Read Rade Y-Yôp 4 Bible Online

Y-Yôp 4 - Rade bible

Y-Yôp 4

¹Leh anăn Y-Êlipas mơ̆ng ƀuôn Têman lŏ wĭt lač:

²“Tơdah sa čô jhŏng ha blŭ kơ ih, ih srăng ênguôt mơ̆? Ƀiădah hlei pô dưi dôk ñăt?

³Nĕ anei ih bi hriăm leh lu mnuih, leh anăn ih bi ktang leh kngan awăt.

⁴Klei ih blŭ krơ̆ng leh pô têč hnêč, leh anăn ih bi kjăp leh kơŭt êun.

⁵Ƀiădah ară anei klei anăn truh kơ ih pô, leh anăn ih amâo dưi gĭr ôh; klei anăn ngă kơ ih, leh anăn ih êdu ai.

⁶Amâo djŏ hĕ klei ih huĭ mpŭ kơ Aê Diê jing klei ih knang, leh anăn klei ih dôk sĭt suôr jing klei ih čang hmăng?

⁷Dôk mĭn bĕ, hlei pô amâo soh tuôm rai luč leh? Amâodah ti anôk phung kpă ênô tuôm rai tuč leh?

⁸Tui si kâo ƀuh leh, phung pla klei wê leh anăn rah klei rŭng răng srăng wiă klei wê leh anăn klei rŭng răng.

⁹Hŏng êwa bluh mơ̆ng Aê Diê, diñu djiê jih leh anăn hŏng klei ktang klei Aê Diê ngêñ, diñu rai tuč.

¹⁰Aê Diê bi ñăt kriêp klei diñu gruh msĕ si êmông gu leh anăn klei diñu grêñ msĕ si êmông brêč. Aê Diê bi joh êgei êđai êmông gu.

¹¹Snăn, êmông gu ktang djiê kyua kƀah hlô dưi hiêk ƀơ̆ng, leh anăn êđai êmông gu bra đuĕ mdê mdê.

¹²Arăng hưn sa klei kơ kâo hŏng klei hgăm, knga kâo hmư̆ leh klei arăng mhač anăn.

¹³Êjai dôk mĭn kơ klei bi ƀuh êjai mlam, êjai phung mnuih dôk pĭt snăk,

¹⁴klei huĭ leh anăn klei ktư̆ yơ̆ng truh kơ kâo, brei jih jang klang kâo kpoh mgei.

¹⁵Sa angĭn thut găn ti anăp ƀô̆ mta kâo, leh anăn kâo pŭ mlâo asei.

¹⁶Mâo sa rup ti anăp ală kâo; angĭn thut anăn dôk hĕ, ƀiădah kâo amâo dưi thâo kral ñu ôh. Leh klei ñăt kriêp, kâo hmư̆ sa asăp:

¹⁷‘Dưi mơ̆ sa čô mnuih thâo djiê jing kpă ênô hĭn ti anăp Aê Diê? Dưi mơ̆ sa čô mnuih jing êngeh hĭn kơ Pô Mjing ñu?

¹⁸Wăt Aê Diê amâo dưi knang ôh kơ phung dĭng buăl ñu, leh anăn kčŭt klei soh kơ phung dĭng buăl jăk ñu;

¹⁹Ƀai êjai hĭn kơ phung arăng mjing leh hŏng lăn lŭ, atur diñu jing ƀruih lăn, phung arăng bi mčah bi rai msĕ si muôr.

²⁰Diñu hdĭp mơ̆ng aguah ka truh tlam arăng bi rai diñu leh; diñu rai tuč hlŏng lar, amâo mâo pô uêñ ôh.

²¹Tơdah aruăt klei hdĭp diñu tloh leh, diñu djiê yơh, leh anăn djiê amâo mâo klei tŭ dưn.’ ”