Read Rade Y-Yôp 33 Bible Online

Y-Yôp 33 - Rade bible

Y-Yôp 33

¹“Ară anei hin, hmư̆ bĕ klei kâo blŭ, Ơ Y-Yôp; leh anăn mđing knga kơ jih klei kâo lač.

²Nĕ anei, kâo ha ƀăng êgei; êlah hlăm ƀăng êgei kâo dơ̆ng blŭ.

³Klei kâo blŭ hưn kơ ai tiê kâo kpă ênô, leh anăn ya klei ƀăng kƀông kâo thâo, kâo blŭ hŏng klei sĭt.

⁴Mngăt Myang Aê Diê hrih kâo leh, leh anăn êwa mơ̆ng Pô Mâo Jih Klei Myang brei klei hdĭp kơ kâo.

⁵Lŏ wĭt lač bĕ tơdah ih dưi; blŭ bĕ bi djŏ pruê̆ ti anăp kâo, kăp mgang bĕ ih pô.

⁶Nĕ anei, ti anăp Aê Diê kâo jing msĕ si ih; kâo msĕ mơh Aê Diê mjing hŏng klŏ lŭ.

⁷Nĕ anei, đăm ih krưp huĭ kơ kâo ôh; kơhưm kâo amâo srăng bi ktrŏ ih ôh.

⁸Sĭt nik ih blŭ leh brei kâo hmư̆, leh anăn kâo hmư̆ leh asăp ih blŭ.

⁹Ih lač, ‘Kâo jing doh, amâo mâo klei soh ôh; Kâo jing êngeh, amâo mâo klei wê ôh hlăm kâo.

¹⁰Ƀiădah, Aê Diê duah klei hŏng kâo, Ñu yap kâo msĕ si roh Ñu.

¹¹Ñu bi hnuh jơ̆ng kâo, leh anăn kăp dlăng jih êlan kâo nao.’

¹²Nĕ hlăm klei anăn, ih amâo jing djŏ ôh. Kâo srăng lŏ wĭt lač kơ ih. Aê Diê jing Pô prŏng hĭn kơ mnuih.

¹³Si ngă ih bi tăng hŏng Ñu, leh anăn lač, ‘Ñu amâo srăng lŏ wĭt lač ôh sa mta kơ klei kâo blŭ’?

¹⁴Kyuadah Aê Diê blŭ lu blư̆ lu êlan, wăt tơdah mnuih amâo thâo săng ôh klei anăn dưn.

¹⁵Hlăm klei êpei, hlăm klei bi ƀuh êjai mlam, êjai mnuih pĭt snăk, êjai diñu dôk đih pĭt ti jhưng diñu,

¹⁶hlăk anăn Ñu pŏk knga phung mnuih, leh anăn bi huĭ digơ̆ hŏng klei Ñu brei răng,

¹⁷čiăng kơ Ñu dưi bi weh đuĕ mnuih mơ̆ng klei digơ̆ čiăng ngă, leh anăn bi luč hĕ klei mgao mơ̆ng mnuih;

¹⁸Ñu mgang mngăt digơ̆ kơ Ƀăng Êlam, klei hdĭp digơ̆ kơ klei rai tuč kyua đao gưm.

¹⁹Msĕ mơh Aê Diê mkra mnuih hŏng klei ruă duam, leh anăn hŏng klei ruă klang nanao;

²⁰snăn digơ̆ bi êmut kơ mnơ̆ng ƀơ̆ng huă, leh anăn amâo čiăng ƀơ̆ng ôh mnơ̆ng jăk.

²¹Asei mlei digơ̆ êwang tơl arăng amâo lŏ ƀuh kđeh digơ̆ ôh, leh anăn knŏng klang kleh bi êdah.

²²Mngăt digơ̆ giăm truh kơ Ƀăng Êlam, leh anăn klei hdĭp digơ̆ giăm kơ phung bi truh klei djiê.

²³Tơdah mâo sa čô dĭng buăl jăk dôk mbĭt hŏng gơ̆, sa čô pô ti krah, sa čô hlăm sa êbâo, čiăng hưn kơ mnuih ya jing djŏ kơ gơ̆;

²⁴leh anăn ñu pap kơ gơ̆ leh anăn lač, ‘Bi mtlaih bĕ gơ̆, đăm brei gơ̆ trŭn nao kơ Ƀăng Êlam ôh, kâo mâo leh mnơ̆ng bi tui;

²⁵brei asei mlei gơ̆ lŏ jing mda; brei gơ̆ lŏ wĭt jing msĕ si ênuk gơ̆ hlăk ai.’

²⁶Hlăk anăn mnuih wah lač kơ Aê Diê, leh anăn Aê Diê tŭ gơ̆, gơ̆ mŭt ti anăp Aê Diê hŏng klei hơ̆k. Aê Diê brei gơ̆ yăl dliê kơ mnuih klei gơ̆ mâo leh klei bi mtlaih,

²⁷leh anăn pô anăn mmuñ ti anăp arăng leh anăn lač, ‘Kâo ngă soh leh, leh anăn bi msoh kơ klei kpă, leh anăn arăng amâo bi wĭt kơ kâo tui si klei năng ôh.

²⁸Aê Diê bi tui leh mngăt kâo amâo brei trŭn nao kơ Ƀăng Êlam ôh, leh anăn klei hdĭp kâo srăng ƀuh klei mngač’.

²⁹Nĕ anei, Aê Diê ngă jih klei anăn, lu blư̆ hŏng sa čô mnuih,

³⁰čiăng ktŭng mă mngăt ñu mơ̆ng Ƀăng Êlam, čiăng kơ ñu dưi ƀuh klei mngač kơ klei hdĭp.

³¹Mđing knga, Ơ Y-Yôp, dôk hmư̆ bĕ kâo; dôk ñăt leh anăn kâo srăng blŭ.

³²Tơdah ih mâo klei čiăng lač, lŏ wĭt lač bĕ kơ kâo; blŭ bĕ, kyuadah kâo čiăng bi êdah ih kpă.

³³Tơdah amâo djŏ snăn ôh, dôk hmư̆ bĕ kâo; dôk ñăt bĕ, leh anăn kâo srăng mtô kơ ih klei knhâo.”