Read Rade Y-Yôp 3 Bible Online

Y-Yôp 3 - Rade bible

Y-Yôp 3

¹Leh klei anăn Y-Yôp ha blŭ leh anăn tăm pah kơ hruê amĭ kkiêng kơ ñu.

²Leh anăn Y-Yôp lač:

³“Brei hruê arăng kkiêng kơ kâo rai hĕ, wăt mlam msĕ mơh arăng lač, ‘Arăng kkiêng leh kơ sa čô anak êkei.’

⁴Brei hruê anăn jing mmăt! Akâo kơ Aê Diê ti dlông amâo duah ôh hruê anăn, kăn brei klei mngač mtrang kơ ñu rei.

⁵Brei klei ênguôt leh anăn mmăt kpal mă ñu. Brei knam guôm ti dlông ñu; brei klei mmăt êjai hruê bi huĭ ñu.

⁶Mlam anăn — brei klei mmăt kpal djă kơ̆ng ñu! Đăm brei ñu hơ̆k mơak ôh mbĭt hŏng jih hruê mkăn hlăm thŭn, đăm brei arăng yap ñu ôh mbĭt hŏng jih mlan.

⁷Sĭt nik, brei mlam anăn jing msĕ si mniê plao; đăm brei arăng hmư̆ asăp ur hơ̆k ôh hlăm ñu.

⁸Brei phung tăm pah tăm pah hĕ kơ hruê anăn, phung thâo bi êrâo Lêwiathan.

⁹Brei jih jang mtŭ ang dar ñu jing mmăt; brei ñu čang hmăng kơ mngač, ƀiădah đăm brei mâo ôh, kăn ƀuh rei klei mngač aguah.

¹⁰Kyuadah ñu amâo kđăl ôh tian amĭ kâo, kăn mdăp rei klei rŭng răng kơ ală kâo.

¹¹Si ngă kâo amâo djiê ôh ti hruê amĭ kkiêng kơ kâo, kbiă mơ̆ng tian amĭ leh anăn hlŏng djiê hĕ?

¹²Si ngă kơŭt jum hĕ kâo lĕ? Amâodah si ngă ksâo bi mam hĕ kâo?

¹³Snăn kâo đih leh anăn dôk ñăt; kâo pĭt, leh anăn kâo dôk mdei,

¹⁴mbĭt hŏng phung mtao leh anăn phung khua trông čhai ti lăn ala, phung lŏ mdơ̆ng kơ diñu pô mnơ̆ng rai leh,

¹⁵amâodah mbĭt hŏng phung khua mâo mah, phung bi bŏ sang diñu hŏng prăk.

¹⁶Amâodah si ngă kâo amâo jing ôh sa čô anak arăng mproh hgăm, msĕ si sa čô hđeh amâo tuôm ƀuh klei mngač ôh?

¹⁷Tinăn phung ƀai mdei klei diñu bi rŭng, leh anăn tinăn phung êmăn dôk mdei.

¹⁸Tinăn phung mnă dôk mdei mđrăm mbĭt; diñu amâo hmư̆ ôh asăp khua bruă.

¹⁹Phung điêt leh anăn phung prŏng dôk tinăn, leh anăn hlŭn mâo klei êngiê mơ̆ng khua ñu.

²⁰Si ngă arăng brei hĕ klei mngač kơ pô knap mñai, leh anăn klei hdĭp kơ pô mâo mngăt ênguôt,

²¹pô čang hmăng kơ klei djiê, ƀiădah klei anăn amâo truh ôh, leh anăn duah klei anăn lu hĭn kơ pô klei lăn duah ngăn yuôm mdăp leh;

²²pô hơ̆k snăk leh anăn mơak tơdah diñu truh kơ msat?

²³Si ngă arăng brei leh klei mngač kơ sa čô arăng bi hgăm leh êlan ñu, pô Aê Diê krư̆ leh?

²⁴Kyuadah klei kâo krao truh msĕ si kpŭng kâo ƀơ̆ng, leh anăn klei kâo ur kčaĭ leh msĕ si êa.

²⁵Kyuadah klei kâo huĭ hriê kơ kâo, leh anăn klei kâo hyưt truh kơ kâo.

²⁶Kâo amâo dôk mdei ôh, kăn dôk ñăt rei; kâo amâo mâo klei êđăp ênang ôh; ƀiădah klei rŭng răng truh kơ kâo.”