Read Rade Y-Yôp 26 Bible Online

Y-Yôp 26 - Rade bible

Y-Yôp 26

¹Y-Yôp lŏ wĭt lač:

²“Ih yơh tuôm đru leh pô amâo mâo klei ktang! Ih yơh bi mtlaih kngan pô amâo mâo klei mơai!

³Ih yơh kčĕ leh kơ pô amâo mâo klei knhâo ôh, leh anăn hưn ênŭm ênap klei thâo mĭn kjăp!

⁴Hlei pô đru leh ih blŭ, leh anăn hlei ai mĭn blŭ leh hŏng ƀăng êgei ih?

⁵Phung djiê ktư̆ yơ̆ng hlăm gŭ êa leh anăn phung dôk hlăm êa msĕ mơh.

⁶Ƀuôn Phung Djiê êdah jih ti anăp Aê Diê, leh anăn ƀăng êlam amâo mâo mnơ̆ng guôm ôh.

⁷Ñu lang Dưr ti dlông anôk êhŏng, Ñu yuôl boh lăn ala ti anôk hơăi hlăm adiê.

⁸Ñu pioh êa hlăm knam kpal Ñu, ƀiădah knam anăn amâo mčah ôh ti gŭ klei ktrŏ êa.

⁹Ñu guôm ƀô̆ jhưng mtao Ñu, leh anăn siap biut knam Ñu ti dlông gơ̆.

¹⁰Ñu treh sa kwang wĭl ti dlông êlah êa, ti kdriêl klei mngač hŏng klei mmăt.

¹¹Phung kmeh adiê ktư̆ mgei, leh anăn bi kngăr huĭ kơ klei Ñu ƀuah.

¹²Hŏng klei myang Ñu, Ñu brei êa ksĭ dôk ngơ ngĭn, hŏng klei Ñu thâo săng Ñu bi mčah ala prŏng ti êa ksĭ.

¹³Hŏng êwa mơ̆ng êgei Ñu, Ñu mprăp bi doh phung adiê; kngan Ñu tlŏ ala dôk đuĕ.

¹⁴Nĕ klei anei jing knŏng kdrêč ti êngao mơ̆ng jih bruă Ñu; leh anăn drei hmư̆ klei Ñu blŭ mhač djơ djĕ! Ƀiădah hlei dưi thâo săng grăm klei myang Ñu?”