Read Rade Y-Yôp 35 Bible Online

Y-Yôp 35 - Rade bible

Y-Yôp 35

¹Leh anăn Y-Êlihu lač:

²“Ih mĭn klei anei jing djŏ mơ̆? Ih lač mơ̆, ‘Kâo mâo klei găl ti anăp Aê Diê,’

³klei ih êmuh, ‘Ya boh tŭ dưn kâo mâo, leh anăn ya kâo mâo klei jăk hĭn tơdah kâo amâo ngă soh ôh?’

⁴Kâo srăng lŏ wĭt lač kơ ih, leh anăn kơ phung mah jiăng mbĭt hŏng ih.

⁵Dlăng kơ phung adiê leh anăn ƀuh; leh anăn ksiêm kơ knam dôk ti dlông hĭn kơ ih.

⁶Tơdah ih ngă soh leh, ya klei jhat ih ngă kơ Ñu? Leh anăn tơdah ih lŏ bi lar klei soh ih, ya klei ih ngă kơ Ñu?

⁷Tơdah ih jing kpă, ya mnơ̆ng ih brei kơ Ñu; amâodah ya mnơ̆ng Ñu mă tŭ mơ̆ng kngan ih?

⁸Klei ƀai knŏng bi jhat kơ mnuih msĕ si ih, leh anăn klei kpă ênô ih jing yuôm kơ phung anak mnuih.

⁹Kyuadah mâo lu klei ktư̆ juă phung ƀuôn sang ur krao; diñu kwưh klei đru kyua păl phung ktang ngă kơ diñu.

¹⁰Ƀiădah amâo mâo sa čô ôh lač, ‘Ti Aê Diê Pô Hrih kâo, Pô mtrŭt arăng mmuñ êjai mlam,

¹¹Pô bi hriăm drei kdlưn hĭn kơ hlô dliê ti lăn ala, leh anăn mjing drei knhâo hĭn kơ čĭm hlăm êwa?’

¹²Diñu ur, ƀiădah Aê Diê amâo lŏ wĭt lač ôh, kyua klei mgao phung mnuih ƀai.

¹³Sĭt nik Aê Diê amâo hmư̆ ôh pô kwưh akâo hŏng ai tiê amâo mâo sĭt suôr, kăn Pô Mâo Jih Klei Myang uêñ kơ klei anăn rei.

¹⁴Ƀai hĭn tơdah ih lač ih amâo ƀuh Ñu ôh, klei ih bi êdah kơ Ñu leh, leh anăn ih dôk guôn kơ Ñu!

¹⁵Leh anăn ară anei, kyuadah Ñu amâo bi kmhal ôh hŏng klei ngêñ, leh anăn Ñu amâo đei uêñ ôh kơ klei soh arăng ngă leh,

¹⁶snăn Y-Yôp ha ƀăng êgei ñu blŭ hơăi mang, ñu bi lar boh blŭ amâo mâo hŏng klei thâo săng ôh.”