Read Rade Y-Yôp 20 Bible Online

Y-Yôp 20 - Rade bible

Y-Yôp 20

¹Y-Sôphar mnuih čar Naama lŏ wĭt lač:

²“Snăn klei kâo rŭng răng mtrŭt kâo lŏ wĭt lač, kyua anăn kâo ruăt blŭ.

³Kâo hmư̆ klei arăng ƀuah jing klei dlao wač kơ kâo, leh anăn mơ̆ng klei kâo thâo săng klei mĭn kâo brei kâo lŏ wĭt lač.

⁴Ih amâo thâo hĕ klei anei mơ̆ng đưm đă, dơ̆ng mơ̆ng ênuk arăng dưm mnuih ti lăn ala,

⁵klei dưi phung ƀai knŏng jing bhiâo, leh anăn klei mơak phung amâo đăo knŏng bhiâo mơ̆?

⁶Wăt tơdah klei ñu mgao đĭ truh kơ adiê, leh anăn boh kŏ ñu sô̆ ti knam,

⁷ñu srăng rai tuč hlŏng lar msĕ si eh ñu pô; phung tuôm ƀuh leh ñu êlâo srăng lač, ‘Ti anôk ñu dôk?’

⁸Ñu srăng đuĕ msĕ si sa klei êpei, leh anăn arăng amâo lŏ ƀuh ñu ôh; arăng suôt ñu msĕ si klei bi ƀuh êjai mlam.

⁹Ală ƀuh ñu leh amâo srăng lŏ ƀuh ñu ôh, kăn lŏ mâo ñu rei ti anôk ñu dôk leh.

¹⁰Phung anak ñu srăng bi wĭt mnơ̆ng kơ phung ƀun ƀin, leh anăn kngan ñu lŏ bi wĭt hĕ mnơ̆ng ñu mă leh.

¹¹Klang ñu bŏ hŏng klei ktang hlăk ai, ƀiădah klei ktang ñu srăng luč hlăm lăn mbĭt hŏng ñu ti hruê ñu djiê.

¹²Wăt tơdah klei ƀai jing mmih hlăm ƀăng êgei ñu, wăt tơdah ñu mdăp hĕ ti gŭ êlah ñu,

¹³leh anăn amâo čiăng lui gơ̆ ôh, leh anăn kơ̆ng gơ̆ hlăm ƀăng êgei ñu,

¹⁴ƀiădah mnơ̆ng ñu ƀơ̆ng huă bi mlih jing jhat hlăm êhŭng ñu, jing êa kêč kam ala kpơ̆ng hlăm tian ñu.

¹⁵Ñu lun ƀơ̆ng klei mdrŏng, ƀiădah lŏ ô̆ digơ̆ kơ tač. Aê Diê yơh brei ñu ô̆ dŏ anăn.

¹⁶Ñu srăng ƀuôp mnăm êa kêč kam ala kpơ̆ng; êlah ala kpơ̆ng srăng bi mdjiê ñu.

¹⁷Ñu amâo srăng dôk dlăng ôh kơ êa hnoh, si tô hmô êa hnuê leh anăn êa ksâo êmô đoh msĕ si êa hnoh.

¹⁸Ñu srăng bi wĭt klei tŭ dưn mơ̆ng bruă ñu, leh anăn amâo srăng yua ôh; ñu amâo srăng mâo klei mơak ôh hŏng mnga mơ̆ng klei ñu čhĭ mnia.

¹⁹Kyuadah ñu juă lin leh anăn amâo uêñ ôh kơ phung ƀun ƀin, plah mă sang ñu amâo tuôm mdơ̆ng ôh.

²⁰Kyuadah klei ñu tluh amâo thâo hrăp ôh, ñu amâo srăng pioh ôh sa mnơ̆ng ñu khăp.

²¹Amâo lŏ mâo mnơ̆ng ăt dôk ôh kơ ñu huă ƀơ̆ng, snăn klei ñu čăt đĭ amâo srăng dôk sui ôh.

²²Êjai ñu mâo djăp mta mnơ̆ng klei knap mñai srăng truh kơ ñu; jih jang klei ktang mơ̆ng klei knap mñai srăng ngă kơ ñu.

²³Tơdah ñu trei leh, Aê Diê srăng mơĭt kơ ñu klei ngêñ hlơr, leh anăn bi truh klei anăn kơ ñu êjai ñu ƀơ̆ng huă.

²⁴Wăt tơdah ñu đuĕ kơ mnơ̆ng bi blah ngă hŏng msei, ƀrăm kông srăng tlŏ ñu kma êlam.

²⁵Ƀrăm anăn tlŏ ñu hluh gah, hlŏng kbiă ti tač, êdŭk ƀrăm knur tlŏ ti phĭ ñu; klei bi huĭ prŏng srăng truh kơ ñu.

²⁶Arăng pioh kơ ñu klei mmăt kpal, pui arăng amâo ayŭ srăng ƀơ̆ng ñu; ya mnơ̆ng ăt dôk hlăm sang čhiăm ñu pui srăng ƀơ̆ng jih.

²⁷Adiê srăng bi êdah klei wê ñu, leh anăn lăn ala srăng kgŭ bi kdơ̆ng hŏng ñu.

²⁸Dŏ dô hlăm sang ñu arăng srăng plah mă; arăng srăng mă mđuĕ dŏ anăn ti hruê Aê Diê ngêñ.

²⁹Anăn yơh jing kdrêč Aê Diê pioh kơ mnuih ƀai, ngăn dưn Aê Diê čuăn leh kơ ñu.”