Read Rade Y-Yôp 18 Bible Online

Y-Yôp 18 - Rade bible

Y-Yôp 18

¹Y-Bildat mnuih čar Suah lŏ wĭt lač:

²“Dŭm boh sui ih srăng dôk blŭ? Ksiêm bĕ, leh anăn kơh drei srăng lŏ blŭ.

³Si ngă ih yap hmei msĕ si hlô mnơ̆ng? Si ngă ih yap hmei jing mluk mgu?

⁴Ơ pô bi êka ih pô hŏng klei ngêñ, arăng srăng brei lăn ala jing ênguôl mơ̆ kyua ih? Amâodah arăng srăng bi klŭng mơ̆ boh tâo mơ̆ng anôk gơ̆ kyua ih?

⁵Sĭt nik arăng bi ram hĕ klei mngač phung ƀai, leh anăn êlah pui ñu amâo mtrang ôh.

⁶Klei mngač hlăm sang čhiăm ñu jing mmăt, leh anăn arăng bi mdjiê pui kđen ti dlông ñu.

⁷Arăng bi đŭt hĕ knhuang dlông ñu, leh anăn klei ñu čiăng ngă bi têč hnêč ñu pô.

⁸Kyuadah jơ̆ng ñu pô brei ñu djŏ ñuăl, leh anăn ñu êbat ti dlông ƀăng bi kdluh ñu.

⁹Ñu djŏ kđông ti kđul ñu, ñuăl kơ̆ng ñu.

¹⁰Arăng mdăp klei ƀưi kơ ñu hlăm lăn, leh anăn ƀêč kđông kơ ñu ti klông.

¹¹Klei bi huĭ dôk jŭm gah găn, leh anăn tiŏ ti tluôn grăp knhuang ñu.

¹²Klei ktang ñu hrŏ kyua êpa, klei knap mñai dôk kăp ti djiêô ñu.

¹³Klei ruă ƀơ̆ng hĕ klĭt ñu, anak khua klei djiê bi rai jơ̆ng kngan ñu.

¹⁴Mơ̆ng sang čhiăm ñu dôk hơĭt, arăng mă mđuĕ ñu, leh anăn atăt ba ñu kơ mtao klei bi huĭ prŏng.

¹⁵Amâo mâo sa mta mnơ̆ng adôk hlăm sang čhiăm ñu ôh; arăng tuh boh tâo pui ti dlông sang ñu.

¹⁶Agha ñu krô ti gŭ, leh anăn adhan ñu dliu ti dlông.

¹⁷Arăng amâo lŏ hdơr kơ ñu ôh ti lăn ala, leh anăn ñu amâo mâo hing ang ôh hlăm čar.

¹⁸Mơ̆ng klei mngač, arăng hwiê ñu kơ klei mmăt, leh anăn suôt ñu mơ̆ng lăn ala.

¹⁹Ti krah phung ƀuôn sang ñu, ñu amâo mâo anak, kăn mâo čô rei, leh anăn ti anôk ñu dôk amâo lŏ mâo ôh phung ñu ăt dôk hdĭp.

²⁰Phung mơ̆ng čar yŭ bi kngăr kơ klei truh kơ ñu, leh anăn klei bi huĭ ktang snăk truh kơ phung mơ̆ng čar ngŏ.

²¹Msĕ snăn jing anôk kơ phung ƀai, msĕ snăn jing anôk kơ phung amâo thâo kral Aê Diê ôh.”