Read Rade Y-Yôp 17 Bible Online

Y-Yôp 17 - Rade bible

Y-Yôp 17

¹Êwa kâo tuč leh, hruê kâo jih leh, msat kâo arăng mkra leh.

²Sĭt nik mâo phung mưč jŭm dar kâo, leh anăn ală kâo dôk dlăng kơ klei diñu mčhur ai.

³“Brei Ih răng kơ klei hdĭp kâo; êngao kơ Ih, hlei pô srăng mgang brei klei kâo?

⁴Kyuadah Ih brei klei mĭn diñu mmăt amâo thâo săng, kyua anăn Ih amâo srăng brei diñu dưi ôh.

⁵Hlei pô kčŭt kơ mah jiăng ñu čiăng plah mă đa kdrêč ngăn dŏ digơ̆, ală phung anak ñu srăng jing mmăt.

⁶Ñu mjing kâo mnơ̆ng phung ƀuôn sang djă djik djak, leh anăn kâo jing sa čô mnuih arăng kčuh êa bah.

⁷Ală kâo giăm jing mmăt hŏng klei ênguôt, leh anăn jih asei mlei kâo jing msĕ si êyui.

⁸Phung mnuih kpă ênô bi kngăr kơ klei anăn, leh anăn phung ênuah ênô kgŭ ngă kơ pô amâo đăo.

⁹Ƀiădah pô kpă ăt êbat tui si êlan ñu, leh anăn pô mâo kngan doh srăng jing ktang hĭn êjai.

¹⁰Ƀiădah jih jang diih, lŏ blŭ bĕ, leh anăn kâo amâo srăng ƀuh ôh sa čô mnuih knhâo ti krah diih.

¹¹Hruê kâo dôk hdĭp êgao leh, hdră kâo luč čhuč čhuê leh, klei ai tiê kâo čiăng msĕ mơh.

¹²Diñu mbliư̆ hruê jing mlam, diñu lač, ‘Klei mngač păt čiăng truh leh!’

¹³Tơdah kâo duah Ƀuôn Phung Djiê jing sang kơ kâo, tơdah kâo mkra jhưng pĭt kâo hlăm klei mmăt,

¹⁴tơdah kâo lač kơ ƀăng êlam, ‘Ih yơh jing ama kâo,’ leh anăn lač kơ hluăt, ‘Amĭ kâo,’ amâodah ‘Amai kâo,’

¹⁵snăn ti anôk kâo mâo klei čang hmăng? Hlei srăng ƀuh klei kâo čang hmăng?

¹⁶Klei kâo čang hmăng srăng trŭn kơ ƀăng bhă Ƀuôn Phung Djiê mơ̆? Hmei srăng trŭn mđrăm mbĭt kơ bruih lăn mơ̆?”