Read Rade Y-Yôp 22 Bible Online

Y-Yôp 22 - Rade bible

Y-Yôp 22

¹Y-Êlipas mnuih ƀuôn Têman lŏ wĭt lač:

²“Dưi mơ̆ sa čô mnuih jing tŭ dưn kơ Aê Diê? Wăt pô knhâo jing tŭ dưn kơ ñu mơ̆?

³Mâo mơ̆ klei mơak kơ Pô Mâo Jih Klei Myang tơdah ih jing kpă, amâodah mâo klei tŭ dưn mơ̆ kơ ñu tơdah ih dôk hdĭp amâo mâo klei arăng dưi ƀuah ôh?

⁴Djŏ mơ̆ kyua klei ih huĭ mpŭ kơ Ñu, Ñu ƀuah ih, leh anăn mŭt mbĭt hŏng ih kơ klei phat kđi?

⁵Amâo djŏ hĕ klei ƀai ih jing prŏng? Amâo mâo knhal ôh kơ klei wê ih.

⁶Kyuadah ih mă mgô̆ leh mnơ̆ng mgơ̆ng mơ̆ng phung ayŏng adei ih amâo mâo klei ôh, leh anăn toh hĕ čhiăm ao phung mnuih brei diñu dôk lưng mlŭn.

⁷Ih amâo tuôm brei êa mnăm ôh kơ phung êmăn, leh anăn ih kơ̆ng hĕ mnơ̆ng ƀơ̆ng huă kơ phung êpa,

⁸wăt tơdah ih jing mnuih mâo klei dưi, mâo lăn hma, leh anăn mnuih arăng mpŭ dôk ti lăn anăn.

⁹Ih suôt leh phung mniê djiê ung wĭt kngan êhŏng, leh anăn ih bi joh hĕ kngan phung anak êrĭt ama.

¹⁰Snăn kđông dôk jŭm ih, leh anăn klei bi huĭ bhiâo riâo rit dưi ngă kơ ih;

¹¹klei mngač ih jing mmăt leh, tơl ih amâo dưi ƀuh ôh, leh anăn êa lip guôm ih.

¹²Amâo djŏ hĕ Aê Diê dôk ti dlông hlăm adiê? Dlăng bĕ kơ mtŭ, diñu dôk ti anôk dlông êdi!

¹³Snăn ih lač, ‘Ya klei Aê Diê thâo? Dưi mơ̆ Aê Diê dlăng hlăm anôk mmăt kpal leh anăn phat kđi?

¹⁴Knam kpal guôm Ñu tơl Ñu amâo dưi thâo ƀuh ôh, leh anăn Ñu êbat ti dlông čuôr adiê.’

¹⁵Ăt ih srăng êbat tui êlan hđăp, êlan phung ƀai êbat leh mơ̆?

¹⁶Arăng mă mđuĕ diñu êlâo truh hruê bi kčah kơ diñu; arăng bi luč atur kơ klei hdĭp diñu msĕ si êa kpuh mđung hĕ.

¹⁷Diñu lač kơ Aê Diê, ‘Đuĕ bĕ mơ̆ng hmei,’ leh anăn ‘Ya Pô Mâo Jih Klei Myang dưi ngă kơ hmei?’

¹⁸Ăt jing Ñu yơh bi bŏ sang diñu hŏng mnơ̆ng jăk — ƀiădah klei phung ƀai kčĕ dôk kbưi mơ̆ng kâo.

¹⁹Phung kpă ƀuh klei anăn leh anăn mơak; phung ênuah ênô tlao mưč kơ diñu,

²⁰leh anăn lač, ‘Sĭt nik phung roh hmei rai tuč leh, leh anăn mnơ̆ng diñu lui pui ƀơ̆ng leh jih.’

²¹Bi mguôp hŏng Aê Diê, leh anăn ih srăng mâo klei êđăp ênang; snăn klei jăk srăng truh kơ ih.

²²Mă tŭ bĕ klei bi hriăm mơ̆ng ƀăng êgei Ñu, leh anăn djă pioh klei Ñu blŭ hlăm ai tiê ih.

²³Tơdah ih lŏ wĭt kơ Pô Mâo Jih Klei Myang leh anăn bi luă gŭ ih pô, tơdah ih mă hwiê hĕ kbưi klei wê mơ̆ng sang čhiăm ih,

²⁴tơdah ih yap mah ih msĕ si ƀruih lăn, leh anăn mah mơ̆ng čar Ôphir msĕ si boh tâo hlăm hnoh êa,

²⁵leh anăn tơdah ih yap Pô Mâo Jih Klei Myang jing mah kơ ih, leh anăn prăk yuôm hĭn kơ ih,

²⁶snăn ih srăng mâo klei mơak hlăm Pô Mâo Jih Klei Myang, leh anăn kngưr ƀô̆ mta ih phă Aê Diê.

²⁷Ih srăng wah lač kơ Ñu, leh anăn Ñu srăng hmư̆ ih; leh anăn ih srăng bi sĭt mnơ̆ng ih ƀuăn.

²⁸Hlăm jih klei ih čiăng ngă ih srăng dưi, leh anăn klei mngač srăng mtrang ti êlan ih.

²⁹Tơdah ih êdu ai ih srăng blŭ hŏng klei knang sĭt, leh anăn Aê Diê srăng bi mtlaih pô luă gŭ.

³⁰Ñu srăng dŏng wăt mnuih soh mơh, arăng srăng bi mtlaih Ñu kyua kngan ih jing doh.”