Read Rade Y-Yôp 39 Bible Online

Y-Yôp 39 - Rade bible

Y-Yôp 39

¹“Ih thâo mơ̆ hbĭl bê dliê mđai? Ih ƀuh mơ̆ hlô rang ana dôk mđai?

²Dưi mơ̆ ih thâo hruê digơ̆ mđai, leh anăn ih dưi mơ̆ yap mlan digơ̆ kđông êđai,

³tơdah digơ̆ krŭn mđai, leh anăn bi kbiă êđai digơ̆ ti tač?

⁴Êđai digơ̆ jing ktang leh anăn hriê kơ prŏng hlăm kdrăn; digơ̆ đuĕ hiu leh anăn amâo lŏ wĭt kơ ana ôh.

⁵Hlei phưi aseh dliê hiu tui si čiăng? Hlei kleh hĕ klei kă aseh dliê êran pral?

⁶Kơ ñu anăn, Kâo yơh brei leh kdrăn tač leh anăn lăn mâo hra jing anôk dôk.

⁷Ñu bi êmut kơ ênai hao hao hlăm ƀuôn prŏng; ñu amâo hmư̆ ôh asăp mgăt ur.

⁸Ñu hiu hlăm čư̆ jing kdrăn rơ̆k ñu, leh anăn duah rơ̆k mtah.

⁹Si ngă, êmô dliê čiăng mă bruă kơ ih mơ̆? Ñu srăng đăm mlam ti war êmô ih mơ̆?

¹⁰Dưi mơ̆ ih mđua knông kơ ñu brei kai hma ih, amâodah hwar hlăm tlung hma ih?

¹¹Ih srăng knang kơ ñu kyua klei ktang ñu prŏng mơ̆, leh anăn ih srăng jao mơ̆ kơ ñu bruă dleh ih?

¹²Ih đăo mơ̆ kơ ñu srăng lŏ wĭt, leh anăn mdiăng ba mdiê ih kơ anôk prah?

¹³Siap čĭm ôtrus pưh pral; ƀiădah ñu amâo dưi phiơr msĕ si čĭm jhưng ôh.

¹⁴Kyuadah ñu lui boh ñu ti lăn, leh anăn bi krăm boh anăn hŏng lăn čuah,

¹⁵ñu wơr bĭt hĕ kơ sa ƀĕ jơ̆ng dưi bi mčah hĕ boh anăn, leh anăn kơ hlô dliê dưi juă bi rai boh anăn.

¹⁶Ñu ngă khăng hŏng phung êđai ñu, msĕ si digơ̆ amâo jing êđai ñu pô ôh; wăt tơdah ñu ngă snăn dưn, ñu amâo uêñ ôh;

¹⁷kyuadah Kâo amâo brei klei knhâo ôh kơ ñu, leh anăn amâo brei sa kdrêč klei thâo săng ôh kơ ñu.

¹⁸Tơdah ñu kgŭ leh anăn êran, ñu tlao mưč kơ aseh leh anăn mgăt gơ̆.

¹⁹Ih brei kơ aseh klei ktang ñu mơ̆? Ih bi čăt mlâo yơ̆ng ti kkuê ñu mơ̆?

²⁰Ih brei ñu kdăt msĕ si ktuôp mơ̆? Klei ñu heh bi huĭ arăng mơh.

²¹Ñu paih čar hlăm tlung, leh anăn mơak kyua klei ktang ñu; ñu hung ti anăp mnơ̆ng bi blah,

²²ñu tlao mưč kơ klei huĭ, leh anăn amâo êdu ai ôh; ñu amâo wir đuĕ kơ đao gưm ôh.

²³Ti dlông rŏng ñu arăng hmư̆ ênai đĭng tiông, mâo kju leh anăn kdrang mta ƀlêč ƀlir.

²⁴Hŏng klei jhŏng leh anăn ngêñ, ñu êran pral; ñu amâo dưi dôk ngơ ngĭn ôh tơdah hmư̆ asăp ki.

²⁵Tơdah hmư̆ asăp ki, ñu ur, ‘Eh heh!’ ñu hưñ kơ mnâo bi blah mơ̆ng kbưi, ñu hmư̆ asăp khua kahan ur mjan leh anăn asăp arăng driâo.

²⁶Djŏ mơ̆ kyua klei knhâo ih tlang ktrâo phiơr lia, leh anăn mblang siap ñu phă dhŭng?

²⁷Djŏ mơ̆ hŏng klei ih mtă brei tlang đĭ leh anăn ngă hruh ñu ti anôk dlông?

²⁸Ti dlông boh tâo ñu dôk leh anăn ngă hruh ñu, leh anăn hlăm anôk alhŏk boh tâo kjăp.

²⁹Mơ̆ng anăn ñu ƀuh mnơ̆ng ñu čiăng mă; ală ñu dlăng kơ mnơ̆ng anăn mơ̆ng kbưi.

³⁰Êđai ñu ƀuôp mnăm êrah; leh anăn ñu dôk ti anôk mâo mnơ̆ng djiê leh.”