Read Rade Y-Yôp 19 Bible Online

Y-Yôp 19 - Rade bible

Y-Yôp 19

¹Y-Yôp lŏ wĭt lač:

²“Dŭm boh sui Diih srăng bi knap kâo, leh anăn bi mčah kâo đơ điêt hŏng klei blŭ?

³Anei jing pluh blư̆ leh diih ƀuah kơ kâo; diih amâo hêñ ôh ngă klei jhat kơ kâo.

⁴Leh anăn tơdah sĭt kâo jing soh leh, klei soh anăn lĕ kơ kâo pô.

⁵Tơdah sĭt nik ih bi mđĭ diih pô ngă kơ kâo, leh anăn brei klei knap mñai kâo jing klei diih mă bi mgăl hŏng kâo,

⁶snăn brei diih thâo kơ Aê Diê yơh ngă kơ kâo, leh anăn Ñu bi djŏ kâo hlăm ñuăl Ñu.

⁷Nĕ anei kâo ur, ‘Mâo klei jŭ jhat!’ ƀiădah arăng amâo lŏ wĭt lač kơ kâo ôh; kâo ur kraih, ƀiădah arăng amâo ngă klei djŏ ôh.

⁸Ñu bư̆ mnư̆ bi gun êlan kâo, snăn kâo amâo dưi găn ôh, leh anăn Ñu guôm hŏng klei mmăt ti jih klông kâo êbat.

⁹Ñu toh hĕ leh mơ̆ng kâo klei guh kơang kâo, leh anăn mă mđuĕ hĕ đuôn mtao mơ̆ng boh kŏ kâo.

¹⁰Ñu bi mčah kâo leh jŭm gah găn tơl kâo đuĕ nao; Ñu bi luč klei kâo čang hmăng msĕ si arăng buč leh sa ƀĕ ana kyâo.

¹¹Ñu čuh ai ngêñ kơ kâo leh, leh anăn yap kâo jing pô roh Ñu.

¹²Phung kahan Ñu ksŭng hriê mbĭt; diñu wang čiăng ngă kơ kâo leh anăn dôk jŭm dar sang čhiăm kâo.

¹³Ñu bi kbưi hĕ phung ayŏng adei kâo mơ̆ng kâo, leh anăn brei phung mah jiăng kâo jing tue sĭt nik kơ kâo.

¹⁴Găp djuê kâo lui hĕ leh kâo, leh anăn phung mah jiăng sĭt suôr kâo wơr bĭt leh kâo.

¹⁵Phung hriê čhưn dôk hlăm sang kâo yap kâo jing tue; phung dĭng buăl mniê kâo yap kâo msĕ si sa čô tue; kâo jing leh pô diñu amâo thâo kral ôh.

¹⁶Kâo iêô dĭng buăl kâo, ƀiădah ñu amâo lŏ wĭt lač ôh kơ kâo; wăt tơdah kâo kwưh kơ ñu hŏng ƀăng êgei kâo.

¹⁷Mnâo kâo jing mnơ̆ng mô̆ kâo amâo dưi tŭ, phung anak êkei amĭ kâo bi êmut kơ kâo.

¹⁸Wăt phung hđeh điêt bi êmut kơ kâo; tơdah kâo kgŭ, diñu tlao mưč kơ kâo.

¹⁹Jih jang phung mah jiăng kâo sĭt suôr bi êmut snăk kơ kâo; phung kâo khăp leh wir ngă kơ kâo mơh.

²⁰Kâo êwang snăk tơl bi êdah klang kleh, kâo dôk hdĭp mă knŏng êwa ƀơp ƀơp ti ƀăng êgei.

²¹Pap mñai kơ kâo đa, pap mñai kơ kâo bĕ, Ơ diih, phung mah jiăng kâo, kyuadah kngan Aê Diê čăm kâo leh!

²²Si ngă diih tiŏ kâo msĕ si Aê Diê mơh? Si ngă diih amâo hrăp ôh mă kđeh kâo?

²³Ơ čiăng snăk arăng čih hĕ leh klei kâo blŭ! Čiăng snăk arăng čih pioh hĕ digơ̆ hlăm sa pŏk hdruôm hră!

²⁴Čiăng snăk hŏng giê čih msei leh anăn kmrak arăng ktur digơ̆ ti boh tâo brei dôk nanao!

²⁵Kyuadah kâo thâo Pô Bi Tui kâo dôk hdĭp, leh anăn ti knhal tuč Ñu srăng dôk dơ̆ng ti dlông lăn ala.

²⁶Leh anăn tơdah klĭt kâo rai leh jih, ăt hlăm asei mlei kâo srăng ƀuh Aê Diê,

²⁷kâo srăng ƀuh Ñu hŏng ală kâo pô yơh, amâo djŏ pô mkăn ôh. Ai tiê kâo dôk čang klei anăn!

²⁸Tơdah diih lač, ‘Si drei srăng tiŏ ñu?’ leh anăn ‘Phŭn klei dleh anei kbiă mơ̆ng ñu,’

²⁹huĭ bĕ kơ đao gưm, kyuadah klei ngêñ bi truh klei bi kmhal hŏng đao gưm, čiăng kơ diih dưi thâo mâo klei phat kđi.”