̆ ih thâo săng klei prŏng Pô Mâo Jih Klei Myang?

⁸Klei anăn dlông hĭn kơ adiê — ya klei ih dưi ngă? Klei anăn êlam hĭn kơ Ƀuôn Phung Djiê — ya klei ih dưi thâo?

⁹Tơdah mkă, ñu jing dlông hĭn kơ lăn ala leh anăn prŏng hĭn kơ êa ksĭ.

¹⁰Tơdah Ñu găn leh anăn krư̆, leh anăn iêô kơ klei phat kđi, hlei pô dưi kơ̆ng ghă Ñu?

¹¹Kyuadah Ñu thâo kral hlei pô jing phung mplư; tơdah Ñu ƀuh klei wê, amâo djŏ hĕ Ñu srăng dôk mĭn kơ klei anăn?

¹²Ƀiădah sa čô mluk truh kơ klei knhâo Tơdah sa drei aseh dliê mđai kơ sa čô mnuih.

¹³Tơdah ih myơr ai tiê ih kơ Aê Diê, leh anăn yơr kngan ih čiăng wah lač kơ Ñu,

¹⁴tơdah ih hwiê hĕ klei wê ih ngă, leh anăn đăm brei klei ƀai dôk mbĭt hŏng ih ôh,

¹⁵sĭt nik hlăk anăn ih srăng kngưr ƀô̆ mta ih amâo mâo klei hêñ ôh; ih srăng dôk hơĭt, leh anăn amâo huĭ ôh.

¹⁶Ih srăng wơr bĭt klei knap mñai ih; ih srăng hdơr klei anăn msĕ si êa đoh đuĕ leh.

¹⁷Leh anăn klei hdĭp ih srăng jing mngač hĭn kơ yang hruê dơ̆ng, klei mmăt klei hdĭp ih srăng mbliư̆ jing klei mngač aguah ưm.

¹⁸Leh anăn ih srăng mâo klei êđăp ênang, kyuadah mâo leh klei čang hmăng; ih srăng mâo klei mgang, leh anăn dôk mdei hŏng klei hơĭt.

¹⁹Ih srăng đih, leh anăn amâo mâo pô bi huĭ ih ôh; lu mnuih srăng kwưh klei ih đru.

²⁰Ƀiădah ală phung ƀai srăng bum; amâo lŏ mâo êlan kơ diñu dưi đuĕ ôh, leh anăn klei diñu čang hmăng jing klei tuč êwa.”