Read Rade Y-Yôp 5 Bible Online

Y-Yôp 5 - Rade bible

Y-Yôp 5

¹“Iêô bĕ ară anei, mâo mơ̆ sa čô srăng lŏ wĭt lač kơ ih? Kơ hlei pô hlăm phung doh jăk ih srăng knang?

²Klei rŭng ênguôt bi mdjiê pô mluk, leh anăn klei nač bi mdjiê pô hơăi mang.

³Kâo ƀuh leh pô mluk dơ̆ng čăt jing, ƀiădah bhiâo riâo rit kâo tăm pah leh kơ anôk ñu dôk.

⁴Phung anak êkei ñu amâo mâo klei hơĭt ôh, arăng juă bi rai diñu ti ƀăng jang, leh anăn amâo mâo pô dŏng diñu ôh.

⁵Phung êpa ƀơ̆ng hĕ boh ñu wiă, ñu pĕ boh anăn mơ̆ng anôk êruê; leh anăn phung mhao ƀhŭp ƀhăp kơ ngăn drăp ñu.

⁶Kyuadah klei bi knap amâo kbiă hriê mơ̆ng ƀruih lăn ôh, kăn klei rŭng răng čăt mơ̆ng lăn rei;

⁷ƀiădah mnuih kkiêng kơ klei rŭng răng, msĕ si mnga pui đung ti dlông.

⁸Tơdah kâo jing ih, kâo srăng duah Aê Diê, leh anăn kâo srăng jao klei kâo kơ Aê Diê,

⁹Pô ngă bruă prŏng leh anăn arăng amâo dưi thâo săng ôh, bruă yuôm bhăn arăng amâo dưi yap ôh:

¹⁰Ñu brei adiê hjan ti lăn ala leh anăn krih êa ti dlông hma;

¹¹Ñu bi mđĭ phung luă gŭ, leh anăn kdjŏng phung čŏk hia dưm ti anôk hơĭt.

¹²Ñu bi luč hĕ hdră phung mnêč čiăng ngă, snăn bruă kngan digơ̆ amâo srăng dưi jing ôh.

¹³Ñu mă kơ̆ng phung knhâo hŏng klei mnêč digơ̆ pô; leh anăn Ñu bi ruê̆ hĕ djăl hdră phung mnêč.

¹⁴Êjai hruê digơ̆ bi tuôm hŏng klei mmăt, leh anăn êjai yang hruê dơ̆ng duah êwư msĕ si êjai mlam.

¹⁵Ƀiădah Ñu dŏng phung kƀah mnơ̆ng mơ̆ng ƀăng êgei phung anăn, leh anăn mơ̆ng kngan phung ktang.

¹⁶Snăn phung ƀun ƀin mâo klei čang hmăng, leh anăn klei wê dôk ñăt kriêp.

¹⁷Nĕ anei, jăk mơak yơh mnuih Aê Diê ƀuah; kyua anăn đăm bi êmut ôh kơ klei Pô Mâo Jih Klei Myang mkra.

¹⁸Kyuadah Ñu bi êka, ƀiădah Ñu păn; Ñu čăm, ƀiădah kngan Ñu bi hlao.

¹⁹Ñu srăng bi mtlaih ih mơ̆ng năm mta klei rŭng răng; wăt kjuh mta dưn mơh, klei ƀai amâo srăng ngă kơ ih ôh.

²⁰Êjai ư̆ êpa Ñu srăng bi tui ih mơ̆ng klei djiê, leh anăn êjai klei bi blah mơ̆ng mta đao gưm.

²¹Arăng srăng mdăp ih mơ̆ng êlah mčeh luar, leh anăn ih amâo srăng huĭ ôh kơ klei bi rai tơdah gơ̆ truh.

²²Ih srăng tlao kơ klei bi rai leh anăn klei ư̆ êpa, leh anăn amâo srăng huĭ ôh kơ hlô dliê ti lăn ala.

²³Kyuadah ih srăng mâo klei bi mguôp hŏng boh tâo hlăm hma, leh anăn hlô dliê srăng dôk êđăp ênang hŏng ih.

²⁴Ih srăng thâo kơ sang čhiăm ih dôk êđăp ênang, leh anăn ih srăng čuă dlăng biăp êmô ih leh anăn ƀuh digơ̆ ênŭm sơăi.

²⁵Ih srăng thâo msĕ mơh kơ phung anak čô ih srăng jing lu, leh anăn phung čô čĕ ih msĕ si rơ̆k ti lăn ala.

²⁶Ih srăng truh kơ msat ih êjai ênuk ih mduôn jŏk, msĕ si čăp mdiê truh kơ anôk prah djŏ yan ñu.

²⁷Nĕ anei, hmei ksiêm bi nik leh; klei anăn jing sĭt. Hmư̆ bĕ, leh anăn thâo klei anăn jing djŏ kơ ih.”