Read Rade Y-Yôp 30 Bible Online

Y-Yôp 30 - Rade bible

Y-Yôp 30

¹“Ƀiădah ară anei diñu djă djik djak kơ kâo, phung êkei hlăk ai hĭn kơ kâo, kơ phung ama diñu kâo amâo yap năng ôh mă bruă mbĭt hŏng asâo kiă êmô biăp kâo.

²Ya boh tŭ dưn kâo dưi mâo mơ̆ng klei ktang kngan diñu, phung mnuih luč leh klei mơai?

³Êwang êwĭt kyua kƀah leh anăn ư̆ êpa, diñu kiêl ƀơ̆ng lăn thu anôk jing leh ksơr mơ̆ng sui;

⁴Diñu pĕ čiăng ƀơ̆ng mnga leh anăn hla kyâo, diñu mă agha kyâo êruê čiăng mjing mnơ̆ng diñu ƀơ̆ng.

⁵Arăng suôt diñu mơ̆ng phung ƀuôn sang; arăng ur kơ diñu msĕ si kơ pô knĕ.

⁶Diñu dôk hlăm tlung anôk bi huĭ, hlăm ƀăng lăn leh anăn hlăm ƀăng boh tâo.

⁷Diñu krao ti krah ƀur kyâo, leh anăn bi ksĭng mbĭt ti gŭ pum êruê.

⁸Sa phung hơăi mang leh anăn arăng bi êmut, arăng suôt leh diñu mơ̆ng čar.

⁹Leh anăn ară anei kâo jing mnơ̆ng diñu duê mmuñ hŏng klei djă djik djak.

¹⁰Diñu bi êmut kheh kơ kâo, leh anăn weh đuĕ kbưi mơ̆ng kâo; tơdah ƀuh kâo diñu čiăng kčuh êa bah mtam.

¹¹Kyuadah Aê Diê amâo lŏ mgang kâo ôh leh anăn mdlưh hĕ kâo, diñu amâo lŏ mâo klei kơ̆ng ôh, ƀiădah ngă kơ kâo tui si diñu čiăng.

¹²Tĭng hnuă kâo phung hơăi mang kgŭ čiăng ngă, diñu suôt kâo, diñu duah êlan bi rai kâo.

¹³Diñu bi rai êlan kâo, diñu lŏ thiăm kơ klei knap mñai kâo; amâo mâo pô kơ̆ng diñu ôh.

¹⁴Diñu mŭt ti ƀăng hluh prŏng; ti êlan mtih klưh čiăng ngă kơ kâo.

¹⁵Lu klei bi huĭ ngă kơ kâo; klei hing ang kâo luč msĕ si angĭn kpuh mđung, klei mdrŏng kâo đuĕ msĕ si knam.

¹⁶Mngăt kâo rŭng răng hlăm lam kâo; hruê knap mñai truh leh kơ kâo.

¹⁷Êjai mlam mâo klei ruă truh kơ klang kâo, leh anăn klei ruă kiêl ƀơ̆ng kâo amâo mdei ôh.

¹⁸Hŏng klei ktang, Aê Diê djă hyuă kâo ti kkuê tơl čhiăm ao kâo kčŭng jih,

¹⁹Aê Diê dlăm kâo leh hlăm lŭ, leh anăn kâo jing leh msĕ si ƀruih lăn leh anăn hbâo.

²⁰Kâo ur kơ Ih, ơ Aê Diê, leh anăn Ih amâo lŏ wĭt lač kơ kâo ôh, kâo dôk dơ̆ng, ƀiădah Ih amâo uêñ kơ kâo ôh.

²¹Ară anei Ih bi knap kâo ktang snăk; hŏng jih klei ktang kngan Ih, Ih dôk ngă kơ kâo.

²²Ih pŭ kâo hŏng angĭn, Ih brei kâo đung mbĭt hŏng ñu, Ih kpuh mđung kâo hlăm angĭn êbŭ.

²³Sĭt nik, kâo thâo Ih srăng atăt kâo kơ klei djiê, kơ anôk Ih čuăn pioh leh kơ jih jang phung hdĭp.

²⁴Sĭt nik amâo mâo sa čô čiăng ngă jhat kơ sa čô mnuih, knap mñai akâo klei đru.

²⁵Amâo djŏ hĕ kâo hia kơ pô tŭ klei dleh? Amâo djŏ hĕ kâo ênguôt kơ phung ƀun ƀin?

²⁶Ƀiădah tơdah kâo dôk guôn klei jăk, klei jhat truh; leh anăn tơdah kâo dôk čang kơ klei mngač, klei mmăt hriê.

²⁷Prôč tiê kâo dôk rŭng răng, amâo mâo mdei ôh; klei knap mñai truh nanao kơ kâo.

²⁸Klĭt kâo jing jŭ leh, kyua klei knap mñai amâo djŏ mơ̆ng mđiă ôh; kâo dôk dơ̆ng hlăm klei bi kƀĭn, leh anăn kwưh klei đru.

²⁹Kâo jing ayŏng adei hŏng asâo dliê, leh anăn mah jiăng hŏng čĭm ôtrus.

³⁰Klĭt kâo bi mbliư̆ jing jŭ leh anăn kpŏk đuĕ, leh anăn klang kâo hang hlơr.

³¹Kâo pĕ brô̆ hŏng klei kơŭ kyăm, leh anăn ayŭ đĭng kliă hŏng asăp čŏk hia.”